ਪ੍ਰਕਾਸ਼ ਝਾਅ ਦੀ ਚਰਚਿਤ ਵੈੱਬ ਸੀਰੀਜ਼ ‘ਆਸ਼ਰਮ’ ਦਾ ਤੀਸਰਾ ਸੀਜ਼ਨ ਜਲਦੀ ਰਿਲੀਜ਼ ਹੋਣ ਵਾਲੀ ਹੈ। ਇਸ ਦੇ ਪਿਛਲੇ ਦੋਵੇਂ ਸੀਜ਼ਨ ਸੁਪਰਹਿੱਟ ਰਹੇ ਹਨ। ਇਸ ਵਿੱਚ ਪੰਮੀ ਨਾਂਅ ਦੀ ਪਹਿਲਵਾਨ ਦਾ ਰੋਲ ਕਰਨ ਵਾਲੀ ਅਦਿਤੀ ਪੋਹਨਕਰ ਨੇ ਕਮਾਲ ਦੀ ਐਕਟਿੰਗ ਕੀਤੀ ਹੈ। ਦੂਸਰੇ ਸੀਜ਼ਨ ਦੇ ਆਖਰੀ ਐਪੀਸੋਡ ਵਿੱਚ ਤਾਂ ਜਿਸ ਬਹਾਦਰੀ ਨਾਲ ਪਹਿਲਵਾਨ ਨੇ ਬਾਬਾ ਦੇ ਤਿੰਨ ਸ਼ੈਤਾਨਾਂ ਨੂੰ ਯਮਲੋਕ ਪਹੁੰਚਾਇਆ, ਉਸ ਨੇ ਦਰਸ਼ਕਾਂ ਨੂੰ ਦੀਵਾਨਾ ਬਣਾ ਦਿੱਤਾ।
ਅਦਿਤੀ ਕਹਿੰਦੀ ਹੈ, ‘‘ਦੁਨੀਆ ਦੇ ਵੱਖ ਵੱਖ ਹਿੱਸਿਆਂ ਵਿੱਚ ਪ੍ਰਸ਼ੰਸਕ ਹਨ, ਜੋ ‘ਆਸ਼ਰਮ 3’ ਦੀ ਉਡੀਕ ਕਰ ਰਹੇ ਹਨ। ‘ਆਸ਼ਰਮ’ ਦੇ ਪਹਿਲੇ ਦੋ ਸੀਜ਼ਨ ਦੇਖਣ ਲਈ ਮੇਰੇ ਮੈਸੇਜ ਬਾਕਸ ਦੁਨੀਆ ਭਰ ਵਿੱਚ ਫੈਲੇ ਮੇਰੇ ਪ੍ਰਸ਼ੰਸਕਾਂ ਦੇ ਸੰਦੇਸ਼ਾਂ ਨਾਲ ਭਰ ਗਏ ਕਿ ਉਹ ਮੇਰਾ ਨਵਾਂ ਸ਼ੋਅ ਕਿਵੇਂ ਦੇਖ ਸਕਦੇ ਹਨ? ਜਦੋਂ ਉਨ੍ਹਾਂ ਨੂੰ ਸ਼ੋਅ ਦਾ ਲਿੰਕ ਮਿਲਿਆ ਤਾਂ ਦੇਖਣ ਵਾਲਿਆਂ ਦੀ ਗਿਣਤੀ ਲਗਭਗ 1.6 ਬਿਲੀਅਨ ਤੱਕ ਪਹੁੰਚ ਗਈ। ਮੈਨੂੰ ਵਿਦੇਸ਼ਾਂ ਤੋਂ ਪ੍ਰਸ਼ੰਸਕਾਂ ਦੀ ਖੂਬ ਸ਼ਲਾਘਾ ਮਿਲੀ। ਜਦੋਂ ਮੈਂ ਇਸ ਲਈ ਆਡੀਸ਼ਨ ਦਿੱਤਾ ਤਾਂ ਸਿਰਫ ਇੰਨਾ ਪਤਾ ਸੀ ਕਿ ਇਸ ਨੂੰ ਪ੍ਰਕਾਸ਼ ਬਣਾ ਰਹੇ ਹਨ, ਜੋ ਫਿਲਮ ਦਾ ਨਿਰਮਾਣ, ਕਹਾਣੀ ਬਿਆਨ ਕਰਨ ਤੇ ਮਹਿਲਾ ਪ੍ਰਧਾਨ ਸਕ੍ਰਿਪਟ ਦੇ ਮਾਸਟਰ ਹਨ। ‘ਬਾਬੇ’ ਤੋਂ ਪੂਰੀ ਤਰ੍ਹਾਂ ਅਣਜਾਣ ਮੈਂ ਪੰਮੀ ਦੇ ਰੋਲ ਲਈ ਆਡੀਸ਼ਨ ਦਿੱਤਾ ਅਤੇ ਦਰਸ਼ਕਾਂ ਦੇ ਪਿਆਰ ਨਾਲ ਮੈਂ ਸਨਮਾਨਤ ਮਹਿਸੂਸ ਕਰ ਰਹੀ ਹਾਂ।” ਉਹ ਵੈੱਬ ਸੀਰੀਜ ‘ਸ਼ੀ’ ਦੇ ਦੂਸਰੇ ਸੀਜ਼ਨ ਵਿੱਚ ਵੀ ਨਜ਼ਰ ਆਉਣ ਵਾਲੀ ਹੈ।