ਟੋਰਾਂਟੋ, 24 ਅਕਤੂਬਰ (ਪੋਸਟ ਬਿਊਰੋ): ਪੁਲਿਸ ਦਾ ਕਹਿਣਾ ਹੈ ਕਿ ਟੋਰਾਂਟੋ ਦੇ ਉੱਤਰ ਵਿੱਚ ਮੰਗਲਵਾਰ ਨੂੰ ਨੋਬਲਟਨ, ਓਂਟਾਰੀਓ ਵਿੱਚ ਇੱਕ ਘਰ ਵਿੱਚ ਦਿਨੇ ਸੇਂਧਮਾਰੀ ਕਰਕੇ ਭੱਜਣ ਦੀ ਕੋਸ਼ਿਸ਼ ਕਰਦੇ ਹੋਏ ਦੋ ਮੁਲਜ਼ਮਾਂ ਨੇ ਪੁਲਿਸ ਦੀ ਗੱਡੀ ਅਤੇ ਕਈ ਹੋਰ ਵਾਹਨਾਂ ਵਿੱਚ ਟੱਕਰ ਮਾਰੀ।
ਯਾਰਕ ਰੀਜਨਲ ਪੁਲਿਸ ਨੇ ਵੀਰਵਾਰ ਨੂੰ ਜਾਰੀ ਪ੍ਰੈੱਸ ਰਿਲੀਜ਼ ਵਿਚ ਕਿਹਾ ਕਿ ਇਹ ਘਟਨਾ ਪੈਰਾਡਾਇਜ਼ ਵੈਲੀ ਅਤੇ ਫੇਇਰਮੋਂਟ ਰਾਇਡ ਟਰੇਲਜ਼ ਕੋਲ ਇੱਕ ਘਰ ਵਿਚ ਸ਼ਾਮ 4 ਵਜੇ ਹੋਈ।
ਅਧਿਕਾਰੀ ਉਸ ਸਮੇਂ ਸੇਂਧਮਾਰੀ ਦੀ ਕਾਲ ਲਈ ਇਲਾਕੇ ਵਿੱਚ ਪਹੁੰਚੇ ਤਾਂ ਦੋਵੇਂ ਮੁਲਜ਼ਮਾਂ ਨੇ ਭੱਜਣ ਦੀ ਕੋਸ਼ਿਸ਼ ਕੀਤੀ। ਪੁਲਿਸ ਨੇ ਕਿਹਾ ਕਿ ਸ਼ੱਕੀਆਂ ਨੇ ਕਈ ਵਾਹਨਾਂ ਨੂੰ ਟੱਕਰ ਮਾਰਨ ਤੋਂ ਪਹਿਲਾਂ ਆਪਣੀ ਗੱਡੀ ਨੂੰ ਪੁਲਿਸ ਦੀ ਗੱਡੀ ਵਿੱਚ ਮਾਰਿਆ। ਮੁਲਜ਼ਮ ਕਾਰ ਨੂੰ ਛੱਡ ਕੇ ਪੈਦਲ ਹੀ ਘਟਨਾ ਸਥਾਨ ਤੋਂ ਭੱਜ ਗਏ। ਕੁੱਝ ਸਮੇਂ ਬਾਅਦ ਇੱਕ ਸ਼ੱਕੀ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ। ਪੁਲਿਸ ਨੇ ਕਿਹਾ ਕਿ ਛੱਡੇ ਗਏ ਵਾਹਨ ਕੋਲ ਇੱਕ ਗੰਨ ਬਰਾਮਦ ਕੀਤੀ ਗਈ।
ਜਸੰਥਨ ਕੰਡਿਆਹ `ਤੇ ਇਸ ਘਟਨਾ ਦੇ ਸਿਲਸਿਲੇ ਵਿੱਚ 10 ਚਾਰਜਿਜ਼ ਲਗਾਏ ਗਏ ਹਨ, ਜਿਨ੍ਹਾਂ ਵਿੱਚ ਜਾਣਬੁੱਝਕੇ ਤੋੜਫੋੜ ਕਰਨਾ, ਲੋਡੇਡ ਪ੍ਰਤੀਬੰਧਿਤ ਬੰਦੂਕ ਰੱਖਣਾ ਅਤੇ ਸਸਪੈਂਡ ਦੌਰਾਨ ਗੱਡੀ ਚਲਾਉਣਾ ਸ਼ਾਮਿਲ ਹੈ। ਪੁਲਿਸ ਨੇ ਕਿਹਾ ਕਿ ਕੰਡਿਆਹ ਦੀ ਗ੍ਰਿਫ਼ਤਾਰੀ ਸਮੇਂ ਉਸ `ਤੇ ਤਿੰਨ ਵਾਰ ਪਹਿਲਾਂ ਤੋਂ ਹੀ ਹਥਿਆਰ ਪਾਬੰਦੀ ਦੇ ਹੁਕਮ ਲਾਗੂ ਸਨ।ਦੂਜੇ ਸ਼ੱਕੀ ਬਾਰੇ ਜਾਣਕਾਰੀ ਜਾਰੀ ਨਹੀਂ ਕੀਤੀ ਗਈ।