ਟੋਰਾਂਟੋ, 6 ਅਕਤੂਬਰ (ਪੋਸਟ ਬਿਊਰੋ) : ਅਮਰੀਕਾ ਦੇ ਅਜੇ ਵੀ ਜ਼ਮੀਨੀ ਸਰਹੱਦ ਨੂੰ ਗੈਰ ਜ਼ਰੂਰੀ ਟਰੈਵਲ ਲਈ ਬੰਦ ਕੀਤੇ ਹੋਣ ਦੇ ਚੱਲਦਿਆਂ ਮਾਹਿਰਾਂ ਦਾ ਕਹਿਣਾ ਹੈ ਕਿ ਕੁੱਝ ਟਰੈਵਲ ਪਸੰਦ ਕਰਨ ਵਾਲੇ ਕੈਨੇਡੀਅਨਜ਼ ਨੂੰ ਇਨ੍ਹਾਂ ਸਿਆਲਾਂ ਵਿੱਚ ਵੀ ਘਰੇ ਹੀ ਰਹਿਣਾ ਹੋਵੇਗਾ। ਇਹ ਉਨ੍ਹਾਂ ਦੀ ਦੂਜੀ ਸਰਦੀ ਹੋਵੇਗੀ ਜਦੋਂ ਉਹ ਸਰਹੱਦੋਂ ਪਾਰ ਨਹੀਂ ਜਾ ਸਕਣਗੇ।
ਯੂਐਸ ਡਿਪਾਰਟਮੈਂਟ ਆਫ ਹੋਮਲੈਂਡ ਸਕਿਊਰਿਟੀ ਵੱਲੋਂ 21 ਅਕਤੂਬਰ ਨੂੰ ਇਹ ਖੁਲਾਸਾ ਕੀਤਾ ਜਾਵੇਗਾ ਕਿ ਉਹ ਕੈਨੇਡਾ-ਅਮਰੀਕਾ ਬਾਰਡਰ ਉਤੇ ਪਾਬੰਦੀਆਂ ਵਿੱਚ ਢਿੱਲ ਦੇਣੀ ਚਾਹੁੰਦਾ ਹੈ ਜਾਂ ਫਿਰ ਇਨ੍ਹਾਂ ਪਾਬੰਦੀਆਂ ਨੂੰ 30 ਦਿਨਾਂ ਲਈ ਹੋਰ ਵਧਾਉਣਾ ਚਾਹੁੰਦਾ ਹੈ।ਇਹ ਕੋਈ ਵੀ ਨਹੀਂ ਜਾਣਦਾ ਕਿ ਅਮਰੀਕਾ ਨੇ ਜ਼ਮੀਨੀ ਬਾਰਡਰ ਨੂੰ ਬੰਦ ਕਰਕੇ ਕਿਉਂ ਰੱਖਿਆ ਹੋਇਆ ਹੈ ਜਦਕਿ ਕੈਨੇਡੀਅਨਜ਼ ਅਜੇ ਵੀ ਹਵਾਈ ਰਸਤੇ ਰਾਹੀਂ ਅਮਰੀਕਾ ਜਾ ਸਕਦੇ ਹਨ।
ਇੱਥੇ ਦੱਸਣਾ ਬਣਦਾ ਹੈ ਕਿ ਕੈਨੇਡੀਅਨ ਸਰਕਾਰ ਨੇ ਅਮਰੀਕੀ ਨਾਗਰਿਕਾਂ ਅਤੇ ਕੋਵਿਡ-19 ਖਿਲਾਫ ਪੂਰਾ ਟੀਕਾਕਰਨ ਕਰਵਾ ਚੁੱਕੇ ਪਰਮਾਨੈਂਟ ਰੈਜ਼ੀਡੈਂਟਸ ਲਈ ਟਰੈਵਲ ਸਬੰਧੀ ਪਾਬੰਦੀਆਂ 9 ਅਗਸਤ ਨੂੰ ਹੀ ਹਟਾ ਦਿੱਤੀਆਂ ਸਨ। ਇਸ ਦੌਰਾਨ ਅਮਰੀਕਾ ਦੀ ਸੈਨੇਟ ਡੈਮੋਕ੍ਰੈਟਸ ਦੇ ਇੱਕ ਗਰੁੱਪ, ਜਿਸ ਵਿੱਚ ਮਿਸ਼ੀਗਨ ਤੋਂ ਸੈਨੇਟਰਜ਼ ਡੈਬੀ ਸਟੇਬਨਾਓ ਤੇ ਗੈਰੀ ਪੀਟਰਜ਼, ਨਿਊਯੌਰਕ ਤੋਂ ਸੈਨੇਟਰ ਕਰਸਟੀਨ ਗਿੱਲਬਰਡ, ਨਿਊ ਹੈਂਪਸ਼ਾਇਰ ਤੋਂ ਸੈਨੇਟਰ ਜੀਨ ਸ਼ਾਹੀਨ ਸ਼ਾਮਲ ਹਨ,ਨੇ ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਇਡਨ ਨੂੰ ਸਤੰਬਰ ਵਿੱਚ ਪੱਤਰ ਲਿਖ ਕੇ ਟਰੈਵਲ ਬੈਨ ਹਟਾਉਣ ਦੀ ਮੰਗ ਕੀਤੀ ਸੀ।