ਟੋਰਾਂਟੋ, 29 ਨਵੰਬਰ (ਪੋਸਟ ਬਿਊਰੋ) : 62 ਸਾਲਾ ਇੱਕ ਵਿਅਕਤੀ, ਜਿਹੜਾ ਪੂਰੀ ਤਰ੍ਹਾਂ ਵੈਕਸੀਨੇਟਿਡ ਸੀ, ਕੈਨੇਡਾ ਤੋਂ ਹਾਂਗ ਕਾਂਗ ਗਿਆ, ਉਸ ਦੇ ਕੋਵਿਡ-19 ਦੇ ਨਵੇਂ ਵੇਰੀਐਂਟ ਓਮਾਈਕ੍ਰੌਨ ਨਾਲ ਗ੍ਰਸਤ ਹੋਣ ਦੀ ਪੁਸ਼ਟੀ ਕੀਤੀ ਗਈ ਹੈ। ਇਸ ਦਾ ਖੁਲਾਸਾ ਹਾਂਗ ਕਾਂਗ ਦੇ ਡਿਪਾਰਟਮੈਂਟ ਆਫ ਹੈਲਥ ਦੇ ਸੈਂਟਰ ਫੌਰ ਹੈਲਥ ਪ੍ਰੋਟੈਕਸ਼ਨ ਵੱਲੋਂ ਕੀਤਾ ਗਿਆ।
ਅਜੇ ਤੱਕ ਇਹ ਸਪਸ਼ਟ ਨਹੀਂ ਹੋ ਸਕਿਆ ਹੈ ਕਿ ਇਹ ਟਰੈਵਲਰ ਕੈਨੇਡੀਅਨ ਸੀ ਜਾਂ ਨਹੀਂ। ਪਰ ਉਹ 10 ਨਵੰਬਰ ਨੂੰ ਏਅਰ ਕੈਨੇਡਾ ਦੀ ਫਲਾਈਟ ਏਸੀ007 ਰਾਹੀਂ ਵੈਨਕੂਵਰ ਤੋਂ ਹਾਂਗ ਕਾਂਗ ਪਹੁੰਚਿਆ ਤੇ 17 ਨਵੰਬਰ ਨੂੰ ਉਸ ਵਿੱਚ ਲੱਛਣ ਨਜ਼ਰ ਆਉਣ ਲੱਗੇ। ਹਾਂਗ ਕਾਂਗ ਦੇ ਸਿਹਤ ਅਧਿਕਾਰੀਆਂ ਨੇ ਪਹਿਲਾਂ ਇਹ ਆਖਿਆ ਕਿ ਇਸ ਵਿਅਕਤੀ ਨੂੰ ਵਾਇਰਸ ਇੱਕ ਹੋਰ ਟਰੈਵਲਰ ਤੋਂ ਹੋਇਆ ਸੀ ਜਿਹੜਾ ਸਾਊਥ ਅਫਰੀਕਾ ਤੋਂ ਉੱਥੇ ਆਇਆ ਸੀ ਤੇ ਰੀਗਲ ਏਅਰਪੋਰਟ ਹੋਟਲ ਵਿੱਚ ਉਸੇ ਮੰਜਿ਼ਲ ਉੱਤੇ ਹੀ ਰਹਿ ਰਿਹਾ ਸੀ।
ਇਸ ਸਮੇਂ ਦੋਵਾਂ ਵਿਅਕਤੀਆਂ ਨੂੰ ਕੁਆਰਨਟੀਨ ਕੀਤਾ ਗਿਆ ਹੈ। ਹਾਂਗ ਕਾਂਗ ਦੇ ਸਿਹਤ ਅਧਿਕਾਰੀਆਂ ਅਨੁਸਾਰ ਦੂਜਾ ਟਰੈਵਲਰ 36 ਸਾਲਾ ਵਿਅਕਤੀ ਹੈ ਜਿਹੜਾ 11 ਨਵੰਬਰ ਨੂੰ ਪਹੁੰਚਿਆ।ਦੋਵਾਂ ਵਿਅਕਤੀਆਂ ਨੂੰ ਫਾਈਜ਼ਰ-ਬਾਇਓਐਨਟੈਕ ਵੈਕਸੀਨ ਦੀਆਂ ਦੋ-ਦੋ ਡੋਜ਼ਾਂ ਲੱਗੀਆਂ ਹੋਈਆਂ ਹਨ। ਕੈਨੇਡਾ ਦੀ ਚੀਫ ਪਬਲਿਕ ਹੈਲਥ ਆਫੀਸਰ ਡਾ·ਥੈਰੇਸਾ ਟੈਮ ਨੇ ਆਖਿਆ ਕਿ ਅਸੀਂ ਹਾਂਗ ਕਾਂਗ ਦੇ ਸਿਹਤ ਅਧਿਕਾਰੀਆਂ ਨਾਲ ਪੂਰਾ ਰਾਬਤਾ ਰੱਖ ਰਹੇ ਹਾਂ ਤੇ ਅਸੀਂ ਇਹ ਪਤਾ ਲਾਉਣ ਦੀ ਕੋਸਿ਼ਸ਼ ਕਰ ਰਹੇ ਹਾਂ ਕਿ ਸਾਨੂੰ ਕਿਤੇ ਕੈਨੇਡਾ ਵਿੱਚ ਕੋਈ ਮਾਮਲਾ ਟਰੇਸ ਕਰਨ ਦੀ ਲੋੜ ਤਾਂ ਨਹੀਂ।