ਨਵੀਂ ਦਿੱਲੀ, 16 ਮਈ (ਪੋਸਟ ਬਿਊਰੋ)- ਕਾਂਗਰਸ ਨੇ ਉਦੈਪੁਰ ਚਿੰਤਨ ਕੈਂਪ ਵਿੱਚ ਤਿੰਨ ਦਿਨ ਮੰਥਨ ਪਿੱਛੋਂ ਸੰਗਠਨ ਵਿੱਚ ਅਹਿਮ ਸੁਧਾਰ, ਜਨਤਾ ਨਾਲ ਜੋੜ ਤੇ ਸੜਕਾਂ ਉੱਤੇ ਸੰਘਰਸ਼ ਦੇ ਮੂਲ ਮੰਤਰ ਦਾ ਸੰਕਲਪ ਲੈਂਦਿਆਂ 2024 ਵਿੱਚ ਆਪਣੀ ਸਿਆਸੀ ਵਾਪਸੀ ਲਈ ਲੜਾਈ ਦਾ ਰੋਡਮੈਪ ਤਿਆਰ ਕਰ ਲਿਆ ਹੈ। ਇਸ ਤਹਿਤ ਪਾਰਟੀ 2024 ਦੀਆਂ ਲੋਕ ਸਭਾ ਚੋਣਾਂ ਵਿੱਚ ਅੱਧੀਆਂ ਟਿਕਟਾਂ 50 ਸਾਲ ਤੋਂ ਘੱਟ ਉਮਰ ਵਾਲਿਆਂ ਨੂੰ ਦੇਵੇਗੀ ਅਤੇਪਾਰਲੀਮੈਂਟ, ਸੂਬਾਈ ਵਿਧਾਨ ਸਭਾਵਾਂ ਤੇ ਹੋਰਨਾਂ ਚੋਣਾਂ ਵਾਲੇ ਅਹੁਦਿਆਂ ਉੱਤੇ ਆਗੂਆਂ ਦੀ ਸੇਵਾਮੁਕਤੀ ਦੀ ਉਮਰ ਵੀ ਤੈਅ ਕਰੇਗੀ।
ਜਨਤਾ ਨਾਲ ਜੁੜਨ ਦੇ ਮੰਤਰ ਤਹਿਤ ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਨੇ ਕਸ਼ਮੀਰ ਤੋਂ ਕੰਨਿਆਕੁਮਾਰੀ ਤਕ ਦੋ ਅਕਤੂਬਰ ਤੋਂ ਭਾਰਤ ਜੋੜੋ ਪਦ ਯਾਤਰਾ ਕੱਢਣ ਦਾ ਐਲਾਨ ਕੀਤਾ ਹੈ। ਉਨ੍ਹਾਂ ਕਿਹਾ: ਅਸੀਂ ਉਭਰਾਂਗੇ, ਇਹ ਸਾਡਾ ਦਿ੍ਰੜ ਨਿਸ਼ਚਾ ਤੇ ਨਵ-ਸੰਕਲਪ ਹੈ। ਕਾਂਗਰਸ ਦਾ ਨਵਾਂ ਉਦੇਸ਼ ਹੋਵੇਗਾ, ਇਹ ਸਾਡਾ ਨਵਾਂ ਸੰਕਲਪ ਹੈ। ਉਦੈਪੁਰ ਨਵ-ਸੰਕਲਪ ਹੇਠ ਪਾਰਟੀ ਵਿੱਚ ਵੱਡੇ ਸੁਧਾਰ ਲਾਗੂ ਕਰਨ ਦਾ ਐਲਾਨ ਕਰਦਿਆਂ ਇੱਕ ਵਿਅਕਤੀ ਇੱਕ ਅਹੁਦਾ ਤੇ ਇੱਕ ਪਰਵਾਰ ਨੂੰ ਇੱਕ ਟਿਕਟ ਨਾਲ ਸੰਗਠਨ ਵਿੱਚ ਹਰ ਪੱਧਰ ਉੱਤੇ ਪੰਜਾਹ ਫੀਸਦੀ ਅਹੁਦੇ ਪੰਜਾਹ ਸਾਲ ਤੋਂ ਘੱਟ ਉਮਰ ਦੇ ਨੌਜਵਾਨਾਂ ਨੂੰ ਦੇਣ ਦੇ ਮਤੇ ਨੂੰ ਮਨਜ਼ੂਰੀ ਦਿੱਤੀ ਗਈ। ਚੋਣਾਂ ਦੇ ਪ੍ਰਬੰਧ ਤੇ ਜ਼ਮੀਨੀ ਸਰਵੇ ਲਈ ਵੱਖ-ਵੱਖ ਵਿਭਾਗ ਬਣਾਉਣ ਵਰਗੇ ਕਈ ਨਵੇਂ ਕਦਮ ਚੁੱਕਣ ਦਾ ਐਲਾਨ ਕੀਤਾ ਗਿਆ ਹੈ।
