ਦਰਹਾਮ, 14 ਮਈ (ਪੋਸਟ ਬਿਊਰੋ) : ਐਜੈਕਸ ਸਕੂਲ ਦੇ ਬਾਹਰ ਐਂਟੀ ਬਲੈਕ ਤੇ ਅਪਮਾਨਜਨਕ ਤਸਵੀਰਾਂ ਵਾਲੇ ਫਲਾਇਰਜ਼ ਲਾਉਣ ਵਾਲੇ ਤਿੰਨ ਟੀਨੇਜਰਜ਼ ਨੂੰ ਚਾਰਜਿਜ਼ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਈਗਲ ਰਿੱਜ ਪਬਲਿਕ ਸਕੂਲ ਦੇ ਸਟਾਫ ਨੂੰ ਇਨ੍ਹਾਂ ਫਲਾਇਰਜ਼ ਬਾਰੇ 11 ਮਈ ਨੂੰ ਜਾਣਕਾਰੀ ਮਿਲੀ। ਕੁੱਝ ਵਿਦਿਆਰਥੀਆਂ ਨੇ ਪਾਇਆ ਕਿ ਇੱਕ ਫਲਾਇਰ ਸਕੂਲ ਦੀ ਪ੍ਰਾਪਰਟੀ ਉੱਤੇ ਲੱਗਿਆ ਹੋਇਆ ਸੀ। ਦਰਹਾਮ ਪੁਲਿਸ ਨੇ ਸਕੂਲ ਦੇ ਰਿਸੋਰਸ ਅਧਿਕਾਰੀਆਂ ਨਾਲ ਮਿਲ ਕੇ ਇਸ ਮਾਮਲੇ ਦੀ ਜਾਂਚ ਸ਼ੁਰੂ ਕੀਤੀ ਤੇ ਸਰਵੇਲੈਂਸ ਵੀਡੀਓ ਚੈੱਕ ਕਰਨ ਦੇ ਨਾਲ ਨਾਲ ਚਸ਼ਮਦੀਦਾਂ ਨਾਲ ਗੱਲਬਾਤ ਕਰਨੀ ਵੀ ਸ਼ੁਰੂ ਕੀਤੀ।
ਫਲਾਇਰ ਦੀ ਫੋਟੋ ਤੋਂ ਪਤਾ ਲੱਗਿਆ ਕਿ ਉਸ ਉੱਤੇ ਅਪਮਾਨਜਨਕ ਤਸਵੀਰਾਂ ਦੇ ਨਾਲ ਨਾਲ ਐਂਟੀ ਬਲੈਕ ਟਿੱਪਣੀਆਂ ਵੀ ਕੀਤੀਆਂ ਗਈਆਂ ਸਨ। ਹੋਰ ਜਾਣਕਾਰੀ ਲਈ ਲੋਕਾਂ ਨੂੰ ਜਿਨ੍ਹਾਂ ਨੰਬਰਾਂ ਉੱਤੇ ਕਾਲ ਕਰਨ ਲਈ ਆਖਿਆ ਗਿਆ ਸੀ ਉਹ ਦੋ ਕੁੜੀਆਂ ਦੇ ਸਨ, ਜਿਨ੍ਹਾਂ ਨੂੰ ਇਹ ਨਹੀਂ ਸੀ ਪਤਾ ਕਿ ਉਨ੍ਹਾਂ ਦੇ ਨੰਬਰ ਲਿਸਟਿਡ ਹਨ। ਮੁੱਢਲੀ ਜਾਂਚ, ਸਰਵੇਲੈਂਸ ਵੀਡੀਓ ਦਾ ਮੁਲਾਂਕਣ ਕਰਨ ਤੇ ਲੋਕਾਂ ਦੇ ਬਿਆਨ ਸੁਣਨ ਤੋਂ ਬਾਅਦ ਇਹੋ ਸਾਹਮਣੇ ਆਇਆ ਕਿ ਇਸ ਹਰਕਤ ਦਾ ਕਾਰਨ ਇਨ੍ਹਾਂ ਦੋਵਾਂ ਲੜਕੀਆਂ ਨੂੰ ਨੁਕਸਾਨ ਪਹੁੰਚਾਉਣਾ ਸੀ।
ਇਸ ਮਾਮਲੇ ਦੇ ਸਬੰਧ ਵਿੱਚ ਐਜੈਕਸ ਦੇ 15, 17 ਤੇ 18 ਸਾਲਾ ਟੀਨੇਜਰਜ਼ ਨੂੰ ਚਾਰਜ ਕੀਤਾ ਗਿਆ ਹੈ ਤੇ ਉਨ੍ਹਾਂ ਉੱਤੇ ਤੰਗ ਪਰੇਸ਼ਾਨ ਕਰਨ ਤੇ ਰਪੀਟ ਟੈਲੀਕਮਿਊਨਿਕੇਸ਼ਨਜ਼ ਰਾਹੀਂ ਪਰੇਸ਼ਾਨ ਕਰਨ ਦੇ ਚਾਰਜਿਜ਼ ਲਾਏ ਗਏ ਹਨ। ਇਸ ਮਾਮਲੇ ਦੀਆਂ ਸਿ਼ਕਾਰ ਲੜਕੀਆਂ ਦੀ ਹਿਫਾਜ਼ਤ ਲਈ 18 ਸਾਲਾ ਮਸ਼ਕੂਕ ਦੇ ਨਾਂ ਦਾ ਖੁਲਾਸਾ ਵੀ ਨਹੀਂ ਕੀਤਾ ਗਿਆ। ਯੂਥ ਕ੍ਰਿਮੀਨਲ ਜਸਟਿਸ ਐਕਟ ਕਾਰਨ ਬਾਕੀ ਦੋਵਾਂ ਦੇ ਨਾਂ ਵੀ ਨਹੀਂ ਲਏ ਜਾ ਸਕਦੇ।