ਲਾਹੌਰ, 31 ਮਈ, (ਪੋਸਟ ਬਿਊਰੋ)- ਪਾਕਿਸਤਾਨ ਦੇ ‘ਬੀਮਾਰ` ਦੱਸੇ ਜਾਂਦੇ ਸਾਬਕਾ ਪ੍ਰਧਾਨ ਮੰਤਰੀ ਨਵਾਜ਼ ਸ਼ਰੀਫ ਦੀ ਲੰਡਨ ਦੇ ਇਕ ਕੈਫੇ ਵਿਚ ਪਰਿਵਾਰ ਦੇ ਕੁਝ ਮੈਂਬਰਾਂ ਨਾਲ ਚਾਹ ਪੀਣ ਦੀ ਨਵੀਂ ਆਈ ਤਸਵੀਰ ਸੋਸ਼ਲ ਮੀਡੀਆ ਉੱਤੇ ਵਾਇਰਲ ਹੋ ਰਹੀ ਹੈ, ਜਿਸ ਨਾਲ ਉਨ੍ਹਾਂ ਦੀ ਸਿਹਤ ਉੱਤੇ ਚਰਚਾ ਅਤੇ ਰਾਜਸੀ ਬਿਆਨਬਾਜ਼ੀ ਚੱਲ ਪਈ ਹੈ। ਹਾਕਮ ਧਿਰ ਪਾਕਿਸਤਾਨ ਤਹਿਰੀਕ-ਏ-ਇਨਸਾਫ ਪਾਰਟੀ ਦੇ ਮੈਂਬਰਾਂ ਨੇ ਮੰਗ ਕੀਤੀ ਹੈ ਕਿ ਭ੍ਰਿਸ਼ਟਾਚਾਰ ਦੇ ਕੇਸ ਦਾ ਸਾਹਮਣਾ ਕਰਨ ਲਈ ਨਵਾਜ਼ ਸ਼ਰੀਫ ਨੂੰ ਫੜ ਕੇ ਛੇਤੀ ਦੇਸ਼ ਵਿਚ ਵਾਪਸ ਲਿਆਂਦਾ ਜਾਵੇ।
ਸੋਸ਼ਲ ਮੀਡੀਆ ਉੱਤੇ ਵਾਇਰਲ ਹੋਈ ਇਸ ਤਸਵੀਰ ਵਿਚ ਪਾਕਿਸਤਾਨ ਦੇ ਤਿੰਨ ਵਾਰੀਆਂ ਦੇ ਪ੍ਰਧਾਨ ਮੰਤਰੀ ਤੇ 70 ਸਾਲਾ ਰਾਜਸੀ ਨੇਤਾ ਨਵਾਜ਼ ਸ਼ਰੀਫ ਆਪਣੀਆਂ ਪੋਤੀਆਂ ਨਾਲ ਸੜਕ ਕਿਨਾਰੇ ਇਕ ਕੈਫੇ ਵਿਚ ਬੈਠੇ ਦਿੱਸ ਰਹੇ ਹਨ। ਉਨ੍ਹਾਂ ਨੀਲੇ ਰੰਗ ਦੀ ਸਲਵਾਰ ਕਮੀਜ਼ ਪਹਿਨਣ ਦੇ ਨਾਲ ਟੋਪੀ ਪਾਈ ਹੈ ਤੇ ਉਨ੍ਹਾਂ ਦੀ ਸਿਹਤ ਬਿਹਤਰ ਦਿੱਸਦੀ ਹੈ।
ਇਸ ਪਿੱਛੋਂ ਪਾਕਿਸਤਾਨ ਦੇ ਕੁਝ ਮੰਤਰੀਆਂ ਨੇ ਨਵਾਜ਼ ਸ਼ਰੀਫ ਦੀ ਬਿਮਾਰੀ ਗੰਭੀਰ ਹੋਣ ਬਾਰੇ ਸ਼ੱਕ ਨਾਲ ਕਿਹਾ ਕਿ ਸ਼ਰੀਫ ਲੰਡਨ ਦੀਆਂ ਸੜਕਾਂ ਉੱਤੇ ਘੁੰਮਦਾ ਅਤੇ ਕੋਵਿਡ-19 ਦੀ ਮਹਾਮਾਰੀ ਦੌਰਾਨ ਮਾਸਕ ਲਾਉਣਾ ਵੀ ਠੀਕ ਨਹੀਂ ਮੰਨਦਾ। ਕੇਂਦਰੀ ਮੰਤਰੀ ਫਵਾਦ ਚੌਧਰੀ ਨੇ ਕਿਹਾ ਕਿ ਕੈਫੇ ਵਿਚ ਚਾਹ ਪੀਂਦੇ ਨਵਾਜ਼ ਸ਼ਰੀਫ ਦੀ ਤਸਵੀਰ ਨੇ ਸਾਡੇ ਦੇਸ਼ ਦੀ ਕਾਨੂੰਨ, ਨਿਆ ਤੇ ਨਿਆਂ ਵਿਵਸਥਾ ਦਾ ਜਲੂਸ ਕੱਢ ਦਿੱਤਾ ਹੈ।
ਦੂਸਰੇ ਪਾਸੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਦੇ ਸਲਾਹਕਾਰ ਸ਼ਾਹਬਾਜ਼ ਗਿੱਲ ਨੇ ਕਿਹਾ ਕਿ ਕੋਰਟ ਵਿਚ ਝੂਠ ਬੋਲ ਕੇ ਨਵਾਜ਼ ਸ਼ਰੀਫ ਵਿਦੇਸ਼ ਗਏ ਹੋਏ ਹਨ। ਗਿੱਲ ਨੇ ਕਿਹਾ ਕਿ ਸ਼ਰੀਫ ਪਰਿਵਾਰ ਸੋਚਦਾ ਹੈ ਕਿ ਲੋਕ ਮੂਰਖ ਹਨ। ਉਨ੍ਹਾਂ ਨੇ ਸ਼ਰੀਫ ਨੂੰ ਕਿਹਾ ਕਿ ਉਹ ਪਾਕਿਸਤਾਨ ਆ ਕੇ ਆਪਣੇ ਖਿਲਾਫ ਭ੍ਰਿਸ਼ਟਾਚਾਰ ਦੇ ਕੇਸ ਭੁਗਤਣ। ਪੰਜਾਬ ਦੇ ਸੂਚਨਾ ਮੰਤਰੀ ਫੈਯਾਜੁਲ ਹਸਨ ਚੌਹਾਨ ਨੇ ਕਿਹਾ ਕਿ ਸ਼ਰੀਫ ਲੰਡਨ ਦੀਆਂ ਸੜਕਾਂ ਉੱਤੇ ਮਾਸਕ ਬਿਨਾਂ ਕਿਵੇਂ ਘੁੰਮਦੇ ਹਨ। ਭ੍ਰਿਸ਼ਟਾਚਾਰ ਦੇ ਕੇਸ ਭੁਗਤਣ ਲਈ ਉਨ੍ਹਾਂ ਨੂੰ ਵਾਪਸ ਲਿਆਉਣਾ ਚਾਹੀਦਾ ਹੈ।