ਓਟਵਾ, 4 ਮਈ (ਪੋਸਟ ਬਿਊਰੋ) : ਪਬਲਿਕ ਸੈਕਟਰ ਯੂਨੀਅਨ, ਜਿਹੜੀ ਕੈਨੇਡਾ ਰੈਵਨਿਊ ਏਜੰਸੀ ਦੇ ਮੁਲਾਜ਼ਮਾਂ ਦੀ ਨੁਮਾਇੰਦਗੀ ਕਰਦੀ ਹੈ, ਤੇ ਫੈਡਰਲ ਸਰਕਾਰ ਵੱਲੋਂ ਨਵੇਂ ਸਮਝੌਤੇ ਉੱਤੇ ਦਸਤਖ਼ਤ ਕਰ ਲਏ ਗਏ ਹਨ। ਇਸ ਨਾਲ ਹੜਤਾਲ ਵੀ ਖ਼ਤਮ ਹੋ ਗਈ ਹੈ।
ਇੱਥੇ ਦੱਸਣਾ ਬਣਦਾ ਹੈ ਕਿ ਕੈਨੇਡਾ ਰੈਵਨਿਊ ਏਜੰਸੀ ਦੇ 35000 ਮੁਲਾਜ਼ਮ ਹੜਤਾਲ ਉੱਤੇ ਚੱਲ ਰਹੇ ਸਨ ਜਦਕਿ ਕੁੱਲ ਮਿਲਾ ਕੇ 120000 ਪਬਲਿਕ ਸਰਵੈਂਟਸ ਹੜਤਾਲ ਉੱਤੇ ਸਨ। ਸਰਕਾਰ ਤੇ ਪਬਲਿਕ ਸਰਵਿਸ ਅਲਾਇੰਸ ਆਫ ਕੈਨੇਡਾ ਵੱਲੋਂ ਡੀਲ ਸਿਰੇ ਚੜ੍ਹਾਉਣ ਨਾਲ ਇਹ ਹੜਤਾਲ ਮੁੱਕੀ। ਸੀਐਸਏਸੀਜ਼ ਯੂਨੀਅਨ ਆਫ ਟੈਕਸੇਸ਼ਨ ਇੰਪਲੌਈਜ਼ ਦੀ ਨੁਮਾਇੰਦਗੀ ਵਾਲੇ ਸੀਆਰਏ ਕਰਮਚਾਰੀ ਅਜੇ ਵੀ ਹੜਤਾਲ ਉੱਤੇ ਚੱਲ ਰਹੇ ਹਨ। ਯੂਨੀਅਨ ਵੱਲੋਂ ਆਪਣੇ ਮੁਲਾਜ਼ਮਾਂ ਨੂੰ 4 ਮਈ ਤੱਕ ਸਵੇਰ ਦੇ 11:30 ਵਜੇ ਤੱਕ ਕੰਮ ਉੱਤੇ ਪਰਤਣ ਲਈ ਆਖਿਆ ਜਾ ਰਿਹਾ ਹੈ।
ਇੱਕ ਬਿਆਨ ਜਾਰੀ ਕਰਕੇ ਪੀਐਸਏਸੀ ