ਕਲਾਕਾਰ ਨੂੰ ਜੇ ਆਪਣੀ ਪਸੰਦੀਦਾ ਚੀਜ਼ਾਂ ਕੈਮਰੇ ਸਾਹਮਣੇ ਕੰਮ ਦੇ ਤੌਰ ਉੱਤੇ ਕਰਨ ਨੂੰ ਮਿਲਣ ਤਾਂ ਉਤਸ਼ਾਹ ਵਧ ਜਾਂਦਾ ਹੈ। ਫਿਲਮ ‘ਮਿਰਜ਼ਿਆ’ ਦੀ ਅਭਿਨੇਤਰੀ ਸਿਆਮੀ ਖੇਰ ਐਕਟਿੰਗ ਦੇ ਨਾਲ ਕ੍ਰਿਕਟ ਵਿੱਚ ਕਾਫੀ ਦਿਲਚਸਪੀ ਰੱਖਦੀ ਹੈ। ਆਰ ਬਾਲਕੀ ਦੇ ਨਿਰਦੇਸ਼ਨ ਵਿੱਚ ਬਣ ਰਹੀ ਅਗਲੀ ਫਿਲਮ ‘ਘੂਮਰ’ ਵਿੱਚ ਉਹ ਕ੍ਰਿਕਟਰ ਬਣੇਗੀ। ਉਸਦੇ ਨਾਲ ਅਭਿਸ਼ੇਕ ਬੱਚਨ ਮੁੱਖ ਭੂਮਿਕਾ ਵਿੱਚ ਹੋਣਗੇ। ਇਹ ਫਿਲਮ ਅਸਲ ਅਥਲੀਟ ਦੇ ਜੀਵਨ ਤੋਂ ਪ੍ਰੇਰਿਤ ਹੈ। ਇਸ ਬਾਰੇ ਵਿੱਚ ਗੱਲਬਾਤ ਦੌਰਾਨ ਸਿਆਮੀ ਨੇ ਦੱਸਿਆ, ‘ਸਾਡੀ ਫਿਲਮ ਕੋਈ ਬਾਇਓਪਿਕ ਨਹੀਂ, ਇਹ ਓਲੰਪਿਕਸ ਖੇਡਾਂ ਵਿੱਚ ਦੋ ਸੋਨ ਤਮਗੇ ਜਿੱਤ ਚੁੱਕੀ ਹੰਗਰੀ ਦੇ ਸ਼ੂਟਰ ਕਰੋਲੀ ਤਾਕਾਸ ਦੇ ਜੀਵਨ ਤੋਂ ਪ੍ਰੇਰਤ ਹੈ। ਸਾਡੀ ਫਿਲਮ ਭਾਵੇ ਇੱਕ ਅਥਲੀਟ ਦੇ ਜੀਵਨ ਤੋਂ ਪ੍ਰੇਰਿਤ ਹੈ, ਪਰ ਇਹ ਪੂਰੀ ਤਰ੍ਹਾਂ ਓਰੀਜਨਲ ਕਹਾਣੀ ਹੈ।’
ਕਿਰਦਾਰ ਦੀ ਤਿਆਰੀ ਬਾਰੇ ਸਿਆਮੀ ਦਾ ਕਹਿਣਾ ਹੈ, ‘‘ਮੈਂ ਸਕੂਲ ਦੇ ਦਿਨਾਂ ਤੋਂ ਕ੍ਰਿਕਟ ਖੇਡਦੀ ਆਈ ਹਾਂ ਅਤੇ ਮੈਂ ਪੇਸ਼ੇਵਰ ਤੌਰ ਵੀ ਕ੍ਰਿਕਟ ਖੇਡੀ ਹੈ। ਇਸ ਲਈ ਇਸ ਕਿਰਦਾਰ ਦੀ ਤਿਆਰੀ ਮੇਰੇ ਲਈ ਮਜ਼ੇਦਾਰ ਰਹੀ। ਹਰ ਦਿਨ ਸਵੇਰੇ ਉਠਣਾ ਅਤੇ ਫਿਲਮ ਦੀ ਤਿਆਰੀ ਲਈ ਕ੍ਰਿਕਟ ਖੇਡਣਾ ਮੇਰੇ ਲਈ ਇੱਕ ਸੁਫਨੇ ਦੀ ਤਰ੍ਹਾਂ ਸੀ। ਜਦ ਮੈਂ ਅਸ਼ਵਨੀ ਅਈਅਰ ਤਿਵਾੜੀ ਦੀ ਵੈਬ ਸੀਰੀਜ਼ ‘ਫਾਡੂ’ ਦੀ ਸ਼ੂਟਿੰਗ ਕਰ ਰਹੀ ਸੀ, ਤਦ ਵੀ ਮੈਂ ਕ੍ਰਿਕਟ ਦੀ ਪ੍ਰੈਕਟਿਸ ਨਹੀਂ ਛੱਡੀ ਸੀ। ਕਈ ਮਸ਼ਹੂਰ ਕ੍ਰਿਕਟਰ ਮੇਰੇ ਦੋਸਤ ਹਨ, ਇਸ ਕਿਰਦਾਰ ਲਈ ਮੈਂ ਉਨ੍ਹਾਂ ਤੋਂ ਵੀ ਸਲਾਹ ਲਈ। ਸਾਬਕਾ ਕ੍ਰਿਕਟਰ ਮੁਰਲੀ ਕਾਰਤਿਕ ਨੇ ਮੈਨੂੰ ਆਪਣੀ ਤਕਨੀਕ ਵਿੱਚ ਕੁਝ ਬਦਾਲਅ ਕਰਨ ਵਿੱਚ ਮਦਦ ਕੀਤੀ।”