ਵਾਸ਼ਿੰਗਟਨ, 24 ਜੂਨ (ਪੋਸਟ ਬਿਊਰੋ)- ਪ੍ਰਸਿੱਧ ਭਾਰਤੀ ਅਮਰੀਕੀ ਕਾਨੂੰਨੀ ਮਾਹਿਰ ਅੰਜਲੀ ਚਤੁਰਵੇਦੀ ਨੂੰ ਅਮਰੀਕੀ ਰਾਸ਼ਟਰਪਤੀ ਜੋਅ ਬਾਇਡੇਨ ਨੇ ਅਮਰੀਕੀ ਵੈਟਰਨ ਮਾਮਲਿਆਂ ਦੇ ਵਿਭਾਗ ਦਾ ਜਨਰਲ ਕੌਂਸਲ ਲਾਇਆ ਹੈ। ਅਮਰੀਕੀ ਪ੍ਰਸ਼ਾਸਨ ਵਿੱਚ ਭਾਰਤੀ ਭਾਈਚਾਰੇ ਦੇ ਲੋਕਾਂ ਨੂੰ ਅਹਿਮ ਅਹੁਦਾ ਮਿਲਣ ਦਾ ਇਹ ਨਵਾਂ ਮਾਮਲਾ ਹੈ।

ਵ੍ਹਾਈਟ ਹਾਊਸ ਦੀ ਵੈਬਸਾਈਟ ਮੁਤਾਬਕ ਅੰਜਲੀ ਚਤੁਰਵੇਦੀ ਅਮਰੀਕੀ ਜਸਟਿਸ ਡਿਪਾਰਟਮੈਂਟ `ਚ ਕ੍ਰਿਮੀਨਲ ਡਵੀਜ਼ਨ ਜਨਰਲ ਵਜੋਂ ਕੰਮ ਕਰਦੀ ਹੈ। ਅਮਰੀਕੀ ਵੈਟਰਨ ਮਾਮਲਿਆਂ ਦੇ ਵਿਭਾਗ ਵਿੱਚ ਜਨਰਲ ਕੌਂਸਲ ਨਾਮਜ਼ਦ ਅੰਜਲੀ ਦੇ ਨਵੇਂ ਵਿਭਾਗ ਦਾ ਮਕਸਦ ਵੈਟਰਨ ਲੋਕਾਂ ਨੂੰ ਮਿਲਦੇ ਵਿਸ਼ਵ ਪੱਧਰੀ ਲਾਭ ਤੇ ਸੇਵਾਵਾਂ ਦੇਣਾ ਹੈ। ਨਿਊ ਯਾਰਕ ਦੇ ਕੋਰਟਲੈਂਡ ਵਿੱਚ ਪੈਦਾ ਹੋਈ ਅੰਜਲੀ ਨੇ ਜਾਰਜਟਾਊਨ ਯੂਨੀਵਰਸਿਟੀ ਲਾਅ ਸਕੂਲ ਤੋਂ ਗ੍ਰੈਜੂਏਸ਼ਨ ਕੀਤੀ ਹੈ। ਉਹ ਸਿਖਲਾਈ ਪ੍ਰਾਪਤ ਯੋਗ ਦੀ ਅਧਿਆਪਕਾ ਅਤੇ ਲੀਡਰਸ਼ਿਪ ਕੋਚ ਹੈ। ਉਹ ਆਪਣੇ ਪਤੀ ਅਤੇ ਬੇਟੇ ਨਾਲ ਚੇਵੀ ਚੇਜ ਵਿੱਚ ਰਹਿੰਦੀ ਹੈ। ਅੰਜਲੀ ਨੇ ਅੱਜ ਤਕ ਆਪਣੇ ਕੈਰੀਅਰ ਵਿੱਚ ਸਰਕਾਰ ਦੀਆਂ ਸਾਰੀਆਂ ਤਿੰਨੇ ਸ਼ਾਖਾਵਾਂ ਵਿੱਚ ਕੰਮ ਕੀਤਾ ਹੈ ਅਤੇ ਨਿੱਜੀ ਖੇਤਰ ਵਿੱਚ ਵੀ ਵਕਾਲਤ ਕੀਤੀ ਹੈ। ਸਰਕਾਰੀ ਸੇਵਾ ਵਿੱਚ ਪਰਤਣ ਤੋਂ ਪਹਿਲਾਂ ਚਤੁਰਵੇਦੀ ਨੇ ਇੱਕ ਵਿਸ਼ਵ ਪੱਧਰੀ ਜਾਂਚ ਟੀਮ ਨਾਲ ਕੰਮ ਕੀਤਾ ਸੀ। ਨਾਰਥਰੋਪ ਗਰੁੱਪਮੈਨ ਕਾਰਪੋਰੇਸ਼ਨ ਲਈ ਸਹਾਇਕ ਜਨਰਲ ਕੌਂਸਲ ਅਤੇ ਜਾਂਚ ਡਾਇਰੈਕਟਰ ਵਜੋਂ ਦੀ ਕੰਮ ਕੀਤਾ। ਉਹ ਪਹਿਲਾਂ ਬ੍ਰਿਟਿਸ਼ ਪੈਟਰੋਲੀਅਮ ਵਿੱਚ ਸਹਾਇਕ ਜਨਰਲ ਕੌਂਸਲ ਤੇ ਵਾਸ਼ਿੰਗਟਨ ਡੀ ਸੀ ਦੀ ਲਾਅ ਫਰਮ ਨਿਕਸਨ ਪੀਬਾਡੀ ਵਿੱਚ ਭਾਈਵਾਲ ਸੀ।