ਲੰਡਨ, 25 ਨਵੰਬਰ (ਪੋਸਟ ਬਿਊਰੋ)- ਹਿੰਦੂਜਾ ਗਰੁੱਪ ਦੇ ਪਰਵਾਰਕ ਝਗੜੇ ਨੇ 107 ਸਾਲ ਪੁਰਾਣੇ ਬਿਜ਼ਨਸ ਸਾਮਰਾਜ ਨੂੰ ਸੰਕਟ ਵਿੱਚ ਪਾ ਦਿੱਤਾ ਹੈ। ਸ੍ਰੀ ਚੰਦ ਹਿੰਦੂਜਾ ਭਰਾਵਾਂ ਦੇ ਵਿੱਚ ਝਗੜਾ ਲੰਡਨ ਅਤੇ ਸਵਿਟਜ਼ਰਲੈਂਡ ਦੀਆਂ ਅਦਾਲਤਾਂ ਤਕ ਪਹੁੰਚ ਗਿਆ ਹੈ। ਗਰੁੱਪ ਦੇ ਮੁਖੀ 85 ਸਾਲਾ ਸ੍ਰੀ ਚੰਦ ਹਿੰਦੂਜਾ ਡਿਮੈਂਸ਼ੀਆਂ ਦੀ ਬਿਮਾਰੀ ਤੋਂ ਪੀੜਤ ਹਨ। ਉਨ੍ਹਾਂ ਦੇ ਦੋਹਤੇ ਕਰਮ ਹਿੰਦੂਜਾ, ਭੈਣ, ਮਾਂ ਸ਼ਾਨੂ, ਨਾਨੀ 1800 ਕਰੋੜ ਡਾਲਰ (ਕਰੀਬ 1.33 ਲੱਖ ਕਰੋੜ) ਦੇ ਇਸ ਬ੍ਰਿਟਿਸ਼-ਭਾਰਤੀ ਗਰੁੱਪ ਦੇ ਬਟਵਾਰੇ ਨੂੰ ਲੈ ਕੇ ਬਾਕੀ ਪਰਵਾਰ ਨਾਲ ਕਾਨੂੰਨੀ ਲੜਾਈ ਵਿੱਚ ਉਲਝੇ ਹਨ। ਕਰਮ ਹਿੰਦੂਜਾ ਧਿਰ ਦੀ ਮੰਗ ਹੈ ਗਰੁੱਪ ਦੀ ਜਾਇਦਾਦ ਨੂੰ ਵੰਡ ਦਿੱਤਾ ਜਾਣਾ ਚਾਹੀਦਾ ਹੈ। ਇਸ ਦੌਰਾਨ ਸ੍ਰੀ ਚੰਦ ਹਿੰਦੂਜਾ ਧਿਰ ਨੇ ਸ਼ੱਕ ਪ੍ਰਗਟਾਇਆ ਹੈ ਕਿ ਉਨ੍ਹਾਂ ਦੀਆਂ ਧੀਆਂ ਸ਼ਾਨੂ ਅਤੇ ਵੀਨੂ ਖਿਲਾਫ ਗਲਤ ਕਾਰਵਾਈ ਹੋ ਸਕਦੀ ਹੈ ਜਾਂ ਉਨ੍ਹਾਂ ਦੇ ਖਿਲਾਫ ਫੈਸਲਾ ਜਾ ਸਕਦਾ ਹੈ।
ਸ੍ਰੀ ਚੰਦ ਹਿੰਦੂਜਾ ਦੇ ਤਿੰਨ ਭਰਾ ਗੋਪੀ ਚੰਦ, ਪ੍ਰਕਾਸ਼ ਅਤੇ ਅਸ਼ੋਕ ਹਿੰਦੂਜਾ ਚਾਹੰੁਦੇ ਹਨ ਕਿ ਗਰੁੱਪ ਆਪਣੇ ਪੁਰਾਣੇ ਵਚਨ 'ਤੇ ਕਾਇਮ ਰਹੇ ਕਿ ‘ਸਭ ਕੁਝ ਸਾਰਿਆਂ ਦਾ ਹੈ ਅਤੇ ਕੁਝ ਵੀ ਕਿਸੇ ਇੱਕ ਦਾ ਨਹੀਂ'। ਇੰਡੀਅਨ ਸਕੂਲ ਆਫ ਬਿਜ਼ਨਸ ਦੇ ਫੈਮਿਲੀ-ਬਿਜ਼ਨਸ ਐਕਸਪਰਟ ਕਵਿਲ ਰਮਚੰਦਰਨ ਕਹਿੰਦੇ ਹਨ ਕਿ ਇੰਝ ਲੱਗਦਾ ਹੈ ਕਿ ਇਹ ਪਰਵਾਰਕ ਲੜਾਈ ਅਜਿਹੇ ਮੁਕਾਮ 'ਤੇ ਪਹੁੰਚ ਗਈ ਹੈ ਜਿੱਥੋਂ ਵਾਪਸੀ ਸੰਭਵ ਨਹੀਂ ਹੈ।