ਟੋਰਾਂਟੋ, 6 ਦਸੰਬਰ (ਪੋਸਟ ਬਿਊਰੋ) : ਮਰਕ ਕੈਨੇਡਾ ਵੱਲੋਂ ਸੋਮਵਾਰ ਨੂੰ ਇਹ ਐਲਾਨ ਕੀਤਾ ਗਿਆ ਹੈ ਕਿ ਉਹ ਥਰਮੋਫਿਸ਼ਰ ਸਾਇੰਟਿਫਿਕ ਨਾਲ ਰਲ ਕੇ ਵ੍ਹਿਟਬੀ, ਓਨਟਾਰੀਓ ਵਿੱਚ ਕੋਵਿਡ-19 ਦੀ ਐਂਟੀਵਾਇਰਲ ਦਵਾਈ ਮੋਲਨੂਪਿਰਾਵੀਅਰ ਤਿਆਰ ਕਰੇਗੀ ਤੇ ਉਸ ਨੂੰ ਗਲੋਬਲ ਮਾਰਕਿਟਸ ਵਿੱਚ ਵੰਡਿਆ ਜਾਵੇਗਾ।
ਕੈਨੇਡੀਅਨ ਲੋਕੇਸ਼ਨ ਮੋਲਨੂਪਿਰਾਵੀਅਰ ਦੀਆਂ ਡੋਜਿ਼ਜ਼ ਤਿਆਰ ਕਰੇਗੀ ਤੇ ਇਹ ਰਿੱਜਬੈਕ ਬਾਇਓਥੈਰਾਪਿਊਟਿਕਸ ਦੇ ਸਹਿਯੋਗ ਨਾਲ ਤਿਆਰ ਕੀਤੀ ਜਾਵੇਗੀ ਤੇ ਇਸ ਦੀ ਵੰਡ ਕੈਨੇਡਾ, ਯੂਕੇ, ਯੂਰਪੀਅਨ ਯੂਨੀਅਨ, ਏਸ਼ੀਆ ਪੈਸੇਫਿਕ ਤੇ ਲੈਟਿਨ ਅਮੈਰਿਕਾ ਵਿੱਚ ਕੀਤੀ ਜਾਵੇਗੀ ਜਦੋਂ ਇਨ੍ਹਾਂ ਰੀਜਨਜ਼ ਤੋਂ ਇਜਾਜ਼ਤ ਮਿਲ ਜਾਵੇਗੀ। ਇਸ ਦਵਾਈ ਨੂੰ ਹੈਲਥ ਕੈਨੇਡਾ ਵੱਲੋਂ ਅਜੇ ਮਨਜ਼ੂਰੀ ਮਿਲਣੀ ਬਾਕੀ ਹੈ।
ਇੱਕ ਪ੍ਰੈੱਸ ਕਾਨਫਰੰਸ ਵਿੱਚ ਮਰਕ ਕੈਨੇਡਾ ਦੇ ਨਵੇਂ ਪ੍ਰੈਜ਼ੀਡੈਂਟ ਮਾਰਵਨ ਆਕੜ ਨੇ ਆਖਿਆ ਕਿ ਇਹ ਫੈਸਿਲਿਟੀ ਦੀ ਚੋਣ ਇਸ ਲਈ ਕੀਤੀ ਗਈ ਹੈ ਕਿਉਂਕਿ ਦਵਾਈ ਤਿਆਰ ਕਰਨ ਦੀ ਇਸ ਦੀ ਸਮਰੱਥਾ, ਕਪੈਸਿਟੀ ਤੇ ਸਪੀਡ ਕਾਫੀ ਜਿ਼ਆਦਾ ਹੈ।ਵ੍ਹਿਟਬੀ ਸਥਿਤ ਥਰਮੋ ਫਿਸ਼ਰ ਦੀ ਮੈਨੂਫੈਕਚਰਿੰਗ ਸਾਈਟ ਦੁਨੀਆਂ ਦੀਆਂ ਉਨ੍ਹਾਂ ਤਿੰਨ ਲੋਕੇਸ਼ਨਜ਼ ਵਿੱਚੋਂ ਇੱਕ ਹੈ ਜਿੱਥੇ ਮੋਲਨੂਪਿਰਾਵੀਅਰ ਤਿਆਰ ਕੀਤੀ ਜਾਵੇਗੀ।
ਇਸ ਮੌਕੇ ਇਨੋਵੇਸ਼ਨ, ਸਾਇੰਸ ਤੇ ਇੰਡਸਟਰੀ ਮੰਤਰੀ ਫਰੈਂਕੌਇਸ ਫਿਲਿਪ ਸੈ਼ਂਪੇਨ ਨੇ ਆਖਿਆ ਕਿ ਅਸੀਂ ਮੀਲਪੱਥਰ ਕਾਇਮ ਕਰਨ ਜਾ ਰਹੇ ਹਾਂ ਤੇ ਕੈਨੇਡਾ ਦੀ ਬਾਇਓਮੈਨੂਫੈਕਚਰਿੰਗ ਸਮਰੱਥਾ ਦਾ ਪੁਨਰਨਿਰਮਾਣ ਕਰਨ ਜਾ ਰਹੇ ਹਾਂ।