ਮਿਲਾਨ, 28 ਮਾਰਚ (ਪੋਸਟ ਬਿਊਰੋ)- ਇਟਲੀ ਇਸ ਵਕਤ ਜਿੱਥੇ ਕੋਰੋਨਾ ਵਾਇਰਸ ਤੋਂ ਬਹੁਤ ਜ਼ਿਆਦਾ ਪ੍ਰਭਾਵਤ ਹੈ, ਉਥੇ ਸਾਲ 2020 ਦੇ ਕਾਫੀ ਨਵੇਂ ਤੱਥ ਸਾਹਮਣੇ ਆ ਰਹੇ ਹਨ। ਪਤਾ ਲੱਗਾ ਹੈ ਕਿ ਸਾਲ 2020 ਵਿੱਚ ਇਟਲੀ ਦੀ ਜਨਸੰਖਿਆ ਵਿੱਚ ਪਿਛਲੇ ਸਾਲ ਨਾਲੋਂ ਕਾਫੀ ਗਿਰਾਵਟ ਆਈ ਹੈ।
ਇਸ ਸੰਬੰਧ ਵਿੱਚ ਇਟਲੀ ਦੀ ਰਾਸ਼ਟਰੀ ਅੰਕੜਾ ਏਜੰਸੀ ਇਸਤਾਂਤ ਨੇ ਬੀਤੇ ਦਿਨੀਂ ਕਿਹਾ ਕਿ ਪਿਛਲੇ ਸਾਲ ਦੇ ਸ਼ੁਰੂ ਵਿੱਚ ਇਟਲੀ ਦੀ ਆਬਾਦੀ 31 ਦਸੰਬਰ 2020 ਨੂੰ ਲਗਭਗ 3,84,000 ਘੱਟ ਸੀ। ਅੰਕੜਾ ਏਜੰਸੀ ਨੇ ਕਿਹਾ ਕਿ ਕੋਵਿਡ-19 ਮਹਾਮਾਰੀ ਦੇ ਪ੍ਰਭਾਵ ਨੇ 2015 ਤੋਂ ਪਿੱਛੋਂ ਇਟਲੀ ਦੀ ਆਬਾਦੀ ਦੇ ਘਟਦੇ ਰੁਝਾਨ ਨੂੰ ਹੋਰ ਵਧਾ ਦਿੱਤਾ ਹੈ। ਇਸਤਾਂਤ ਨੇ ਦੱਸਿਆ ਕਿ ਇਟਲੀ ਵਿੱਚ ਪਿਛਲੇ ਸਾਲ ਜਨਮ ਦਰ ਏਕੀਕਰਨ ਤੋਂ ਬਾਅਦ ਸਭ ਤੋਂ ਘੱਟ ਰਿਕਾਰਡ ਦਰਜ ਹੋਈ ਹੈ ਅਤੇ ਦੂਜੇ ਵਿਸ਼ਵ ਯੁੱਧ ਤੋਂ ਬਾਅਦ 2020 ਵਿੱਚ ਸਭ ਤੋਂ ਵੱਧ ਮੌਤਾਂ ਹੋਈਆਂ ਹਨ। ਇਸ ਵਿੱਚ ਕਿਹਾ ਗਿਆ ਹੈ ਕਿ ਪਿਛਲੇ ਸਾਲ 4,04,104 ਜਨਮ ਰਜਿਸਟਰ ਕੀਤੇ ਗਏ, ਜੋ ਸਾਲ 2019 ਤੋਂ ਲਗਭਗ 16,000 ਘੱਟ ਹਨ। ਇਹ ਹੀ ਨਹੀਂ, ਇਸਤਾਂਤ ਨੇ ਇਹ ਵੀ ਕਿਹਾ ਹੈ ਕਿ 2020 ਵਿੱਚ 7,46,146 ਮੌਤਾਂ ਰਜਿਸਟਰ ਹੋਈਆਂ, ਜੋ 2019 ਨਾਲੋਂ ਤਕਰੀਬਨ 1,12,000 ਵਧੇਰੇ ਹਨ, ਜੋ ਪਿਛਲੇ ਸਾਲ ਦੇ ਮੁਕਾਬਲੇ 17.6 ਫੀਸਦੀ ਵਧ ਹਨ।
ਵਰਨਣ ਯੋਗ ਹੈ ਕਿ ਇਟਲੀ ਵਿੱਚ ਕੋਵਿਡ 19 ਜਿੱਥੇ ਲੋਕਾਂ ਦਾ ਜਾਨੀ ਤੇ ਮਾਲੀ ਪੱਧਰ ਉੱਤੇ ਵੱਡਾ ਨੁਕਸਾਨ ਕਰ ਰਿਹਾ ਹੈ, ਉਥੇ ਇਹ ਰੋਗ ਲੋਕਾਂ ਦੇ ਵਿਆਹੁਤਾ ਜੀਵਨ ਵਿੱਚ ਖਟਾਸ ਪੈਦਾ ਕਰਨ ਵਿੱਚ ਵੱਡਾਰੋਲ ਨਿਭਾ ਰਿਹਾ ਹੈ। ਉਂਝ ਪਿਛਲੇ ਤਿੰਨ ਦਹਾਕਿਆਂ ਤੋਂ ਪਹਿਲਾਂ ਹੀ ਨੌਜਵਾਨ ਪੀੜ੍ਹੀ ਵਿੱਚ ਵਿਆਹ ਕਰਾਉਣ ਦਾ ਰੁਝਾਨ ਘਟਨਾ ਜਾ ਰਿਹਾ ਹੈ ਇਨ੍ਹਾਂ ਸਭ ਦੇ ਚੱਲਦਿਆਂ ਇਟਲੀ ਵਿੱਚ ਬੱਚਿਆਂ ਦੀ ਜਨਮ ਦਰ ਹੇਠਾਂ ਵੱਲ ਜਾ ਰਹੀ ਹੈ।