ਨੋਇਡਾ, 23 ਮਈ (ਪੋਸਟ ਬਿਊਰੋ)- ਨੋਇਡਾ ਅਤੇ ਦਿੱਲੀ ਸਮੇਤ ਐਨ ਸੀ ਆਰ ਦੇ ਕਈ ਸ਼ਹਿਰਾਂ ਤੋਂ ਚਾਰ ਪਹੀਆ ਵਾਹਨਾਂ ਦੀ ਚੋਰੀ ਕਰ ਕੇ ਉਨ੍ਹਾਂ ਦਾ ਸਾਮਾਨ ਪੰਜਾਬ ਦੇ ਵੱਖ-ਵੱਖ ਸ਼ਹਿਰਾਂ ਵਿੱਚ ਵੇਚਣ ਵਾਲੇ ਗੈਂਗ ਦੇ ਦੋ ਮੈਂਬਰਾਂ ਨੂੰ ਕੱਲ੍ਹ ਫੇਜ਼-2 ਕੋਤਵਾਲੀ ਪੁਲਸ ਅਤੇ ਸਵਾਟ ਟੀਮ ਨੇ ਪੰਜਾਬ ਤੋਂ ਕਾਬੂ ਕੀਤਾ ਹੈ। ਦੋਸ਼ੀਆਂ ਦੀ ਪਛਾਣ ਦਿੱਲੀ ਦੇ ਵਿਨੋਦ ਮਹਿਰਾ ਅਤੇ ਅੰਮ੍ਰਿਤਸਰ ਦੇ ਜਸਵੀਰ ਵਜੌਂ ਹੋਈ ਹੈ। ਦੋਵਾਂ ਜਣਿਆਂ ਦੇ ਕੋਲੋਂ ਚੋਰੀ ਦੀ ਇੱਕ ਇਨੋਵਾ ਕਾਰ, ਦੋ ਲੱਖ ਰੁਪਏ ਨਕਦ, ਲੈਪਟਾਪ, ਵੱਖ-ਵੱਖ ਟੂਲ ਕਿੱਟ ਗ੍ਰਾਈਂਡਰ, ਡਰਿਲ ਮਸ਼ੀਨ, ਸ਼ੀਸ਼ਾ ਖੋਲ੍ਹਣ ਦੀ ਮਸ਼ੀਨ, ਦਰਜਨਾਂ ਨੰਬਰ ਪਲੇਟ ਸਮੇਤ ਗੱਡੀਆਂ ਨੂੰ ਕੱਟਣ ਦੇ ਜੰਤਰ ਬਰਾਮਦ ਹੋਏ ਹਨ।ਇਨ੍ਹਾਂ ਦੇ ਖਿਲਾਫ ਨੋਇਡਾ ਦੇ ਵੱਖ-ਵੱਖ ਥਾਣਿਆਂ ਸਮੇਤ ਦਿੱਲੀ ਦੇ ਵੀ ਕਈ ਥਾਣਿਆਂ ਵਿੱਚ ਕੇਸ ਦਰਜ ਹਨ।
ਪਤਾ ਲੱਗਾ ਹੈ ਕਿ ਵਿਨੋਦ ਮਹਿਰਾ ਦਿੱਲੀ ਅਤੇ ਐਨ ਸੀ ਆਰ ਤੋਂ ਵਾਹਨਾਂ ਦੀ ਚੋਰੀ ਕਰਵਾਉਂਦਾ ਅਤੇ ਉਸ ਨੂੰ ਅੰਮ੍ਰਿਤਸਰ ਵਾਲੇ ਜਸਵੀਰ ਨੂੰ ਇੱਕ ਲੱਖ ਰੁਪਏ ਦਾ ਵੇਚ ਦਿੰਦਾ ਹੈ। ਪੇਸ਼ੇ ਤੋਂ ਕਬਾੜੀਆ ਜਸਵੀਰ ਚੋਰੀ ਦੇ ਵਾਹਨਾਂ ਦੇ ਪੁਰਜੇ ਉਖਾੜ ਕੇ ਉਸ ਨੂੰ ਦੋ ਤੋਂ ਤਿੰਨ ਲੱਖ ਵਿੱਚ ਵੇਚ ਦਿੰਦਾ ਸੀ। ਜਸਵੀਰ ਅਤੇ ਵਿਨੋਦ ਦੀ ਮਿਲੀਭਗਤ ਨਾਲ ਦਿੱਲੀ ਅਤੇ ਐਨ ਸੀ ਆਰ ਤੋਂ ਸੈਂਕੜੇ ਵਾਹਨਾਂ ਦੀ ਚੋਰੀ ਹੋਈ ਹੈ। ਗਿਰੋਹ ਦੇ ਬਾਕੀ ਮੈਂਬਰਾਂ ਦੀ ਤਲਾਸ਼ ਵਿੱਚ ਪੁਲਸ ਟੀਮਾਂ ਪੰਜਾਬ ਸਮੇਤ ਹੋਰ ਟਿਕਾਣਿਆਂ ਉੱਤੇ ਛਾਪੇਮਾਰ ਰਹੀਆਂ ਹਨ। ਵਿਨੋਦ ਇਸ ਸਮੇਂ ਵਿਚ ਸੈਕਟਰ-34 ਦੀ ਓਮ ਡੇਅਰੀ ਦੇ ਨੇੜੇ ਰਹਿ ਰਿਹਾ ਹੈ ਅਤੇ ਇਥੋਂਗੈਂਗ ਚਲਾ ਰਿਹਾ ਸੀ। ਗੈਂਗ ਵਿੱਚ ਛੇ ਤੋਂ ਅੱਠ ਜਣਿਆਂ ਦੇ ਸ਼ਾਮਲ ਹੋਣ ਦੀ ਜਾਣਕਾਰੀ ਮਿਲੀ ਹੈ। ਦੋਵਾਂ ਦੋਸ਼ੀਆਂ ਨੂੰ ਅੰਮ੍ਰਿਤਸਰ ਸਥਿਤ ਗੋਲਡਨ ਗੇਟ ਦੇ ਨੇੜਿਓਂ ਕਾਬੂ ਕੀਤਾ ਗਿਆ ਹੈ।