ਓਨਟਾਰੀਓ, 6 ਨਵੰਬਰ (ਪੋਸਟ ਬਿਊਰੋ) : ਸਾਬਕਾ ਪ੍ਰੋਗਰੈਸਿਵ ਕੰਜ਼ਰਵੇਟਿਵ ਕੈਬਨਿਟ ਮੰਤਰੀ ਤੇ ਅਹਿਮ ਸਹਾਇਕ ਖਿਲਾਫ ਲੱਗੇ ਦੋਸ਼ਾਂ ਸਬੰਧੀ ਬਰਾਬਰ ਜਾਂਚ ਕਰਵਾਉਣ ਦੀ ਗੁੰਜਾਇਸ਼ ਬਾਬਤ ਪ੍ਰੀਮੀਅਰ ਡੱਗ ਫੋਰਡ ਦੀ ਸਰਕਾਰ ਨੇ ਚੁੱਪ ਧਾਰ ਰੱਖੀ ਹੈ।
ਕੁਈਨਜ਼ ਪਾਰਕ ਵਿਖੇ ਪਾਰਦਰਸ਼ਤਾ ਵਿੱਚ ਵਾਧਾ ਕੀਤੇ ਜਾਣ ਦੇ ਫੋਰਡ ਵੱਲੋਂ ਪ੍ਰਗਟਾਏ ਤਹੱਈਏ ਦੇ ਬਾਵਜੂਦ ਜਿੰਮ ਵਿਲਸਨ ਵੱਲੋਂ ਸ਼ੁੱਕਰਵਾਰ ਨੂੰ ਅਤੇ ਐਂਡਰਿਊ ਕਿੰਬਰ ਵੱਲੋਂ ਅਚਾਨਕ ਦਿੱਤੇ ਗਏ ਅਸਤੀਫੇ ਤੋਂ ਟੋਰੀਜ਼ ਵੀ ਹੈਰਾਨ ਹਨ। ਇਨ੍ਹਾਂ ਅਸਤੀਫਿਆਂ ਤੋਂ ਬਾਅਦ ਮੰਗਲਵਾਰ ਨੂੰ ਐਨਡੀਪੀ ਐਮਪੀਪੀ ਸਾਰਾ ਸਿੰਘ ਨੇ ਦੋਸ਼ ਲਾਇਆ ਕਿ ਟੋਰੀਜ਼ ਜਾਣਬੁੱਝ ਕੇ ਓਨਟਾਰੀਓ ਵਾਸੀਆਂ ਨੂੰ ਗੁੰਮਰਾਹ ਕਰਨ ਦੀ ਕੋਸਿ਼ਸ਼ ਕਰ ਰਹੇ ਹਨ। ਵਿਲਸਨ ਦੇ ਸ਼ਰਾਬ ਦੀ ਲਤ ਨਾਲ ਸਿੱਝਣ ਲਈ ਅਸਤੀਫਾ ਦੇਣ ਤੇ ਪੀਸੀ ਕਾਕਸ ਛੱਡਣ ਪਿੱਛੇ ਕੋਈ ਹੋਰ ਕਾਰਨ ਜਿ਼ੰਮੇਵਾਰ ਹੈ।
ਸਾਰਾ ਸਿੰਘ ਨੇ ਆਖਿਆ ਕਿ ਅੱਜ ਪੰਜ ਦਿਨ ਹੋ ਗਏ ਹਨ ਜਦੋਂ ਫੋਰਡ ਸਰਕਾਰ ਵੱਲੋਂ ਮੀਡੀਆ ਬਿਆਨ ਜਾਰੀ ਕਰਕੇ ਵਿਲਸਨ ਦੇ ਅਸਤੀਫਾ ਦੇਣ ਦੇ ਅਸਲ ਕਾਰਨ ਜਿਨਸੀ ਸ਼ੋਸ਼ਣ ਉੱਤੇ ਪਰਦਾ ਪਾਉਣ ਦੀ ਕੋਸਿ਼ਸ਼ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਆਖਿਆ ਕਿ ਇਸ ਜਾਣਕਾਰੀ ਨੂੰ ਦਬਾਅ ਲਿਆ ਗਿਆ ਹੈ। ਜਿ਼ਕਰਯੋਗ ਹੈ ਕਿ ਚਿਲਡਰਨ, ਕਮਿਊਨਿਟੀ ਸਰਵਿਸਿਜ਼ ਤੇ ਵੁਮਨਜ਼ ਇਸ਼ੂਜ਼ ਬਾਰੇ ਮੰਤਰੀ ਲੀਜ਼ਾ ਮੈਕਲਿਓਡ ਵੱਲੋਂ ਸੋਮਵਾਰ ਨੂੰ ਤੀਜੀ ਪਾਰਟੀ ਤੋਂ ਜਾਂਚ ਕਰਵਾਉਣ ਦੀ ਵੀ ਪੁਸ਼ਟੀ ਕੀਤੀ ਗਈ।
ਆਪਣਾ ਨਾਂ ਗੁਪਤ ਰੱਖਣ ਦੀ ਸ਼ਰਤ ਉੱਤੇ ਟੋਰੀਜ਼ ਦੇ ਜਾਣਕਾਰ ਨੇ ਆਖਿਆ ਕਿ ਦੋ ਖਾਸ ਵਿਅਕਤੀਆਂ ਦਾ ਇਸ ਤਰ੍ਹਾਂ ਚਲੇ ਜਾਣ ਨਾਲ ਫੋਰਡ ਨੂੰ ਕਾਫੀ ਦਿੱਕਤ ਹੋ ਰਹੀ ਹੈ ਕਿਉਂਕਿ ਉਨ੍ਹਾਂ ਦੇ ਫੈਸਲਿਆਂ ਉੱਤੇ ਪ੍ਰੀਮੀਅਰ ਨੇ ਭਰੋਸਾ ਕੀਤਾ ਤੇ ਉਨ੍ਹਾਂ ਦੇ ਤਜਰਬਿਆਂ ਦੀ ਸ਼ਲਾਘਾ ਵੀ ਕੀਤੀ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਜਦੋਂ ਫੋਰਡ ਕਿਸੇ ਨਵੇਂ ਮੰਤਰੀ ਦੀ ਸਲਾਹ ਤੋਂ ਅਸੰਤੁਸ਼ਟ ਹੁੰਦੇ ਸਨ ਤਾਂ ਉਹ ਇਨ੍ਹਾਂ ਦੋਵਾਂ ਖਾਸ ਵਿਅਕਤੀਆਂ ਤੋਂ ਹੀ ਸਲਾਹ ਲਿਆ ਕਰਦੇ ਸਨ। ਪ੍ਰੀਮੀਅਰ ਦੇ ਆਫਿਸ ਵੱਲੋਂ ਦੋਸ਼ਾਂ ਦੀ ਕਿਸਮ ਜਾਂ ਉਨ੍ਹਾਂ ਦੀ ਜਾਂਚ ਕੌਣ ਕਰ ਰਿਹਾ ਹੈ, ਬਾਰੇ ਖੁਲਾਸਾ ਕਰਨ ਤੋਂ ਟਾਲਾ ਵੱਟਿਆ ਜਾ ਰਿਹਾ ਹੈ।