ਨਵੀਂ ਦਿੱਲੀ, 24 ਜੂਨ (ਪੋਸਟ ਬਿਊਰੋ)- ਅਪ੍ਰੈਲ ਦੇ ਬਾਅਦ ਤੋਂ ਭਾਰਤ ਦਾ ਰੂਸ ਤੋਂ ਤੇਲ ਇੰਪੋਰਟ ਪੰਜਾਹ ਗੁਣਾ ਵਧ ਗਿਆ ਹੈ। ਇੱਕ ਸੀਨੀਅਰ ਅਧਿਕਾਰੀ ਅਨੁਸਾਰ ਭਾਰਤ ਦੇ ਕੁੱਲ ਕੱਚਾ ਤੇਲ ਇੰਪੋਰਟ ਵਿੱਚ ਰੂਸ ਦੀ ਜ਼ਿੰਮੇਵਾਰੀ ਵਧ ਕੇ 10 ਫੀਸਦੀ ਉੱਤੇ ਪਹੁੰਚ ਗਈ ਹੈ। ਯੂਕਰੇਨ ਜੰਗ ਤੋਂ ਪਹਿਲਾਂ ਕੁੱਲ ਤੇਲ ਇੰਪੋਰਟ ਵਿੱਚ ਰੂਸ ਦਾ ਹਿੱਸਾ 0.2 ਫੀਸਦੀ ਸੀ। ਅਧਿਕਾਰੀ ਦੱਸਿਆ ਕਿ ਰੂਸ, ਭਾਰਤ ਦੇ ਸਿਖਰਲੇ 10 ਤੇਲ ਸਪਲਾਇਰਾਂ ਵਿੱਚ ਸ਼ਾਮਲ ਹੋ ਗਿਆ ਹੈ।
ਵਰਨਣ ਯੋਗ ਹੈ ਕਿ ਰੂਸੀ ਤੇਲ ਖਰੀਦਣ ਵਿੱਚ ਕਰੀਬ ਚਾਲੀ ਫੀਸਦੀ ਹਿੱਸਾ ਪ੍ਰਾਈਵੇਟ ਕੰਪਨੀਆਂਰਿਲਾਇੰਸ ਇੰਡਸਟਰੀਜ਼ ਅਤੇ ਰੋਸਨੈਫਟ ਦੀ ਨਾਇਰਾ ਐਨਰਜੀ ਦਾ ਹੈ। ਪਿਛਲੇ ਮਹੀਨੇ ਰੂਸ ਨੇ ਭਾਰਤ ਨੂੰ ਤੇਲ ਐਕਸਪੋਰਟ ਦੇ ਮਾਮਲੇ ਵਿੱਚ ਸਾਊਦੀ ਅਰਬ ਨੂੰ ਪਛਾੜ ਦਿੱਤਾ ਅਤੇ ਦੂਸਰਾ ਸਭ ਤੋਂ ਵੱਡਾ ਸਪਲਾਇਰ ਦੇਸ਼ ਬਣ ਗਿਆ ਸੀ। ਇਰਾਕ ਭਾਰਤ ਦਾ ਸਭ ਤੋਂ ਵੱਡਾ ਤੇਲ ਸਪਲਾਈ ਕਰਨ ਵਾਲਾ ਦੇਸ਼ ਹੈ। ਯੂਕਰੇਨ ਨਾਲ ਜੰਗ ਦੇ ਕਾਰਨ ਰੂਸ ਵੱਡੀ ਛੋਟ ਉੱਤੇ ਭਾਰਤ ਨੂੰ ਤੇਲ ਵੇਚ ਰਿਹਾ ਹੈ। ਮਈ ਵਿੱਚ ਭਾਰਤੀ ਕੰਪਨੀਆਂ ਨੇ ਰੂਸ ਤੋਂ 2.5 ਕਰੋੜ ਬੈਰਲ ਤੇਲ ਦੀ ਖਰੀਦ ਕੀਤੀ ਸੀ।
ਭਾਰਤ ਦੁਨੀਆ ਦਾ ਤੀਸਰਾ ਸਭ ਤੋਂ ਵੱਡਾ ਤੇਲ ਇੰਪੋਰਟਰ ਅਤੇ ਯੂਜ਼ਰ ਦੇਸ਼ ਹੈ ਅਤੇ ਆਪਣੀ ਲੋੜ ਦਾ ਕਰੀਬ 85 ਫੀਸਦੀ ਤੇਲ ਇੰਪੋਰਟ ਕਰਦਾ ਹੈ। ਯੂਕਰੇਨ ਉੱਤੇ ਹਮਲੇ ਦੇ ਐਲਾਨ ਦੇ ਬਾਅਦ ਤੋਂ ਭਾਰਤ ਤੇਲ ਦੀ ਖਰੀਦ ਬਾਰੇ ਲਗਾਤਾਰ ਰੂਸ ਦਾ ਬਚਾਅ ਕਰ ਰਿਹਾ ਹੈ। ਪਿਛਲੇ ਮਹੀਨੇ ਤੇਲ ਮੰਤਰਾਲੇ ਨੇ ਕਿਹਾ ਸੀ ਕਿ ਕੁੱਲ ਖਪਤ ਦੇ ਮੁਕਾਬਲੇ ਰੂਸ ਤੋਂ ਊਰਜਾ ਉਤਪਾਦਾਂ ਦੀ ਖਰੀਦਾਰੀ ਕਾਫੀ ਘੱਟ ਹੈ।