ਹਿੱਟ ਫਿਲਮਾਂ ਦੇ ਸੀਕਵਲ ਵਿੱਚ ਨਿਰਮਾਤਾਵਾਂ ਦੀ ਦਿਲਚਸਪੀ ਹਮੇਸ਼ਾ ਤੋਂ ਰਹੀ ਹੈ। ਇਸ ਸਾਲ ਦੇ ਸ਼ੁਰੂ ਵਿੱਚ ਰਿਲੀਜ਼ ਫਿਲਮ ‘ਮਲੰਗ’ ਨੂੰ ਬਾਕਸ ਆਫਿਸ 'ਤੇ ਚੰਗਾ ਹੁੰਗਾਰਾ ਮਿਲਿਆ ਸੀ। ਮੋਹਿਤ ਸੂਰੀ ਦੇ ਨਿਰਦੇਸ਼ਨ ਵਾਲੀ ਇਸ ਫਿਲਮ ਵਿੱਚ ਆਦਿੱਤਯ ਰਾਏ ਕਪੂਰ, ਦਿਸ਼ਾ ਪਟਾਨੀ, ਅਨਿਲ ਕਪੂਰ ਤੇ ਕੁਣਾਲ ਖੇਮੂ ਅਹਿਮ ਭੂਮਿਕਾ ਵਿੱਚ ਨਜ਼ਰ ਆਏ ਸਨ। ਫਿਲਮ ਨੂੰ ਓ ਟੀ ਟੀ ਪਲੇਟਫਾਰਮ 'ਤੇ ਵੀ ਰਿਲੀਜ਼ ਕੀਤਾ ਜਾ ਚੁੱਕਾ ਹੈ। ਅੱਗੋਂ ਨਿਰਮਾਤਾ ਇਸ ਦੇ ਸੀਕਵਲ ‘ਮਲੰਗ 2’ 'ਤੇ ਕੰਮ ਕਰ ਰਹੇ ਹਨ। ਇਸ ਦੀ ਪੁਸ਼ਟੀ ਨਿਰਮਾਤਾ ਅੰਕੁਰ ਗਰਗ ਨੇ ਕੀਤੀ ਹੈ।
ਅੰਕੁਰ ਦਾ ਕਹਿਣਾ ਹੈ ਕਿ ਸਿਨੇਮਾ ਘਰ ਦੇ ਬਾਅਦ ਓ ਟੀ ਟੀ ਉਤੇ ਮਿਲ ਰਹੀ ਚੰਗੀ ਪ੍ਰਤੀਕਿਰਿਆ ਨੇ ਉਨ੍ਹਾਂ ਨੂੰ ‘ਮਲੰਗ 2’ ਬਣਾਉਣ ਲਈ ਪ੍ਰੇਰਿਤ ਕੀਤਾ ਹੈ। ਮੋਹਿਤ ਸੂਰੀ ਇਸ ਫਿਲਮ ਦੀ ਅਗਲੀ ਕਿਸ਼ਤ 'ਤੇ ਕੰਮ ਕਰ ਰਹੇ ਹਨ ਤੇ ਦੱਸਿਆ ਜਾਂਦਾ ਹੈ ਕਿ ਬਾਕੀ ਜਾਣਕਾਰੀ ਜਲਦੀ ਹੀ ਸਾਂਝੀ ਕੀਤੀ ਜਾਵੇਗੀ। ਫਿਲਮ ‘ਮਲੰਗ’ ਵਿਚ ਆਦਿੱਤਯ ਰਾਏ ਕਪੂਰ ਸਿਵਲਰ ਸਕਰੀਨ 'ਤੇ ਪਹਿਲੀ ਵਾਰ ਧਮਾਕੇਦਾਰ ਐਕਸ਼ਨ ਕਰਦੇ ਨਜ਼ਰ ਆਏ ਸਨ। ਫਿਲਮ ਦੇ ਅਖੀਰ ਨੂੰ ਦੇਖਦੇ ਹੋਏ ਉਸ ਵਿੱਚ ਸੀਕਵਲ ਦੀਆਂ ਭਰਪੂਰ ਸੰਭਾਵਨਾਵਾਂ ਸਨ।