ਅੰਮਾਨ, 5 ਅਪ੍ਰੈਲ (ਪੋਸਟ ਬਿਊਰੋ)- ਜਾਰਡਨ ਦੇ ਰਾਜਾ ਅਬਦੁੱਲਾ ਦੂਸਰੇ ਦੇ ਮਤਰੇਏ ਭਰਾ ਹਮਜਾ ਨੇ ਕਿਹਾ ਹੈ ਕਿ ਉਹ ਘਰ ਵਿੱਚ ਨਜ਼ਰਬੰਦ ਹਨ, ਕਿਉਂਕਿ ਉਨ੍ਹਾਂ ਨੇ ਦੇਸ਼ ਦੇ ‘ਰੂਲਿੰਗ ਸਿਸਟਮ’ ਉੱਤੇ ਅਸਮੱਰਥਾ ਅਤੇ ਭਿ੍ਰਸ਼ਟਾਚਾਰ ਦਾ ਦੋਸ਼ ਲਾਇਆ। ਇਸ ਖਬਰ ਨਾਲ ਸੰਸਾਰ ਵਿੱਚ ਹਲਚਲ ਮੱਚ ਗਈ ਹੈ।
ਪੱਛਮੀ ਏਸ਼ੀਆ ਵਿੱਚ ਅਮਰੀਕਾ ਦੇ ਪ੍ਰਮੁੱਖ ਸਹਿਯੋਗੀ ਦੇਸ਼ ਜਾਰਡਨ ਵਿੱਚ ਸੱਤਾਧਾਰੀ ਰਾਜਸ਼ਾਹੀ ਵਿਚਲਾ ਕਲੇਸ਼ ਦਾ ਇਹ ਅਨੋਖਾ ਕੇਸ ਹੈ। ਪ੍ਰਿੰਸ ਹਮਜਾ ਦਾ ਇਹ ਵੀਡੀਓ ਸੰਦੇਸ਼ ਕੱਲ੍ਹ ਆਇਆ। ਇਸਤੋਂ ਪਹਿਲਾਂ ਦੇਸ਼ ਦੀ ਅਧਿਕਾਰਤ ਸਮਾਚਾਰ ਏਜੰਸੀ ਨੇ ਦੱਸਿਆ ਕਿ ਦੋ ਸਾਬਕਾ ਉਚ ਅਧਿਕਾਰੀਆਂ ਅਤੇ ਹੋਰ ਸ਼ੱਕੀ ਬੰਦਿਆਂ ਨੂੰ ‘ਸੁਰੱਖਿਆ ਕਾਰਨਾਂ ਕਰਕੇ ਗ਼੍ਰਿਫ਼ਤਾਰ ਕੀਤਾ ਗਿਆ ਹੈ। ਅਧਿਕਾਰੀਆਂ ਨੇ ਹਮਜਾ ਨੂੰ ਨਜ਼ਰਬੰਦ ਕਰਨ ਜਾਂ ਹਿਰਾਸਤ ਵਿੱਚ ਲੈਣ ਤੋਂ ਇਨਕਾਰ ਕੀੱਤਾ ਸੀ। ਫਿਰ ਵੀ ਬੀ ਬੀ ਸੀ ਕੋਲ ਪੁੱਜੀ ਵੀਡੀਓ ਵਿੱਚ ਸਾਬਕਾ ਕ੍ਰਾਊਨ ਪ੍ਰਿੰਸ ਨੇ ਕਿਹਾ ਕਿ ਦੇਸ਼ ਦੇ ਫੌਜ ਮੁੱਖੀ ਕੱਲ੍ਹ ਤੜਕੇ ਉਨ੍ਹਾਂ ਕੋਲ ਆਏ ਅਤੇ ਦੱਸਿਆ ਕਿ ਉਨ੍ਹਾਂ ਨੂੰ ਬਾਹਰ ਜਾਣ, ਲੋਕਾਂ ਨਾਲ ਗੱਲਬਾਤ ਕਰਨ ਜਾਂ ਉਨ੍ਹਾਂ ਨਾਲ ਮੁਲਾਕਾਤ ਕਰਨ ਦੀ ਇਜਾਜ਼ਤ ਨਹੀਂ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਦਾ ਫ਼ੋਨ ਅਤੇ ਇੰਟਰਨੈਟ ਸੇਵਾਵਾਂ ਬੰਦ ਕਰ ਦਿੱਤੀਆਂ ਗਈਆਂ ਹਨ। ਉਹ ਸੈਟੇਲਾਈਟ ਇੰਟਰਨੈਟ ਰਾਹੀਂ ਗੱਲ ਕਰ ਰਹੇ ਹਨ ਅਤੇ ਉਨ੍ਹਾਂ ਨੂੰ ਇਹ ਸੇਵਾ ਵੀ ਬੰਦ ਹੋ ਜਾਣ ਦਾ ਡਰ ਹੈ। ਬੀ ਬੀ ਸੀ ਨੇ ਦੱਸਿਆ ਕਿ ਉਸ ਨੂੰ ਹਮਜ਼ਾ ਦੇ ਵਕੀਲ ਤੋਂ ਇਹ ਬਿਆਨ ਮਿਲਿਆ ਹੈ। ਹਮਜ਼ਾ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਦੱਸਿਆ ਗਿਆ ਕਿ ਉਨ੍ਹਾਂ ਨੂੰ ਉਨ੍ਹਾਂ ਬੈਠਕਾਂ ਵਿੱਚ ਸ਼ਾਮਲ ਹੋਣ ਦੀ ਸਜ਼ਾ ਮਿਲੀ ਹੈ, ਜਿੱਥੇ ਰਾਜਾ ਦੀ ਆਲੋਚਨਾ ਕੀਤੀ ਗਈ ਸੀ। ਉਨ੍ਹਾਂ ਉੱਤੇ ਆਲੋਚਨਾ ਵਿੱਚ ਸ਼ਾਮਲ ਹੋਣ ਦਾ ਦੋਸ਼ ਨਹੀਂ। ਜਾਰਡਨ ਵਿੱਚ ਹਮਜ਼ਾ ਲੋਕਪ੍ਰਿਯ ਹਸਤੀ ਹਨ। ਉਨ੍ਹਾਂ ਨੂੰ ਇੱਕ ਅਜਿਹੇ ਧਾਰਮਿਕ ਤੇ ਨਿਮਰ ਸ਼ਖਸ ਦੇ ਤੌਰ ਉੱਤੇ ਦੇਖਿਆ ਜਾਂਦਾ ਹੈ।