ਸਿਆਸੀ ਮਸਲਿਆਂਬਾਰੇ ਕਾਂਗਰਸ ਨੇ ਗੱਠਜੋੜ ਦਾ ਬਦਲ ਖੁੱਲ੍ਹਾ ਰੱਖਣ ਦੀ ਗੱਲ ਕਹੀ ਅਤੇ ਪਾਰਲੀਮੈਂਟ ਅਤੇ ਵਿਧਾਨ ਸਭਾਵਾਂ ਵਿੱਚ ਮਹਿਲਾ ਰਾਖਵਾਂਕਰਨ ਵਿੱਚ ਕੋਟੇ ਦੇ ਅੰਦਰ ਕੋਟੇ ਦਾ ਸਮਰਥਨ ਵੀ ਕੀਤਾ ਹੈ। ਪਾਰਲੀਮੈਂਟਅਤੇ ਵਿਧਾਨ ਸਭਾਵਾਂ ਵਿੱਚ ਓ ਬੀ ਸੀ (ਹੋਰ ਪਛੜੀਆਂ ਜਾਤੀਆਂ) ਲਈ ਰਾਖਵਾਂਕਰਨ ਤੇ ਨਿੱਜੀ ਖੇਤਰ ਦੀਆਂ ਨੌਕਰੀਆਂ ਵਿੱਚ ਰਾਖਵਾਂਕਰਨ ਦੇ ਮਸਲੇ ਨੂੰ ਹਾਲੇ ਪਾਰਟੀ ਨੇ ਛੱਡ ਦਿੱਤਾ ਹੈ, ਪਰ ਜਾਤੀ ਜਨਗਣਨਾ ਦਾ ਸਮਰਥਨ ਕਰ ਕੇ ਕਾਂਗਰਸ ਨੇ ਓ ਬੀ ਸੀ ਵਰਗ ਵਿੱਚ ਸਿਆਸੀ ਆਧਾਰ ਵਧਾਉਣ ਦਾ ਦਾਅ ਚੱਲ ਦਿੱਤਾ ਹੈ।ਕਾਂਗਰਸ ਵਿੱਚ ਇਨ੍ਹਾਂ ਅਹਿਮ ਬਦਲਾਵਾਂ ਉੱਤੇ ਤੁਰੰਤ ਅਮਲ ਲਈ ਸੋਨੀਆ ਗਾਂਧੀ ਨੇ ਚਿੰਤਨ ਸ਼ਿਵਰ ਦੇ ਆਪਣੇ ਸਮਾਪਤੀ ਸੰਬੋਧਨ ਵਿੱਚਇੱਕ ਟਾਸਕ ਫੋਰਸ ਦੇ ਗਠਨ ਦਾ ਐਲਾਨ ਕੀਤਾ। ਜਨਤਾ ਦਾ ਰੌਂਅ ਦੇਖਦਿਆਂ ਤੇ ਫੀਡਬੈਕ ਲਈ ਪਬਲਿਕ ਇਨਸਾਈਟ ਡਿਪਾਰਟਮੈਂਟ, ਪਾਰਟੀ ਦੇ ਲੋਕਾਂ ਨੂੰ ਵਿਚਾਰਧਾਰਕ ਅਤੇ ਨੀਤੀਗਤ ਸਿਖਲਾਈ ਦੇਣ ਲਈ ਰਾਸ਼ਟਰੀ ਟਰੇਨਿੰਗ ਇੰਸਟੀਚਿਊਟ ਅਤੇ ਚੋਣ ਲਈ ਏ ਆਈ ਸੀ ਸੀ (ਆਲ ਇੰਡੀਆ ਕਾਂਗਰਸ ਕਮੇਟੀ) ਵਿੱਚ ਚੋਣ ਪ੍ਰਬੰਧਕੀ ਵਿਭਾਗ ਬਣਾਉਣ ਦਾ ਫੈਸਲਾ ਹੋਇਆ ਹੈ, ਜਦ ਕਿ ਉੱਤੋਂ ਲੈ ਕੇ ਸੰਗਠਨ ਦੇ ਜ਼ਿਲ੍ਹਾ ਪੱਧਰ ਤਕ ਦੇ ਅਹੁਦੇਦਾਰਾਂ ਦੇ ਕੰਮਾਂ ਦੀ ਘੋਖ ਕਾਂਗਰਸ ਦੇ ਕੌਮੀ ਜਨਰਲ ਸੈਕਟਰੀਦੇ ਪੱਧਰ ਉੱਤੇਹੋਵੇਗੀ। ਪਾਰਲੀਮੈਂਟਰੀ ਬੋਰਡ ਦੇ ਮਤੇ ਉੱਤੇ ਚਿੰਤਨ ਸ਼ਿਵਰ ਵਿੱਚ ਚਰਚਾ ਹੋਈ ਅਤੇ ਇਹ ਸੰਗਠਨ ਸੁਧਾਰਾਂ ਦੇ ਖਰੜੇ ਵਿੱਚ ਵੀ ਸ਼ਾਮਲ ਸੀ, ਪਰ ਅੰਤਿਮ ਸੰਕਲਪਾਂ ਵਿੱਚ ਇਸ ਨੂੰ ਥਾਂ ਨਹੀਂ ਮਿਲ ਸਕੀ।