ਟੋਰਾਂਟੋ, 2 ਜੁਲਾਈ (ਪੋਸਟ ਬਿਊਰੋ) : ਮਿਸਰ ਦੀ ਜੇਲ੍ਹ ਵਿੱਚ 16 ਮਹੀਨੇ ਗੁਜ਼ਾਰਨ ਤੋਂ ਬਾਅਦ ਓਕਵਿੱਲੇ ਦੇ ਵਿਅਕਤੀ ਨੂੰ ਆਖਿਰਕਾਰ ਰਿਹਾਅ ਕਰ ਦਿੱਤਾ ਗਿਆ ਤੇ ਉਹ ਕੈਨੇਡਾ ਵੀ ਪਰਤ ਆਇਆ ਹੈ।

52 ਸਾਲ ਇੰਜੀਨੀਅਰ ਯਾਸਰ ਅਲਬਾਜ਼ ਦੇ ਪਰਿਵਾਰ ਵੱਲੋਂ ਜਾਰੀ ਇੱਕ ਬਿਆਨ ਵਿੱਚ ਆਖਿਆ ਗਿਆ ਕਿ ਅਲਬਾਜ਼ ਵੀਰਵਾਰ ਸਵੇਰੇ ਟੋਰਾਂਟੋ ਪਹੁੰਚ ਗਿਆ। ਉਹ ਫਰਵਰੀ 2019 ਤੋਂ ਕਾਹਿਰਾ ਦੀ ਜੇਲ੍ਹ ਵਿੱਚ ਸੀ। ਉਸ ਨੂੰ ਬਿਜ਼ਨਸ ਟਰਿੱਪ ਤੋਂ ਘਰ ਪਰਤਦਿਆਂ ਏਅਰਪੋਰਟ ਉੱਤੇ ਹੀ ਨਜ਼ਰਬੰਦ ਕਰ ਲਿਆ ਗਿਆ ਸੀ। ਅਲਬਾਜ਼ ਕੋਲ ਦੋਹਰੀ ਨਾਗਰਿਕਤਾ ਹੈ ਤੇ ਉਹ ਕੈਨੇਡੀਅਨ ਪਾਸਪੋਰਟ ਉੱਤੇ ਸਫਰ ਕਰ ਰਿਹਾ ਸੀ।

ਉਸ ਦੀ ਧੀ, ਅਮਾਲ ਅਹਿਮਦ ਅਲਬਾਜ਼, ਨੇ ਪਹਿਲਾਂ ਆਖਿਆ ਸੀ ਕਿ ਉਨ੍ਹਾਂ ਦੇ ਪਰਿਵਾਰ ਨੂੰ ਨਹੀਂ ਪਤਾ ਕਿ ਉਨ੍ਹਾਂ ਨੂੰ ਕਿਉਂ ਨਜ਼ਰਬੰਦ ਕੀਤਾ ਗਿਆ ਹੈ। ਪਿਛਲੇ ਕੁੱਝ ਮਹੀਨਿਆਂ ਵਿੱਚ ਅਲਬਾਜ਼ ਨੂੰ ਰਿਹਾਅ ਕਰਵਾਉਣ ਦੀ ਮੰਗ ਉਸ ਸਮੇਂ ਵੱਧ ਗਈ ਸੀ ਜਦੋਂ ਉਸ ਦੀ ਧੀ ਨੇ ਦੱਸਿਆ ਸੀ ਕਿ ਅਲਬਾਜ਼ ਨੂੰ ਕੋਵਿਡ-19 ਵਰਗੇ ਲੱਛਣ ਹਨ। ਜਿਸ ਜੇਲ੍ਹ ਵਿੱਚ ਅਲਬਾਜ਼ ਨੂੰ ਰੱਖਿਆ ਗਿਆ ਸੀ ਉੱਥੇ ਸਾਫ ਸਫਾਈ ਦਾ ਕੋਈ ਖਾਸ ਪ੍ਰਬੰਧ ਨਹੀਂ ਸੀ, ਵੈਂਟੀਲੇਸ਼ਨ ਨਾ ਬਰਾਬਰ ਸੀ ਤੇ ਕੋਈ ਮੈਡੀਕਲ ਕੇਅਰ ਨਹੀਂ ਸੀ। ਅਲਬਾਜ਼ ਦੀ ਧੀ ਅਨੁਸਾਰ ਉਸ ਦੇ ਪਿਤਾ ਨੂੰ ਪਹਿਲਾਂ ਤੋਂ ਹੀ ਮੈਡੀਕਲ ਸਮੱਸਿਆਵਾਂ ਵੀ ਸਨ ਜਿਸ ਕਾਰਨ ਉਨ੍ਹਾਂ ਨੂੰ ਖਤਰਾ ਸੀ।

ਅਲਬਾਜ਼ ਨੂੰ ਵਾਪਿਸ ਲਿਆਉਣ ਵਿੱਚ ਮਦਦ ਕਰਨ ਲਈ ਪਰਿਵਾਰ ਵੱਲੋਂ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ, ਵਿਦੇਸ਼ ਮੰਤਰੀ ਫਰੈਂਕੌਇਸ ਫਿਲਿਪ ਸੈਂ਼ਪੇਨ, ਅੰਬੈਸਡਰ ਜੈਸ ਡੁਟੌਨ ਤੇ ਪਬਲਿਕ ਸਰਵਿਸਿਜ਼ ਐਂਡ ਪ੍ਰੋਕਿਓਰਮੈਂਟ ਮੰਤਰੀ ਅਨੀਤਾ ਆਨੰਦ ਦਾ ਧੰਨਵਾਦ ਕੀਤਾ ਗਿਆ ਹੈ।