ਉਡੀਸਾ, 30 ਮਈ (ਪੋਸਟ ਬਿਊਰੋ): ਉਡੀਸਾ `ਚ ਵਿਜੀਲੈਂਸ ਅਧਿਕਾਰੀਆਂ ਨੇ ਸ਼ੁੱਕਰਵਾਰ ਨੂੰ ਇੱਕ ਸਰਕਾਰੀ ਇੰਜੀਨੀਅਰ ਦੇ ਦੋ ਫਲੈਟਾਂ ਤੋਂ 2 ਕਰੋੜ ਰੁਪਏ ਦੀ ਨਕਦੀ ਅਤੇ ਗਹਿਣੇ ਬਰਾਮਦ ਕੀਤੇ। ਜਦੋਂ ਆਮਦਨ ਤੋਂ ਵੱਧ ਜਾਇਦਾਦ ਦੇ ਮਾਮਲੇ ਦੀ ਜਾਂਚ ਕਰਨ ਪਹੁੰਚੀ ਟੀਮ ਨੇ ਇੰਜੀਨੀਅਰ ਦੇ ਫਲੈਟ ਦੀ ਤਲਾਸ਼ੀ ਲਈ ਤਾਂ ਨੋਟਾਂ ਦੇ ਬੰਡਲ ਮਿਲਣੇ ਸ਼ੁਰੂ ਹੋ ਗਏ। ਇਸ ਦੌਰਾਨ, ਅਧਿਕਾਰੀਆਂ ਨੂੰ ਆਉਂਦੇ ਦੇਖ ਕੇ ਇੰਜੀਨੀਅਰ ਨੇ ਖਿੜਕੀ ‘ਚੋਂ 500 ਰੁਪਏ ਦੇ ਨੋਟਾਂ ਦੇ ਬੰਡਲ ਸੁੱਟਣੇ ਸ਼ੁਰੂ ਕਰ ਦਿੱਤੇ। ਹਾਲਾਂਕਿ, ਬਾਅਦ ‘ਚ ਇਹ ਬਰਾਮਦ ਕਰ ਲਏ ਗਏ। ਉਕਤ ਮਾਮਲੇ ‘ਚ ਵਿਜੀਲੈਂਸ ਅਧਿਕਾਰੀਆਂ ਦੀ ਜਾਂਚ ਜਾਰੀ ਹੈ।
ਸ਼ੁੱਕਰਵਾਰ ਨੂੰ ਉਡੀਸਾ ਪੁਲਿਸ ਦੀ ਭ੍ਰਿਸ਼ਟਾਚਾਰ ਵਿਰੋਧੀ ਸ਼ਾਖਾ ਅਤੇ ਵਿਜੀਲੈਂਸ ਵਿਭਾਗ ਨੇ ਪਲਾਨ ਰੋਡਜ਼ ਆਰਡਬਲਯੂ ਡਿਵੀਜ਼ਨ, ਭੁਵਨੇਸ਼ਵਰ ਦੇ ਮੁੱਖ ਇੰਜੀਨੀਅਰ, ਬੈਕੁੰਠ ਨਾਥ ਸਾਰੰਗੀ ਦੇ ਘਰ ਅਤੇ ਦਫ਼ਤਰ ‘ਤੇ ਛਾਪਾ ਮਾਰਿਆ। ਇਸ ਦੌਰਾਨ ਭੁਵਨੇਸ਼ਵਰ ਵਿੱਚ ਉਨ੍ਹਾਂ ਦੇ ਫਲੈਟ ਤੋਂ ਲਗਭਗ 1 ਕਰੋੜ ਰੁਪਏ ਦੀ ਨਕਦੀ ਬਰਾਮਦ ਕੀਤੀ , ਜਦੋਂ ਕਿ ਅੰਗੁਲ ‘ਚ ਸਾਰੰਗੀ ਦੇ ਘਰ ਤੋਂ 1.1 ਕਰੋੜ ਰੁਪਏ ਬਰਾਮਦ ਕੀਤੇ ਗਏ।
ਅਧਿਕਾਰੀਆਂ ਨੇ ਦੱਸਿਆ ਕਿ ਵਿਜੀਲੈਂਸ ਅਧਿਕਾਰੀਆਂ ਨੂੰ ਦੇਖ ਕੇ, ਸਾਰੰਗੀ ਨੇ ਭੁਵਨੇਸ਼ਵਰ ‘ਚ ਆਪਣੇ ਫਲੈਟ ਦੀ ਖਿੜਕੀ ‘ਚੋਂ 500 ਰੁਪਏ ਦੇ ਨੋਟ ਸੁੱਟ ਦਿੱਤੇ। ਇਹ ਨਕਦੀ ਗਵਾਹਾਂ ਦੀ ਮੌਜੂਦਗੀ ‘ਚ ਬਰਾਮਦ ਕੀਤੀ। ਸਾਰੰਗੀ ‘ਤੇ ਆਮਦਨ ਤੋਂ ਵੱਧ ਜਾਇਦਾਦ ਰੱਖਣ ਦਾ ਦੋਸ਼ ਸੀ।
ਸਪੈਸ਼ਲ ਜੱਜ ਵਿਜੀਲੈਂਸ ਵੱਲੋਂ ਵਾਰੰਟ ਜਾਰੀ ਕੀਤੇ ਜਾਣ ਤੋਂ ਬਾਅਦ ਛਾਪੇਮਾਰੀ ਇੱਕੋ ਸਮੇਂ ਕੀਤੀ ਜਾ ਰਹੀ ਹੈ। ਇੱਕ ਅਧਿਕਾਰੀ ਨੇ ਦੱਸਿਆ ਕਿ ਵਿਜੀਲੈਂਸ ਟੀਮ ਨੇ ਅੰਗੁਲ ਦੇ ਕਰਦਾਗਡੀਆ ਵਿਖੇ ਇੱਕ ਦੋ ਮੰਜ਼ਿਲਾ ਰਿਹਾਇਸ਼ੀ ਘਰ, ਭੁਵਨੇਸ਼ਵਰ ਅਤੇ ਪੁਰੀ ਜ਼ਿਲ੍ਹੇ ਦੇ ਪਿਪਿਲੀ ਦੇ ਸਿਉਲਾ ਵਿਖੇ ਫਲੈਟਾਂ ਦਾ ਪਤਾ ਲਗਾਇਆ। ਸਾਰੰਗੀ ਦੇ ਜੱਦੀ ਘਰ ਅਤੇ ਅੰਗੁਲ ਜਿ਼ਲ੍ਹੇ `ਚ ਉਸਦੇ ਰਿਸ਼ਤੇਦਾਰਾਂ ਦੇ ਘਰਾਂ ਦੀ ਵੀ ਤਲਾਸ਼ੀ ਲਈ ਗਈ। ਭੁਵਨੇਸ਼ਵਰ `ਚ ਆਰਡੀ ਪਲੈਨਿੰਗ ਅਤੇ ਰੋਡ ਦੇ ਮੁੱਖ ਇੰਜੀਨੀਅਰ ਦੇ ਦਫ਼ਤਰ ‘ਤੇ ਵੀ ਛਾਪੇਮਾਰੀ ਕੀਤੀ ਜਾ ਰਹੀ ਹੈ।