ਪੀਲ ਦੇ ਮੈਡੀਕਲ ਆਫੀਸਰ ਆਫ ਹੈਲਥ ਡਾæ ਲਾਰੈਂਸ ਲੋਹ ਨੇ ਬੁੱਧਵਾਰ ਨੂੰ ਇਸ ਗੱਲ ਦੀ ਪੁਸ਼ਟੀ ਕੀਤੀ ਕਿ ਰੀਜਨ ਦੇ ਟੈਸਟਿੰਗ ਭਾਈਵਾਲਾਂ ਵੱਲੋਂ ਲੋਕਾਂ ਦੇ ਟੈਸਟ ਕਰਵਾਉਣ ਲਈ ਨਾ ਆਉਣ ਦੇ ਮਾਮਲਿਆਂ ਵਿੱਚ ਹੋਏ ਵਾਧੇ ਦੀ ਰਿਪੋਰਟ ਕੀਤੀ ਹੈ| ਇੱਥੇ ਹੀ ਬੱਸ ਨਹੀਂ ਉਨ੍ਹਾਂ ਵੱਲੋਂ ਲੋਕਾਂ ਨੂੰ ਇਹ ਅਪੀਲ ਵੀ ਕੀਤੀ ਜਾ ਰਹੀ ਹੈ ਕਿ ਉਹ ਜੇ ਬਿਹਤਰ ਮਹਿਸੂਸ ਕਰ ਰਹੇ ਹੋਣ ਜਾਂ ਉਨ੍ਹਾਂ ਨੂੰ ਕੋਈ ਹੋਰ ਕੰਮ ਆ ਪਿਆ ਹੋਵੇ ਤਾਂ ਘੱਟੋ ਘੱਟ ਉਹ ਫੋਨ ਕਰਕੇ ਟੈਸਟ ਕੈਂਸਲ ਜ਼ਰੂਰ ਕਰਵਾ ਦੇਣ|
ਬਰੈਂਪਟਨ ਦੇ ਮੇਅਰ ਪੈਟ੍ਰਿਕ ਬ੍ਰਾਊਨ ਨੇ ਆਖਿਆ ਕਿ ਕੋਵਿਡ-19 ਦੀ ਬੁਕਿੰਗ ਵਿੱਚ ਦਿੱਕਤਾਂ ਆਉਣ ਦੀ ਸ਼ਿਕਾਇਤ ਕਰਨ ਵਾਲੇ ਉਨ੍ਹਾਂ ਬਰੈਂਪਟਨ ਵਾਸੀਆਂ ਨਾਂਲ ਉਨ੍ਹਾਂ ਵੱਲੋਂ ਗੱਲ ਕੀਤੀ ਗਈ ਹੈ| ਟੈਸਟਾਂ ਦੀ ਮੰਗ ਉਸ ਸਮੇਂ ਵਧੀ ਜਦੋਂ ਸਤੰਬਰ ਵਿੱਚ ਅਜਿਹੇ ਮਾਮਲਿਆਂ ਵਿੱਚ ਕਾਫੀ ਵਾਧਾ ਹੋਣਾ ਸੁæਰੂ ਹੋ ਗਿਆ| ਇਸ ਤੋਂ ਬਾਅਦ ਪ੍ਰੋਵਿੰਸ ਵੱਲੋਂ ਵਾਕ ਇਨ ਟੈਸਟਿੰਗ ਦੀ ਥਾਂ ਉੱਤੇ ਅਪੁਆਇੰਟਮੈਂਟ ਅਧਾਰਿਤ ਟੈਸਟਿੰਗ ਸ਼ੁਰੂ ਕੀਤੀ ਗਈ| ਪ੍ਰੋਵਿੰਸ਼ੀਅਲ ਸਰਕਾਰ ਅਨੁਸਾਰ ਇਸ ਦਾ ਮੁੱਖ ਟੀਚਾ ਸਿਸਟਮ ਨੂੰ ਸਟਰੀਮਲਾਈਨ ਕਰਨਾ ਤੇ ਟੈਸਟਿੰਗ ਸਬੰਧੀ ਬੈਕਲਾਗ ਖਤਮ ਕਰਨਾ ਸੀ|