ਵਾਟਰਲੂ, 16 ਮਈ (ਪੋਸਟ ਬਿਊਰੋ) : ਵੀਕੈਂਡ ਉੱਤੇ ਕੈਂਬ੍ਰਿਜ ਵਿੱਚ ਮ੍ਰਿਤਕ ਪਾਏ ਗਏ 8 ਸਾਲਾ ਬੱਚੇ ਦੀ ਮੌਤ ਦੀ ਜਾਂਚ ਦਰਮਿਆਨ ਵਾਟਰਲੂ ਪੁਲਿਸ ਵੱਲੋਂ ਇੱਕ ਲਾਪਤਾ ਵਿਅਕਤੀ ਦੀ ਭਾਲ ਵੀ ਕੀਤੀ ਜਾ ਰਹੀ ਹੈ।
ਵਾਟਰਲੂ ਰੀਜਨਲ ਪੁਲਿਸ ਸਰਵਿਸ ਦਾ ਕਹਿਣਾ ਹੈ ਕਿ ਸ਼ਨਿੱਚਰਵਾਰ ਨੂੰ ਪੁਲਿਸ ਅਧਿਕਾਰੀਆਂ ਨੂੰ ਸਵੇਰੇ 10:00 ਵਜੇ ਇੱਕ ਘਰ ਵਿੱਚ ਸੱਦਿਆ ਗਿਆ। ਮੌਕੇ ਉੱਤੇ ਉਨ੍ਹਾਂ ਨੂੰ ਇੱਕ 8 ਸਾਲਾ ਬੱਚਾ ਮ੍ਰਿਤਕ ਮਿਲਿਆ। ਬੱਚੇ ਦੀ ਮੌਤ ਦੇ ਕਾਰਨਾਂ ਦਾ ਪਤਾ ਨਹੀਂ ਲੱਗ ਸਕਿਆ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ 41 ਸਾਲਾ ਕਰਟਿਸ ਹੈਸਲਿੰਕ, ਜੋ ਕਿ ਕੈਂਬ੍ਰਿਜ ਵਿੱਚ ਹੀ ਰਹਿੰਦਾ ਸੀ, ਤੇ ਬੱਚੇ ਦਾ ਜਾਣਕਾਰ ਸੀ, ਉਹ ਲਾਪਤਾ ਹੈ। ਪੁਲਿਸ ਨੇ ਦੱਸਿਆ ਕਿ ਉਸ ਦੀ ਸੇਫਟੀ ਸਬੰਧੀ ਘਰਦਿਆਂ ਨੂੰ ਚਿੰਤਾ ਹੋ ਰਹੀ ਹੈ। ਬੱਚੇ ਨਾਲ ਉਸ ਦਾ ਕੀ ਸਬੰਧ ਸੀ ਇਸ ਬਾਰੇ ਵੀ ਕੋਈ ਸਪਸ਼ਟ ਜਾਣਕਾਰੀ ਹਾਸਲ ਨਹੀਂ ਹੋਈ ਹੈ।
ਉਸ ਦਾ ਕੱਦ 5 ਫੁੱਟ 11 ਼ਿੲੰਚ, ਅੱਖਾਂ ਦਾ ਰੰਗ ਨੀਲਾ, ਦਰਮਿਆਨੀ ਕੱਦਕਾਠੀ, ਨਿੱਕੇ ਭੂਰੇ ਵਾਲ ਹਨ। ਹੈਸਲਿੰਕ ਨੂੰ ਆਖਰੀ ਵਾਰੀ ਖਾਖੀ ਪੈਂਟ ਤੇ ਨੀਲੀ ਜਾਂ ਕਾਲੇ ਰੰਗ ਦੀ ਫੌਜੀ ਸਟਾਈਲ ਬਕੇਟ ਹੈਟ ਪਾਇਆਂ ਵੇਖਿਆ ਗਿਆ। ਜਾਂਚਕਾਰਾਂ ਵੱਲੋਂ ਜਨਤਾ ਨੂੰ ਅਪੀਲ ਕੀਤੀ ਗਈ ਹੈ ਕਿ ਜੇ ਹੈਸਲਿੰਕ ਨਜ਼ਰ ਆਵੇ ਤਾਂ ਉਸ ਤੱਕ ਪਹੁੰਚ ਨਾ ਕੀਤੀ ਜਾਵੇ ਤੇ ਫੌਰੀ ਤੌਰ ਉੱਤੇ 911 ਉੱਤੇ ਕਾਲ ਕੀਤੀ ਜਾਵੇ। ਪੁਲਿਸ ਕੈਂਬ੍ਰਿਜ ਵਿੱਚ ਟਾਊਨਲਾਈਨ ਰੋਡ ਤੇ ਰਿਵਰ ਰੋਡ ਇਲਾਕੇ ਵਿੱਚ ਹੈਸਲਿੰਕ ਦੀ ਭਾਲ ਕਰ ਰਹੀ ਹੈ।