ਲੰਡਨ, 24 ਜੂਨ (ਪੋਸਟ ਬਿਊਰੋ)- 20 ਪੌਂਡ ਅਤੇ 50 ਪੌਂਡ ਦੇ ਕਾਗਜ਼ੀ ਨੋਟ ਖਰਚਣ ਲਈ ਸਿਰਫ਼ 99 ਦਿਨ ਬਾਕੀ ਹਨ। ਬੈਂਕ ਆਫ ਇੰਗਲੈਂਡ ਨੇ ਕਿਹਾ ਕਿ 20 ਪੌਂਡ ਜਾਂ 50 ਪੌਂਡ ਦੇ ਕਾਗਜ਼ੀ ਨੋਟ ਸਤੰਬਰ ਦੇ ਅੰਤ ਤਕ ਖਰਚੇ ਜਾਂ ਜਮ੍ਹਾਂ ਕੀਤੇ ਜਾਣੇ ਚਾਹੀਦੇ ਹਨ। ਬੈਂਕ ਨੇ ਕਿਹਾ ਕਿ ਅੰਦਾਜ਼ਨ 163 ਮਿਲੀਅਨ 50 ਪੌਂਡ ਦੇ ਕਾਗਜ਼ੀ ਨੋਟ ਅਤੇ ਲੱਗਭਗ 314 ਮਿਲੀਅਨ 20 ਪੌਂਡ ਦੇ ਕਾਗਜ਼ੀ ਨੋੋਟ ਲੱਗਭਗ 14.5 ਅਰਬ ਪੌਂਡ ਦੀ ਕੀਮਤ ਦੀ ਕਰੰਸੀ ਅਜੇ ਪ੍ਰਚਲਤ ਵਿੱਚ ਹੈ। ਇਨ੍ਹਾਂ ਨੋਟਾਂ ਨੂੰ ਪੰਜ ਪੌਂਡ ਅਤੇ 10 ਪੌਂਡ ਦੇ ਪਲਾਸਟਿਕ ਦੇ ਨੋਟਾਂ ਵਾਂਗ ਹੀ ਬਦਲਿਆ ਜਾ ਰਿਹਾ ਹੈ।
ਬੈਂਕ ਦੀ ਮੁੱਖ ਖਜ਼ਾਨਚੀ ਸਾਰਾਹ ਜੌਹਨ, ਜਿਸ ਦੇ ਨੋਟਾਂ ਉੱਤੇ ਦਸਤਖਤ ਹਨ, ਨੇ ਕਿਹਾ ਕਿ ਬਹੁਤੇ ਕਾਗਜ਼ੀ ਬੈਂਕ ਨੋਟ ਮਾਰਕੀਟ ਤੋਂ ਬਾਹਰ ਕਰ ਦਿੱਤੇ ਗਏ ਹਨ, ਪਰ ਇੱਕ ਮਹੱਤਵਪੂਰਨ ਗਿਣਤੀ ਅਜੇ ਚੱਲਦੀ ਹੈ। ਕਲਾਈਡਸਡੇਲ ਬੈਂਕ, ਰਾਇਲ ਬੈਂਕ ਆਫ਼ ਸਕਾਟਲੈਂਡ ਅਤੇ ਬੈਂਕ ਆਫ਼ ਸਕਾਟਲੈਂਡ ਵੱਲੋਂ ਜਾਰੀ ਕੀਤੇ 20 ਪੌਂਡ ਅਤੇ 50 ਪੌਂਡ ਦੇ ਕਾਗਜ਼ੀ ਨੋਟ ਵੀ ਉਸੇ ਮਿਤੀ ਨੂੰ ਵਾਪਸ ਲਏ ਜਾਣਗੇ। ਉਤਰੀ ਆਇਰਲੈਂਡ ਵਿੱਚ ਬੈਂਕ ਆਫ ਆਇਰਲੈਂਡ, ਏ ਆਈ ਬੀ ਗਰੁੱਪ, ਡੈਨਸਕੇ ਬੈਂਕ ਅਤੇ ਅਲਸਟਰ ਬੈਂਕ ਵੱਲੋਂ ਜਾਰੀ ਕੀਤੇ 20 ਪੌਂਡ ਦੇ ਕਾਗਜ਼ੀ ਨੋਟ ਵੀ 30 ਸਤੰਬਰ ਤੋਂ ਬਾਅਦ ਵਾਪਸ ਲੈ ਲਏ ਜਾਣਗੇ ਅਤੇ ਫਿਰ ਜਿਨ੍ਹਾ ਕੋਲ ਹੋਏ, ਉਹ ਖਰਚ ਨਹੀਂ ਕਰ ਸਕਣਗੇ।