ਬਰੈਂਪਟਨ, 10 ਅਕਤੂਬਰ (ਪੋਸਟ ਬਿਊਰੋ) : ਸ਼ਨਿੱਚਰਵਾਰ ਨੂੰ ਬਰੈਂਪਟਨ ਵਿੱਚ ਇੱਕ ਹਥਿਆਰਬੰਦ ਡਾਕੇ ਤੋਂ ਬਾਅਦ ਪੀਲ ਪੁਲਿਸ ਵੱਲੋਂ ਪੰਜਾਬੀ ਮੂਲ ਦੇ ਤਿੰਨ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਤੇ ਚੌਥੇ ਦੀ ਭਾਲ ਕੀਤੀ ਜਾ ਰਹੀ ਹੈ।
ਪੁਲਿਸ ਦਾ ਕਹਿਣਾ ਹੈ ਕਿ ਰਾਤੀਂ 8:00 ਵਜੇ ਦੇ ਨੇੜੇ ਤੇੜੇ ਵਿਲੀਅਮਸ ਪਾਰਕਵੇਅ ਤੇ ਐਲਬਰਨ ਮਾਰਕਲ ਡਰਾਈਵ ਏਰੀਆ ਵਿੱਚ ਇੱਕ ਗੱਡੀ ਨੂੰ ਇੱਕ ਐਸਯੂਵੀ ਵੱਲੋਂ ਜਾਣਬੁੱਝ ਕੇ ਪਿੱਛਿਓਂ ਟੱਕਰ ਮਾਰੀ ਗਈ। ਆਪਣੀ ਜਾਨ ਬਚਾਉਣ ਲਈ ਗੱਡੀ ਵਿੱਚ ਸਵਾਰ ਲੋਕ ਉੱਥੋਂ ਭੱਜ ਨਿਕਲੇ ਤੇ ਇੱਕ ਘਰ ਵਿੱਚ ਜਾ ਪਹੁੰਚੇ। ਪਰ ਚਾਰ ਮਸ਼ਕੂਕਾਂ ਵੱਲੋਂ ਉਨ੍ਹਾਂ ਦਾ ਪਿੱਛਾ ਕੀਤਾ ਗਿਆ।ਮਸ਼ਕੂਕਾਂ ਨੇ ਹਥਿਆਰ ਵਿਖਾ ਕੇ ਉਨ੍ਹਾਂ ਵਿਅਕਤੀਆਂ ਦੀ ਗੱਡੀ ਤੇ ਉਨ੍ਹਾਂ ਦੇ ਇਲੈਕਟ੍ਰੌਨਿਕਸ ਲੁੱਟ ਲਏ।
ਜਾਂਚ ਤੋਂ ਬਾਅਦ ਪੁਲਿਸ ਨੂੰ ਲੁੱਟੀ ਗਈ ਗੱਡੀ ਤੇ ਮਸ਼ਕੂਕਾਂ ਵੱਲੋਂ ਇਸ ਕਾਰੇ ਨੂੰ ਅੰਜਾਮ ਦੇਣ ਲਈ ਵਰਤੀ ਗਈ ਗੱਡੀ ਦਾ ਪਤਾ ਲਾ ਲਿਆ ਗਿਆ।ਜਾਂਚ ਤੋਂ ਹੀ ਪੁਲਿਸ ਨੂੰ ਮਸ਼ਕੂਕਾਂ ਵੱਲੋਂ ਵਰਤੀ ਗੱਡੀ ਚੋਰੀ ਦੀ ਹੋਣ ਦਾ ਪਤਾ ਲੱਗਿਆ।ਇਹ ਵੀ ਪਤਾ ਲੱਗਿਆ ਕਿ ਇਹ ਗੱਡੀ ਟੋਰਾਂਟੋ ਦੀ ਸੀ।ਪੁਲਿਸ ਨੇ ਦੱਸਿਆ ਕਿ ਉਨ੍ਹਾਂ ਵੱਲੋਂ ਐਸਯੂਵੀ ਚਲਾ ਰਹੇ ਦੋ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ। ਬਾਅਦ ਵਿੱਚ ਤੀਜੇ ਵਿਅਕਤੀ ਨੂੰ ਵੀ ਬਰੈਂਪਟਨ ਵਿੱਚ ਗ੍ਰਿਫਤਾਰ ਕਰ ਲਿਆ ਗਿਆ।
ਪੁਲਿਸ ਨੇ ਦੱਸਿਆ ਕਿ ਡਾਕਾ ਮਾਰਨ ਦੇ ਦੋਸ਼ ਵਿੱਚ 29 ਸਾਲਾ ਸਿਮਰਨਜੀਤ ਨਾਰੰਗ, 36 ਸਾਲਾ ਦਵਿੰਦਰ ਮਾਣ ਤੇ 27 ਸਾਲਾ ਆਦਿਸ਼ ਸ਼ਰਮਾ ਨੂੰ ਚਾਰਜ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ ਮਾਣ ਨੂੰ ਚੋਰੀ ਦੀ ਸੰਪਤੀ ਰੱਖਣ, ਰਿਹਾਈ ਦੇ ਦੋ ਹੁਕਮਾਂ ਦੀ ਤਾਮੀਲ ਨਾ ਕਰਨ ਲਈ ਵੀ ਚਾਰਜ ਕੀਤਾ ਗਿਆ ਹੈ। ਸ਼ਰਮਾ ਨੂੰ ਵੀ ਚੋਰੀ ਦੀ ਸੰਪਤੀ ਦੇ ਦੋ ਮਾਮਲਿਆਂ ਦੇ ਸਬੰਧ ਵਿੱਚ ਚਾਰਜ ਕੀਤਾ ਗਿਆ ਹੈ।
ਪੁਲਿਸ ਨੇ ਆਖਿਆ ਕਿ ਉਹ ਚੌਥੇ ਮਸ਼ਕੂਕ ਦੀ ਭਾਲ ਕਰ ਰਹੇ ਹਨ ਤੇ ਉਸ ਨੂੰ ਆਤਮ ਸਮਰਪਣ ਕਰਨ ਲਈ ਵੀ ਆਖਿਆ ਜਾ ਰਿਹਾ ਹੈ। ਪੁਲਿਸ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਚੋਰੀ ਕੀਤੇ ਗਏ ਇਲੈਕਟ੍ਰੌਨਿਕਸ ਨਹੀਂ ਮਿਲੇ, ਇਨ੍ਹਾਂ ਵਿੱਚ ਐਪਲ ਦੇ ਆਈਫੋਨ ਤੇ ਕੰਪਿਊਟਰਜ਼ ਸ਼ਾਮਲ ਹਨ।