ਸਿੰਗਾਪੁਰ, 12 ਜੁਲਾਈ (ਪੋਸਟ ਬਿਊਰੋ)- ਸਿੰਗਾਪੁਰ ਦੇ ਪ੍ਰਧਾਨ ਮੰਤਰੀ ਲੀ ਸਿਏਨ ਲੂੰਗ ਦੀ ਪੀਪੁਲਸ ਐਕਸ਼ਨ ਪਾਰਟੀ (ਪੀ ਏ ਪੀ) ਨੇ ਕੋਵਿਡ 19 ਮਹਾਮਾਰੀ ਵਿਚਾਲੇ ਹੋਈਆਂ ਆਮ ਚੋਣਾਂ ਵਿੱਚ ਪਾਰਲੀਮੈਂਟ ਦੀਆਂ 93 ਸੀਟਾਂ ਵਿੱਚੋਂ 83 'ਤੇ ਜਿੱਤ ਦਰਜ ਕਰ ਕੇ ਸਪੱਸ਼ਟ ਫਤਵਾ ਹਾਸਲ ਕੀਤਾ ਹੈ। ਵਿਰੋਧੀ ਦਲ ਨੇ ਰਿਕਾਰਡ 10 ਸੀਟਾਂ ਨਾਲ ਬੜ੍ਹਤ ਹਾਸਲ ਕੀਤੀ ਹੈ। ਸੱਤਾਧਾਰੀ ਪਾਰਟੀ 1965 'ਚ ਆਜ਼ਾਦੀ ਤੋਂ ਬਾਅਦ ਤੋਂ ਹੀ ਸੱਤਾ 'ਚ ਹੈ। ਉਸ ਨੇ ਚੋਣਾਂ ਵਿੱਚ 61.24 ਫੀਸਦੀ ਵੋਟਾਂ ਹਾਸਲ ਕੀਤੀਆਂ, ਜਦ ਕਿ 2015 ਵਿੱਚ ਹੋਈਆਂ ਚੋਣਾਂ 'ਚ ਉਸ ਨੂੰ 69.9 ਫੀਸਦੀ ਵੋਟਾਂ ਮਿਲੀਆਂ ਸਨ। ਲਗਭਗ 26 ਲੱਖ ਸਿੰਗਾਪੁਰ ਵਾਸੀਆਂ ਨੇ ਬੀਤੇ ਸ਼ੁੱਕਰਵਾਰ ਨੰ ਵੋਟਾਂ ਪਾਈਆਂ।
ਲੀ (68) ਨੇ ਕੱਲ੍ਹ ਸਵੇਰੇ ਇੱਕ ਪ੍ਰੈੱਸ ਬ੍ਰੀਫਿੰਗ ਵਿੱਚ ਕਿਹਾ ਕਿ ਸਾਨੂੰ ਸਪੱਸ਼ਟ ਫਤਵਾ ਮਿਲਿਆ ਹੈ, ਪਰ ਵੋਟ ਫੀਸਦੀ ਓਨਾ ਜ਼ਿਆਦਾ ਨਹੀਂ, ਜਿੰਨਾ ਮੈਨੂੰ ਅਸ ਸੀ। ਭਾਰਤੀ ਮੂਲ ਦੇ ਨੇਤਾ ਪ੍ਰੀਤਮ ਸਿੰਘ ਦੀ ਅਗਵਾਈ ਵਾਲੀ ਵਿਰੋਧੀ ਵਰਕਰਸ ਪਾਰਟੀ ਨੇ ਸੇਂਗਕਾਂਗ ਦੀ ਜੀ ਆਰ ਸੀ ਸਮੇਤ 10 ਸੀਟਾਂ 'ਤੇ ਜਿੱਤ ਦਰਜ ਕੀਤੀ ਹੈ। ਸੇਂਗਕਾਂਗ ਜੀ ਆਰ ਸੀ 'ਚ ਉਸ ਨੇ ਪ੍ਰਧਾਨ ਮੰਤਰੀ ਦਫਤਰ ਵਿੱਚ ਮੰਤਰੀ ਐਨ ਜੀ ਮੇਂਗ ਦੇ ਅਗਵਾਈ ਵਾਲੀ ਪੀ ਏ ਪੀ ਟੀਮ ਨੂੰ ਹਰਾਇਆ ਹੈ। ਪ੍ਰਧਾਨ ਮੰਤਰੀ ਨੇ ਭਰੋਸਾ ਪ੍ਰਗਟ ਕੀਤਾ ਹੈ ਕਿ ਵਰਕਰਸ ਪਾਰਟੀ ਦੇ ਭਾਰਤੀ ਮੂਲ ਦੇ ਜਨਰਲ ਸਕੱਤਰ ਪ੍ਰੀਤਮ ਸਿੰਘ ਨੂੰ ਰਸਮੀ ਤੌਰ 'ਤੇ ਵਿਰੋਧੀ ਧਿਰ ਦਾ ਨੇਤਾ ਨਾਮਜ਼ਦ ਕੀਤਾ ਜਾਏਗਾ ਅਤੇ ਉਨ੍ਹਾਂ ਨੂੰ ਇਸ ਦੇ ਲਈ ਜ਼ਰੂਰੀ ਸਹਿਯੋਗ ਦਿੱਤਾ ਜਾਏਗਾ। ਲੀ (68) ਆਂਗ ਮੋ ਕੀਓ ਦੇ ਆਪਣੇ ਗਰੁੱਪ ਚੋਣ ਖੇਤਰ (ਜੀ ਆਰ ਸੀ) ਤੋਂ ਦੁਬਾਰਾ ਚੁਣਿਆ ਗਿਆ ਹੈ। ਉਪ ਪ੍ਰਧਾਨ ਮੰਤਰੀ ਅਤੇ ਵਿੱਤ ਮੰਤਰੀ ਹੇਂਗ ਸਵੀ ਕੀਟ ਵੀ ਦੁਬਾਰਾ ਚੁਣੇ ਗਏ ਹਨ। ਵਰਕਰਸ ਪਾਰਟੀ ਨੂੰ 2015 ਦੀਆਂ ਆਮ ਚੋਣਾਂ ਨੌਂ ਸੀਟਾਂ ਮਿਲੀਆਂ ਸਨ। ਪ੍ਰੀਤਮ ਸਿੰਘ (43) ਨੇ ਕਿਹਾ ਕਿ ਕੱਲ੍ਹ ਦੇ ਨਤੀਜੇ ਹਾਂ ਪੱਖੀ ਹਨ, ਪਰ ਸਾਨੂੰ ਜ਼ਮੀਨੀ ਬੜ੍ਹਤ ਬਣਾਉਣੀ ਪਵੇਗੀ।
ਸਿੰਗਾਪੁਰ ਦੇ ਪ੍ਰਧਾਨ ਮੰਤਰੀ ਲੀ ਨੇ 93 ਵਿੱਚੋਂ 83 ਸੀਟਾਂ ਜਿੱਤੀਆਂ