ਕਈ ਭਾਸ਼ਾਵਾਂ ਵਿੱਚ ਬਣੀ ਫਿਲਮ ‘ਪੁਸ਼ਪਾ: ਦਿ ਰਾਈਜ’ ਦੀ ਲੀਡ ਅਭਿਨੇਤਰੀ ਰਸ਼ਮਿਕਾ ਮੰਦਾਨਾ ਦਾ ਇਸ ਵਿੱਚ ਫਸਟ ਲੁਕ ਪਿੱਛੇ ਜਿਹੇ ਸਾਹਮਣੇ ਆਇਆ ਹੈ। ਇਹ ਪਹਿਲੀ ਵਾਰ ਹੈ ਕਿ ਰਸ਼ਮਿਕਾ ਕਿਸੇ ਫਿਲਮ ਲਈ ਸਾਊਥ ਦੇ ਵੱਡੇ ਸਿਤਾਰੇ ਅੱਲੂ ਅਰਜੁਨ ਨਾਲ ਨਜ਼ਰ ਆਉਣ ਵਾਲੀ ਹੈ। ਨਿਰਮਾਤਾ ਨਵੀਨ ਯਰਨੇਨੀ ਅਤੇ ਵਾਈ ਰਵੀ ਸ਼ੰਕਰ ਨੇ ਇੱਕ ਸਾਂਝੇ ਬਿਆਨ ਵਿੱਚ ਕਿਹਾ, ‘‘ਰਸ਼ਮਿਕਾ ‘ਪੁਸ਼ਪਾ’ ਵਿੱਚ ਪਹਿਲਾਂ ਕਦੇ ਨਾ ਦੇਖੇ ਗਏ ਅਵਤਾਰ ਵਿੱਚ ਦਿੱਸੇਗੀ। ਉਸ ਨੇ ਚਰਿੱਤਰ ਵਿੱਚ ਢਲਣ ਵਿੱਚ ਕੋਈ ਕਸਰ ਨਹੀਂ ਛੱਡੀ। ‘ਪੁਸ਼ਪਾ’ ਦੀ ਪ੍ਰੇਮ ਕਹਾਣੀ ਸ੍ਰੀਵੱਲੀ ਦੇ ਦੁਆਲੇ ਘੁੰਮਦੀ ਹੈ ਅਤੇ ਦਰਸ਼ਕਾਂ ਲਈ ਉਸ ਨੂੰ ਇਸ ਕਿਰਦਾਰ ਦੇ ਨਾਲ ਪਰਦੇ ਉੱਤੇ ਜਾਦੂ ਕਰਦੇ ਦੇਖਣਾ ਦਿਲਚਸਪ ਹੋਣ ਵਾਲਾ ਹੈ।”
ਫਿਲਮ ‘ਪੁਸ਼ਪਾ’ ਆਂਧਰਾ ਪ੍ਰਦੇਸ਼ ਦੀਆਂ ਪਹਾੜੀਆਂ ਵਿੱਚ ਲਾਲ ਚੰਦਨ ਦੀ ਚੋਰੀ ਦੇ ਦੁਆਲੇ ਘੁੰਮਦੀ ਹੈ। ਫਿਲਮ ਦੋ ਹਿੱਸਿਆਂ ਵਿੱਚ ਰਿਲੀਜ਼ ਹੋਵੇਗੀ ਅਤੇ ਨਿਰਮਾਤਾਵਾਂ ਨੇ ਪਿੱਛੇ ਜਿਹੇ ਐਲਾਨ ਕੀਤਾ ਕਿ ਪਹਿਲਾ ਹਿੱਸਾ ਕ੍ਰਿਸਮਸ ਉੱਤੇ ਰਿਲੀਜ਼ ਕੀਤਾ ਜਾਵੇਗਾ। ਇਨ੍ਹੀਂ ਦਿਨੀਂ ਰਸ਼ਮਿਕਾ ਅਤੇ ਵਿੱਕੀ ਕੌਸ਼ਲ ਉੱਤੇ ਫਿਲਮਾਈ ਇੱਕ ਐਡ ਫਿਲਮ ਦੀ ਚਰਚਾ ਹੋ ਰਹੀ ਹੈ। ਇੱਕ ਅੰਡਰਵੀਅਰ ਦੀ ਇਸ ਐਡ ਉੱਤੇ ਹੰਗਾਮਾ ਹੋ ਰਿਹਾ ਹੈ। ਸੋਸ਼ਲ ਮੀਡੀਆ ਉੱਤੇ ਲੋਕ ਇਸ ਦੀ ਆਲੋਚਨਾ ਕਰ ਰਹੇ ਹਨ। ਇਸ ਵਿੱਚ ਰਸ਼ਮਿਕਾ ਯੋਗ ਇੰਸਟ੍ਰਕਟਰ ਬਣੀ ਹੈ, ਜਦ ਕਿ ਵਿੱਕੀ ਯੋਗ ਕਰਦਾ ਨਜ਼ਰ ਆ ਰਿਹਾ ਹੈ।