ਡਮਟਾਲ (ਕਾਂਗੜਾ), 16 ਮਈ (ਪੋਸਟ ਬਿਊਰੋ)- ਪੁਲਸ ਥਾਣਾ ਨੰਗਲਭੂਰ ਹੇਠਲੇ ਕੰਦਰੋੜੀ ਖੇਤਰ ਵਿੱਚ ਸ਼ਰਾਬ ਪੀ ਕੇ ਖੌਰੂ ਪਾ ਰਹੇ ਸੱਤ ਨੌਜਵਾਨਾਂ ਨੇ ਸ਼ਨੀਵਾਰ ਦੀ ਰਾਤ ਪੰਜਾਬ ਪੁਲਸ ਦੇ ਤਿੰਨ ਜਵਾਨਾਂ ਉੱਤੇ ਹਥਿਆਰਾਂ ਨਾਲ ਹਮਲਾ ਕਰ ਦਿੱਤਾ ਅਤੇ ਗੰਭੀਰ ਜ਼ਖਮੀ ਕਰਨ ਪਿੱਛੋਂ ਫਰਾਰ ਹੋ ਗਏ। ਜ਼ਖਮੀਆਂ ਦੀ ਹਾਲਤ ਗੰਭੀਰ ਬਣੀ ਹੋਈ ਹੈ।
ਕੰਦਰੋੜੀ ਦੇ ਇੱਕ ਢਾਬੇ ਵਿੱਚ ਪੰਜਾਬ ਪੁਲਸ ਦੇ ਤਿੰਨ ਜਵਾਨ ਅਖਿਲ ਸਲਰੀਆ, ਸਾਹਿਲ ਅਤੇ ਅੰਕੁਸ਼ ਸ਼ਰਮਾ ਗਸ਼ਤ ਦੇ ਬਾਅਦ ਖਾਣਾ ਖਾ ਰਹੇ ਸਨ। ਇਸ ਦੌਰਾਨ ਕੰਦਰੋੜੀ ਖੇਤਰ ਦੇ ਮੋਹਿਤ ਯੋਗੀ, ਸਾਜਨ ਕਿਸ਼ਨ ਸਿੰਘ ਤੇ ਵਿਸ਼ਾਲ ਸਾਥੀਆਂ ਦੇ ਨਾਲ ਢਾਬੇ ਉੱਤੇ ਆਏ। ਇਹ ਸਾਰੇ ਜਣੇ ਸ਼ਰਾਬ ਦੇ ਨਸ਼ੇ ਵਿੱਚ ਸਨ ਤੇ ਇਨ੍ਹਾਂ ਨੇ ਹੰਗਾਮਾ ਸ਼ੁਰੂ ਕਰ ਦਿੱਤਾ। ਪੁਲਸ ਜਵਾਨਾਂ ਨੇ ਨੌਜਵਾਨਾਂ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ ਤਾਂ ਦੋਸ਼ੀ ਮਾਰਕੁੱਟ ਕਰਨ ਲੱਗੇ ਅਤੇ ਫੋਨ ਕਰ ਕੇ ਸਾਥੀਆਂ ਨੂੰ ਬੁਲਾ ਲਿਆ। ਸਾਰਿਆਂ ਨੇ ਪੁਲਸ ਮੁਲਾਜ਼ਮਾਂ ਉੱਤੇ ਤੇਜ਼ ਹਥਿਆਰਾਂ ਨਾਲ ਹਮਲਾ ਕਰ ਦਿੱਤਾ। ਹਮਲੇ ਵਿੱਚ ਤਿੰਨੋਂ ਪੁਲਸ ਜਵਾਨਾਂ ਨੂੰ ਸਿਰ ਅਤੇ ਹੱਥਾਂ ਉੱਤੇ ਗੰਭੀਰ ਸੱਟਾਂ ਲੱਗੀਆਂ ਹਨ। ਢਾਬਾ ਮਾਲਕ ਨੇ ਲੋਕਾਂ ਦੀ ਮਦਦ ਨਾਲ ਪੁਲਸ ਜਵਾਨਾਂ ਨੂੰ ਸਥਾਨਕ ਹਸਪਤਾਲ ਪਹੁੰਚਾਇਆ। ਇੱਥੇ ਮੁੱਢਲੇ ਇਲਾਜ ਪਿੱਛੋਂ ਤਿੰਨਾਂ ਨੂੰ ਅੰਮ੍ਰਿਤਸਰ ਰੈਫਰ ਕਰ ਦਿੱਤਾ ਹੈ। ਇੱਕ ਦੋਸ਼ੀ ਵਿਸ਼ਾਲ ਨੂੰ ਗ੍ਰਿਫਤਾਰ ਕਰ ਲਿਆ ਹੈ ਅਤੇ ਉਸ ਦੇ ਸਾਥੀਆਂ ਦੀ ਤਲਾਸ਼ ਕੀਤੀ ਜਾ ਰਹੀ ਹੈ।