ਟੋਰਾਂਟੋ, 19 ਮਈ (ਪੋਸਟ ਬਿਊਰੋ) : ਡਾਊਨਟਾਊਨ ਟੋਰਾਂਟੋ ਵਿੱਚ ਇੱਕ ਘਰ ਤੋਂ ਚੋਰੀ ਕੀਤੀ ਗਈ ਲੈਂਬੌਰਗਨੀ ਇਟੋਬੀਕੋ ਵਿੱਚ ਪਾਈ ਗਈ।
ਪੁਲਿਸ ਨੇ ਦੱਸਿਆ ਕਿ ਵੀਰਵਾਰ ਸਵੇਰ ਨੂੰ ਸਪੈਡਿਨਾ ਤੇ ਫੋਰਟ ਯੌਰਕ ਏਰੀਆ ਵਿੱਚ ਦੋ ਮਸ਼ਕੂਕ ਚੋਰੀ ਦੇ ਇਰਾਦੇ ਨਾਲ ਇੱਕ ਕੌਂਡੋ ਵਿੱਚ ਦਾਖਲ ਹੋਏ ਤੇ ਇਸ ਘਰ ਤੋਂ ਲੈਂਬੌਰਗਨੀ ਚੋਰੀ ਹੋ ਗਈ। ਪੁਲਿਸ ਅਧਿਕਾਰੀਆਂ ਨੇ ਗੱਡੀ ਨੂੰ ਟਰੈਕ ਕੀਤਾ ਤਾਂ ਉਹ ਇਟੋਬੀਕੋ ਵਿੱਚ ਇਸਲਿੰਗਟਨ ਐਵਨਿਊ ਤੇ ਐਗਲਿੰਟਨ ਐਵਨਿਊ ਨੇੜੇ ਮਿਲੀ। ਉਨ੍ਹਾਂ ਨੂੰ ਇਹ ਗੱਡੀ ਸਮਿਟਕ੍ਰੈਸਟ ਡਰਾਈਵ ਦੇ ਇੱਕ ਘਰ ਦੇ ਬਾਹਰ ਪਾਰਕ ਕੀਤੀ ਮਿਲੀ।
ਇੱਕ ਮਸ਼ਕੂਕ ਨੂੰ ਹਿਰਾਸਤ ਵਿੱਚ ਲੈ ਲਿਆ ਗਿਆ ਹੈ ਤੇ ਦੂਜਾ ਮਸ਼ਕੂਕ ਫਰਾਰ ਹੈ। ਟੋਰਾਂਟੋ ਪੁਲਿਸ ਦੂਜੇ ਮਸ਼ਕੂਕ ਨੂੰ ਲੱਭਣ ਲਈ ਸੂਹੀਆਂ ਕੁੱਤਿਆਂ ਨੂੰ ਵੀ ਲਿਆਈ ਪਰ ਕੋਈ ਸਫਲਤਾ ਹਾਸਲ ਨਹੀਂ ਹੋਈ। ਪੁਲਿਸ ਨੇ ਦੱਸਿਆ ਕਿ ਜਿਸ ਘਰ ਵਿੱਚ ਚੋਰੀ ਕੀਤੀ ਗਈ ਸੀ ਉੱਥੇ ਰਹਿਣ ਵਾਲਾ ਵਿਅਕਤੀ ਸਹੀ ਸਲਾਮਤ ਹੈ ਤੇ ਉਹ ਇਟੋਬੀਕੋ ਦੀ ਲੋਕੇਸ਼ਨ ਉੱਤੇ ਪੁਲਿਸ ਅਧਿਕਾਰੀਆਂ ਨਾਲ ਸੀ।ਪੁਲਿਸ ਨੇ ਇਸ ਗੱਲ ਦੀ ਪੁਸ਼ਟੀ ਨਹੀਂ ਕੀਤੀ ਕਿ ਜਿਸ ਸਮੇਂ ਕਾਰ ਚੋਰੀ ਹੋਈ ਤਾਂ ਉਸ ਸਮੇਂ ਕਾਰ ਦਾ ਮਾਲਕ ਵੀ ਉਸ ਵਿੱਚ ਮੌਜੂਦ ਸੀ।
ਓਪੀਪੀ ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।