ਬੀਜਿੰਗ, 26 ਜੂਨ (ਪੋਸਟ ਬਿਊਰੋ)- ਤਾਈਵਾਨ ਤੋਂ ਇੱਕ ਅਮਰੀਕੀ ਜਹਾਜ਼ ਦੇ ਉਡਾਣ ਭਰਨ ਤੋਂ ਭੜਕੇ ਹੋਏ ਚੀਨ ਨੇ ਕਿਹਾ ਹੈ ਕਿ ਇਸ ਨਾਲ ਖੇਤਰੀ ਸਥਿਤੀ ਵਿੱਚ ਵਿਘਨ ਪੈਦਾ ਹੋਇਆ ਹੈ ਤੇ ਇਸ ਨਾਲ ਸ਼ਾਂਤੀ ਤੇ ਸਥਿਰਤਾ ਖਤਰੇ ਵਿੱਚ ਪੈ ਗਈ ਹੈ। ਚੀਨ ਦੇ ਇਸ ਬਿਆਨ ਨੂੰ ਗੰਭੀਰਤਾ ਨਾਲ ਲਿਆ ਜਾ ਰਿਹਾ ਹੈ।
ਪੀਪਲਜ਼ ਲਿਬਰੇਸ਼ਨ ਆਰਮੀ ਦੇ ਈਸਟਰਨ ਥੀਏਟਰ ਕਮਾਂਡ ਦੇ ਬੁਲਾਰੇ ਕਰਨਲ ਸ਼ੀ ਯੀ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਫੌਜ ਨੇ ਸ਼ੁੱਕਰਵਾਰ ਅਮਰੀਕੀ ਜਹਾਜ਼ਾਂ ਦੀ ਨਿਗਰਾਨੀ ਲਈ ਹਵਾਈ ਤੇ ਜ਼ਮੀਨੀ ਬਲਾਂ ਦਾ ਆਯੋਜਨ ਕੀਤਾ ਸੀ।ਕਰਨਲ ਸ਼ੀ ਯੀ ਨੇ ਕਿਹਾ ਕਿ ਉਨ੍ਹਾਂ ਅਮਰੀਕਾ ਦੀ ਕਾਰਵਾਈ ਦੀ ਸਖਤ ਵਿਰੋਧ ਕੀਤਾ ਹੈ। ਉਨ੍ਹਾਂ ਦੀ ਫੌਜ ਅਲਰਟ ਮੋਡ ਉੱਤੇ ਹੈ। ਵਰਨਣ ਯੋਗ ਹੈ ਕਿ ਤਾਈਵਾਨ ਬਾਰੇ ਅਮਰੀਕਾ ਤੇ ਚੀਨ ਵਿੱਚ ਤਣਾਅ ਜਾਰੀ ਹੈ। ਜਾਪਾਨ ਵਿੱਚ ਹੋਈ ਕਵਾਡ ਮੈਂਬਰਾਂ ਦੀ ਬੈਠਕ ਵਿੱਚ ਅਮਰੀਕਾ ਨੇ ਚੀਨ ਨੂੰ ਚਿਤਾਵਨੀ ਦਿੱਤੀ ਸੀ ਕਿ ਜੇ ਉਹ ਤਾਈਵਾਨ ਉੱਤੇ ਕਿਸੇ ਤਰ੍ਹਾਂ ਦੀ ਫੌਜੀ ਕਾਰਵਾਈ ਕਰਦਾ ਹੈ ਤਾਂ ਉਸ ਦਾ ਜਵਾਬ ਦੇਣ ਤੋਂ ਅਮਰੀਕਾ ਪਿੱਛੇ ਨਹੀਂ ਰਹੇਗਾ। ਤਾਈਵਾਨ ਬਾਰੇੇ ਆਪਣੀ ਨੀਤੀ ਉੱਤੇ ਅਮਰੀਕਾ ਕੋਈ ਬਦਲਾਅ ਨਹੀਂ ਕਰੇਗਾ।ਪਿੱਛੇ ਜਿਹੇ ਅਮਰੀਕਾ ਦੇ ਰੱਖਿਆ ਸੈਕਟਰੀ ਲਾਇਡ ਆਸਟਿਨ ਨੇ ਚੀਨ ਉੱਤੇ ਇੱਕ ਬਿਆਨ ਦਿੱਤਾ ਅਤੇ ਕਿਹਾ ਸੀ ਕਿ ਚੀਨ ਦੀ ਹਮਲਾਵਰ ਤੇ ਖਤਰਨਾਕ ਕਾਰਵਾਈ ਏਸ਼ੀਆ ਵਿੱਚ ਸਥਿਰਤਾ ਲਈ ਖਤਰਾ ਹੈ। ਚੀਨ ਦੇ ਵਿਦੇਸ਼ ਮੰਤਰੀ ਬੇਈ ਫੇਂਘੇ ਨੇ ਇਸਦਾ ਜਵਾਬ ਦਿੰਦਿਆਂ ਕਿਹਾ ਕਿ ਕਿਸੇ ਨੂੰ ਵੀ ਖੇਤਰੀ ਖੁਸ਼ਹਾਲੀ ਦੀ ਰੱਖਿਆ ਲਈ ਚੀਨੀ ਫੌਜੀ ਬਲਾਂ ਦੇ ਸੰਕਲਪ ਤੇ ਸਮਰੱਥਾ ਨੂੰ ਘੱਟ ਕਰ ਕੇ ਦੇਖਣਾ ਨਹੀਂ ਚਾਹੀਦਾ।