ਇਟੋਬੀਕੋ, 26 ਨਵੰਬਰ (ਪੋਸਟ ਬਿਊਰੋ) : ਅੱਜ ਤੜ੍ਹਕੇ ਹੀ ਪੁਲਿਸ ਇਟੋਬੀਕੋ ਸਥਿਤ ਬਾਰਬੀਕਿਊ ਜੁਆਇੰਟ ਪਹੁੰਚ ਗਈ ਤਾਂ ਕਿ ਇਸ ਰੈਸਟੋਰੈਂਟ ਨੂੰ ਲਗਾਤਾਰ ਤੀਜੇ ਦਿਨ ਖੁੱਲ੍ਹਣ ਤੋਂ ਰੋਕਿਆ ਜਾ ਸਕੇ।
ਐਡਮਸਨ ਬਾਰਬੀਕਿਊ ਦੇ ਮਾਲਕ ਐਡਮ ਸਕੈਲੀ ਵੱਲੋਂ ਅੱਜ ਇੱਕ ਵਾਰੀ ਫਿਰ ਸਾਰੇ ਨਿਯਮਾਂ ਦੀ ਉਲੰਘਣਾਂ ਕਰਦਿਆਂ ਹੋਇਆਂ ਆਪਣੀ ਲੋਕੇਸ਼ਨ ਨੂੰ ਡਾਈਨ ਇਨ ਸਰਵਿਸਿਜ਼ ਲਈ ਖੋਲ੍ਹਣ ਦੀ ਆਪਣੀ ਜਿ਼ੱਦ ਨੂੰ ਪੁਗਾਉਣ ਦੀ ਕੋਸਿ਼ਸ਼ ਕੀਤੀ ਗਈ। ਇਸ ਰੈਸਟੋਰੈਂਟ ਨੂੰ ਮੰਗਲਵਾਰ ਨੂੰ ਸਿਟੀ ਵੱਲੋਂ ਜਾਰੀ ਹੁਕਮਾਂ ਦੇ ਚੱਲਦਿਆਂ ਬੰਦ ਕਰਵਾਇਆ ਗਿਆ ਸੀ। ਫਿਰ ਇਸ ਰੈਸਟੋਰੈਂਟ ਨੂੰ ਬੁੱਧਵਾਰ ਨੂੰ ਖੋਲ੍ਹਣ ਲਈ ਸਕੈਲੀ ਨੂੰ ਪ੍ਰੋਵਿੰਸ਼ੀਅਲ ਤੇ ਲੋਕਲ ਚਾਰਜਿਜ਼ ਦਾ ਸਾਹਮਣਾ ਕਰਨਾ ਪਿਆ।
ਪਰ ਇਸ ਦੇ ਬਾਵਜੂਦ ਵੀਰਵਾਰ ਨੂੰ ਵੀ ਸਕੈਲੀ ਰੈਸਟੋਰੈਂਟ ਖੋਲ੍ਹਣ ਲਈ ਬਾਜਿੱਦ ਰਹੇ। ਪਰ ਸਵੇਰੇ 6:00 ਵਜੇ ਹੀ ਪੁਲਿਸ ਮੌਕੇ ਉੱਤੇ ਪਹੁੰਚ ਗਈ। ਅਧਿਕਾਰੀ ਆਪਣੇ ਨਾਲ ਤਾਲੇ ਤੇ ਲੌਕਸਮਿੱਥਸ ਨੂੰ ਲੈ ਕੇ ਗਈ ਤੇ ਸਾਰੇ ਰੈਸਟੋਰੈਂਟ ਦੇ ਤਾਲੇ ਬਦਲ ਦਿੱਤੇ ਗਏ ਤਾਂ ਕਿ ਕੋਈ ਅੰਦਰ ਦਾਖਲ ਨਾ ਹੋ ਸਕੇ।