ਕਰਨਾਲ, 24 ਜੂਨ (ਪੋਸਟ ਬਿਊਰੋ)- ਸੋਨੀਪਤ ਵਿੱਚ ਹਾਦਸੇ ਦੌਰਾਨ ਇੱਕ ਕਾਰ ਵਿੱਚ ਸਵਾਰ ਤਿੰਨ ਐਮ ਬੀ ਬੀ ਐਸ ਵਿਦਿਆਰਥੀ ਜਿਊਂਦੇ ਸੜ ਗਏ ਅਤੇ ਤਿੰਨ ਹੋਰ ਵਿਦਿਆਰਥੀ ਬੁਰੀ ਤਰ੍ਹਾਂ ਝੁਲਸ ਗਏ।
ਇਸ ਬਾਰੇ ਪੁਲਸ ਬੁਲਾਰੇ ਨੇ ਦੱਸਿਆ ਹੈ ਕਿ ਨਾਰਨੌਲ ਵਾਸੀ ਪੁਲਕਿਤ ਅਤੇ ਨਰਬੀਰ, ਰੇਵਾੜੀ ਵਾਸੀ ਸੰਦੇਸ਼, ਗੁਰੂਗਰਾਮ ਵਾਸੀ ਰੋਹਿਤ, ਰੋਹਤਕ ਵਾਸੀ ਅੰਕਿਤ, ਕਲਾਨੌਰ ਵਾਸੀ ਸੋਮਬੀਰ ਪੀ ਜੀ ਆਈ ਰੋਹਤਕ ਵਿੱਚ ਐਮ ਬੀ ਬੀ ਐਸ ਕਰ ਰਹੇ ਹਨ। ਉਹ ਕੱਲ੍ਹ ਸਵੇਰੇ ਆਈ20 ਕਾਰ ਵਿੱਚ ਰੋਹਤਕ ਤੋਂ ਹਰਿਦੁਆਰ ਲਈ ਚੱਲੇ ਸਨ। ਜਦੋਂ ਉਨ੍ਹਾਂ ਦੀ ਕਾਰ ਬਹਿਲਗੜ੍ਹ ਪੁਲ ਨੇੜੇ ਪੁੱਜੀ ਤਾਂ ਕਾਰ ਚਾਲਕ ਨੂੰ ਸੜਕ ਉੱਤੇ ਬੈਰੀਕੇਡ ਨਜ਼ਰ ਨਹੀਂ ਆਏ ਤੇ ਤੇਜ਼ ਰਫਤਾਰ ਕਾਰ ਬੈਰੀਕੇਡ ਨਾਲ ਟਕਰਾ ਗਈ। ਇਸ ਨਾਲ ਕਾਰ ਨੂੰ ਅੱਗ ਲੱਗ ਗਈ ਅਤੇ ਵਿਦਿਆਰਥੀ ਬਾਹਰ ਨਾ ਨਿਕਲ ਸਕੇ।
ਸਵੇਰ ਦਾ ਸਮਾਂ ਹੋਣ ਕਾਰਨ ਸੜਕ ਉੱਤੇ ਆਵਾਜਾਈ ਘੱਟ ਸੀ ਤੇ ਕਾਰ ਵਿੱਚ ਫਸੇ ਵਿਦਿਆਰਥੀਆਂ ਨੂੰ ਤੁਰੰਤ ਮਦਦ ਨਹੀਂ ਮਿਲ ਸਕੀ। ਕੁਝ ਦੇਰ ਬਾਅਦ ਉਥੋਂ ਲੰਘਦੇ ਲੋਕਾਂਨੇ ਬਚਾਅ ਕਾਰਜ ਸ਼ੁਰੂ ਕੀਤਾ। ਉਦੋਂ ਤਕ ਕਾਰ ਵਿੱਚ ਸਵਾਰ ਤਿੰਨ ਵਿਦਿਆਰਥੀ ਪੁਲਕਿਤ, ਸੰਦੇਸ਼ ਤੇ ਰੋਹਿਤ ਦੀ ਸੜਨ ਕਾਰਨ ਮੌਤ ਹੋ ਚੁੱਕੀ ਸੀ, ਪਰ ਤਿੰਨ ਵਿਦਿਆਰਥੀ ਅੰਕਿਤ, ਸੋਮਬੀਰ ਅਤੇ ਨਰਬੀਰ ਨੂੰ ਕੱਢ ਲਿਆ, ਜੋ ਬੁਰੀ ਤਰ੍ਹਾਂ ਝੁਲਸ ਗਏ। ਉਨ੍ਹਾਂ ਨੂੰ ਪੀ ਜੀ ਆਈ ਰੋਹਤਕ ਦਾਖਲ ਕਰਵਾਇਆ ਗਿਆ ਹੈ। ਪਿੰਡ ਰਾਏ ਨੇੜੇ ਐਨ ਐਚ 334 ਬੀ ਦੇ ਫਲਾਈਓਵਰ ਨੂੰ ਪੱਥਰ ਦੇ ਬੈਰੀਕੇਡ ਲਾਕੇ ਬੰਦ ਕਰ ਦਿੱਤਾ ਗਿਆ ਹੈ, ਪਰ ਫਲਾਈਓਵਰ ਦੇ ਹੇਠੋਂ ਅੱਗੇ ਇੱਕ ਰਸਤਾ ਹੈ। ਕਾਰ ਵਿੱਚ ਸਵਾਰ ਵਿਦਿਆਰਥੀਆਂ ਨੂੰ ਸੜਕ ਬੰਦ ਹੋਣ ਦਾ ਪਤਾ ਨਹੀਂ ਸੀ। ਅਚਾਨਕ ਉਨ੍ਹਾਂ ਦੀ ਕਾਰ ਸੜਕ ਉੱਤੇ ਰੱਖੇ ਬੈਰੀਗੇਡ ਨਾਲ ਟਕਰਾ ਗਈ।