ਚਿੱਤਰਕੂਟ, 16 ਮਈ (ਪੋਸਟ ਬਿਊਰੋ)- ਚਿੱਤਰਕੂਟ ਦੇ ਪ੍ਰਸਿੱਧ ਬਾਲਾਜੀ ਮੰਦਰ ਤਰੌਂਹਾ ਤੋਂ 9 ਮਈ ਨੂੰ ਚੋਰੀ ਕੀਮਤੀ ਮੂਰਤੀਆਂ ਚੋਰ ਕੱਲ੍ਹ ਮੰਦਰ ਦੇ ਮਹੰਤ ਦੇ ਘਰ ਦੇ ਬਾਹਰ ਛੱਡ ਗਏ। ਘਰ ਦੇ ਬਾਹਰ ਚੋਰਾਂ ਦੀ ਚਿੱਠੀ ਮਿਲਣ ਤੋਂ ਬਾਅਦ ਤਲਾਸ਼ੀ ਲੈਣ ਉੱਤੇ ਇੱਕ ਟੋਕਰੀ ਹੇਠਾਂ ਰੱਖੀ ਬੋਰੀ ਵਿੱਚ ਪਿੱਤਲ ਅਤੇ ਤਾਂਬੇ ਦੀਆਂ 12 ਮੂਰਤੀਆਂ ਮਿਲੀਆਂ। ਚਿੱਠੀ ਵਿੱਚ ਚੋਰਾਂ ਨੇ ਲਿਖਿਆ ਸੀ ਕਿ ਮੂਰਤੀਆਂ ਦੀ ਚੋਰੀ ਪਿੱਛੋਂ ਉਨ੍ਹਾਂ ਨੂੰ ਬੁਰੇ-ਬੁਰੇ ਸੁਫਨੇ ਆ ਰਹੇ ਸਨ।
ਸਦਰ ਕੋਤਵਾਲੀ ਦੇ ਤਰੌਂਹਾ ਵਾਲੇ ਬਾਲਾਜੀ ਮੰਦਰ ਤੋਂ 9 ਮਈ ਨੂੰ ਅਸ਼ਟਧਾਤੂ, ਪਿੱਤਲ ਅਤੇ ਤਾਂਬੇ ਦੀਆਂ 16 ਮੂਰਤੀਆਂ ਚੋਰੀ ਹੋ ਗਈਆਂ ਸਨ। ਮੰਦਰ ਦਾ ਤਾਲਾ ਤੋੜ ਕੇ ਚੋਰ ਉਥੋਂ ਪੰਜ ਕਿਲੋ ਵਜ਼ਨ ਦੀ ਅਸ਼ਟਧਾਤੂ ਦੀ ਸ੍ਰੀਰਾਮ ਤੇ ਮਾਤਾ ਸੀਤਾ ਦੀ ਮੂਰਤੀ, ਪਿੱਤਲ ਦੀ ਰਾਧਾ-ਕ੍ਰਿਸ਼ਨ ਦੀ ਮੂਰਤੀ, ਬਾਲਾਜੀ ਦੀ ਮੂਰਤੀ ਅਤੇ ਲੱਡੂ ਗੋਪਾਲ ਸਣੇ ਨਗਦੀ ਤੇ ਚਾਂਦੀ ਦਾ ਸਾਮਾਨ ਲੈ ਗਏ ਸਨ। ਚੋਰੀ ਦੇ ਮਾਮਲੇ ਵਿੱਚ ਉਦੋਂ ਨਵਾਂ ਮੋੜ ਆ ਗਿਆ, ਜਦੋਂ ਮੂਰਤੀਆਂ ਇੱਕ ਚਿੱਠੀ ਨਾਲ ਮਾਨਿਕਪੁਰ ਕਸਬੇ ਵਿੱਚ ਮਹਾਵੀਰ ਨਗਰ ਵਾਰਡ ਵਿੱਚ ਰਹਿੰਦੇ ਮੰਦਰ ਦੇ ਮਹੰਤ ਰਾਮ ਬਾਲਕ ਦਾਸ ਦੇ ਘਰ ਦੇ ਬਾਹਰ ਮਿਲੀਆਂ। ਮਹੰਤ ਨੇ ਦੱਸਿਆ ਕਿ ਸਵੇਰੇ ਉਹ ਗਾਵਾਂ ਨੂੰ ਚਾਰਾ-ਪਾਣੀ ਦੇਣ ਜਾ ਰਹੇ ਸਨ ਤਾਂ ਉਨ੍ਹਾਂ ਨੂੰ ਇੱਕ ਚਿੱਠੀ ਮਿਲੀ। ਉਸ ਵਿੱਚ ਚੋਰੀ ਕੀਤੀਆਂ ਮੂਰਤੀਆਂ ਦੇ ਬਾਰੇ ਪਛਤਾਵੇ ਦੇ ਭਾਵ ਸਨ। ਚਿੱਠੀ ਪੜ੍ਹਨ ਤੋਂ ਬਾਅਦ ਮਹੰਤ ਨੇ ਮੂਰਤੀਆਂ ਦੀ ਭਾਲ ਕੀਤੀ ਤਾਂ ਘਰ ਦੇ ਬਾਹਰ ਟੋਕਰੀ ਹੇਠਾਂ ਰੱਖੀ ਬੋਰੀ ਅੰਦਰ ਪਿੱਤਲ ਤੇ ਤਾਂਬੇ ਦੀਆਂ 12 ਮੂਰਤੀਆਂ ਮਿਲੀਆਂ।