ਬਾਲੀਵੁੱਡ ਵਿੱਚ ਕੁਝ ਫਿਲਮਾਂ ਕਰਨ ਪਿੱਛੋਂ ਨਰਗਿਸ ਫਾਖਰੀ ਨੇ ਇੱਕ ਬ੍ਰੇਕ ਲਿਆ। ਇਸ ਤੋਂ ਬਾਅਦ ਅਮਰੀਕਾ ਅਤੇ ਕੈਨੇਡਾ ਵਿੱਚ ਲੰਬਾ ਸਮਾਂ ਬਿਤਾਉਣ ਤੋਂ ਬਾਅਦ ਉਹ ਫਿਰ ਬਾਲੀਵੁੱਡ ਵਿੱਚ ਨਜ਼ਰ ਆਉਣ ਵਾਲੀ ਹੈ। ਨਰਗਿਸ ਐਕਟਿੰਗ ਪ੍ਰਤੀ ਗੰਭੀਰ ਹੈ ਤੇ ਉਸ ਦੀਆਂ ਨਜ਼ਰਾਂ ਖਾਸ ਤੌਰ ਉੱਤੇ ਵੈਬ ਸਪੇਸ ਭਾਵ ਓ ਟੀ ਟੀ ਉੱਤੇ ਲੱਗੀਆਂ ਹੋਈਆਂ ਹਨ। ਨਰਗਿਸ ਕਹਿੰਦੀ ਹੈ ਕਿ ਸਿਨੇਮਾ ਅਤੇ ਟੀ ਵੀ ਤਾਂ ਠੀਕ ਹੈ, ਪਰ ਪਿਛਲੇ ਕੁਝ ਸਾਲਾਂ ਵਿੱਚ ਓ ਟੀ ਟੀ ਪਲੇਟਫਾਰਮ ਮਨੋਰੰਜਨ ਦਾ ਮਜ਼ਬੂਤ ਮਾਧਿਅਮ ਬਣ ਕੇ ਉਭਰਿਆ ਹੈ।ਇਹੀ ਕਾਰਨ ਹੈ ਕਿ ਅੱਜ ਇੱਥੇ ਚੰਗੇ ਕੰਟੈਂਟ ਦੀ ਭਰਮਾਰ ਹੈ। ਇਸ ਦਾ ਨਤੀਜਾ ਇਹ ਹੋਇਆ ਹੈ ਕਿ ਹੁਣ ਸਿਤਾਰਿਆਂ ਲਈ ਜ਼ਿਆਦਾ ਬਦਲ ਉਪਲਬਧ ਹਨ। ਇੱਕ ਜ਼ਮਾਨੇ ਵਿੱਚ ਜਦੋਂ ਸਿਰਫ ਫਿਲਮਾਂ ਦਾ ਦੌਰ ਸੀ ਤਾਂ ਬਦਲ ਸੀਮਿਤ ਹੁੰਦੇ ਸਨ।
ਨਰਗਿਸ ਫਾਖਰੀਕਹਿੰਦੀ ਹੈ, ‘‘ਮੈਨੂੰ ਵੈੱਬ ਉੱਤੇ ਚੰਗੇ ਆਫਰ ਦੀ ਉਡੀਕ ਹੈ। ਜਦੋਂ ਮੈਂ ਅਮਰੀਕਾ ਵਿੱਚ ਸੀ ਤਾਂ ਮੈਂ ਸੁਣਿਆ ਸੀ ਕਿ ਬਾਲੀਵੁੱਡ ਦਾ ਓ ਟੀ ਟੀ ਸੈਕਟਰ ਕਾਫੀ ਵਿਕਾਸ ਕਰ ਰਿਹਾ ਹੈ ਤੇ ਇੱਥੇ ਕਾਫੀ ਚੰਗੇ ਇੰਡੀਅਨ ਵੈਬ ਸ਼ੋਅ ਬਣ ਰਹੇ ਹਨ। ਚੰਗੀਆਂ ਕਹਾਣੀਆਂ ਲਿਖੀਆਂ ਜਾ ਰਹੀਆਂ ਹਨ ਤਾਂ ਇਨ੍ਹਾਂ ਨੂੰ ਕਰਨ ਵਿੱਚ ਬੁਰਾਈ ਨਹੀਂ।” ਉਸ ਨੂੰ ਪੂਰੀ ਆਸ ਹੈ ਕਿ ਜਲਦੀ ਹੀ ਕੋਈ ਚੰਗਾ ਰੋਲ ਉਸ ਨੂੰ ਜ਼ਰੂਰ ਆਫਰ ਹੋਵੇਗਾ ਅਤੇ ਉਹ ਵੈੱਬ ਸੀਰੀਜ਼ ਵਿੱਚ ਨਜ਼ਰ ਆਏਗੀ। ਨਰਗਿਸ ਬਾਲੀਵੁੱਡ ਬਾਰੇ ਇਹ ਵੀ ਕਹਿੰਦੀ ਹੈ, ‘‘ਮੈਨੂੰ ਹਮੇਸ਼ਾ ਖੁਦ ਲਈ ਕੰਮ ਕਰਨਾ ਪਸੰਦ ਹੈ, ਪਰ ਮੈਨੂੰ ਅਹਿਸਾਸ ਹੈ ਕਿ ਮੈਂ ਬਹੁਤ ਵੱਡੀ ਮੂਰਖ ਸੀ, ਕਿਉਂਕਿ ਮੈਂ ਕਦੇ ਆਪਣੇ ਕੰਮ ਦਾ ਪ੍ਰਚਾਰ ਨਹੀਂ ਕੀਤਾ। ਹਰ ਕਿਸੇ ਦੇ ਪਿੱਛੇ ਅਸਲ ਵਿੱਚ ਵੱਡੀ ਟੀਮ ਹੁੰਦੀ ਹੈ, ਇੱਕ ਪੀ ਆਰ ਮਸ਼ੀਨ। ਮੈਨੂੰ ਅਹਿਸਾਸ ਹੋਇਆ ਕਿ ਮੈਂ ਬਹੁਤ ਸ਼ਰਮੀਲੀ ਸੀ।” ਉਸ ਦਾ ਕਹਿਣਾ ਹੈ ਕਿ ਭਾਰਤ ਵਿੱਚ ਹਾਲੀਵੁੱਡ ਦੀਆਂ ਫਿਲਮਾਂ ਵਿੱਚ ਕੰਮ ਕਰਨਾ ਬਹੁਤ ਵੱਡੀ ਗੱਲ ਹੈ। ਸਾਲ 2015 ਵਿੱਚ ਉਸ ਨੇ ਹਾਲੀਵੁੱਡ ਫਿਲਮ ‘ਸਪਾਈ' ਵਿੱਚ ਕੰਮ ਕੀਤਾ ਸੀ। ਉਸ ਨੇ ਇਸ ਬਾਰੇ ਬਹੁਤੀ ਗੱਲ ਨਹੀਂ ਕੀਤੀ ਸੀ। ਉਹ ਕਹਿੰਦੀ ਹੈ, ‘‘ਇਹ ਏ ਲਿਸਟ ਕਲਾਕਾਰਾਂ ਨਾਲ ਇੱਕ ਵੱਡੀ ਫਿਲਮ ਸੀ। ਇਸ ਦਾ ਪ੍ਰੀਮੀਅਰ ਇੱਕ ਵੱਡਾ ਰੈੱਡ ਕਾਰਪੈੱਟ ਈਵੈਂਟ ਸੀ, ਮੈਨੂੰ ਮੂਵੀ ਐਵਾਰਡਸ ਲਈ ਨਾਮਜ਼ਦ ਕੀਤਾ ਗਿਆ ਸੀ। ਇਹ ਛੋਟੀ ਨਹੀਂ, ਬਹੁਤ ਵੱਡੀ ਗੱਲ ਹੈ, ਪਰ ਮੈਂ ਕਦੇ ਇਨ੍ਹਾਂ ਚੀਜ਼ਾਂ ਬਾਰੇ ਗੱਲ ਨਹੀਂ ਕੀਤੀ। ਮੈਨੂੰ ਲੱਗਦਾ ਹੈ ਕਿ ਮੈਨੂੰ ਇਨ੍ਹਾਂ ਚੀਜ਼ਾਂ ਬਾਰੇ ਗੱਲ ਕਰਨੀ ਚਾਹੀਦੀ ਹੈ।”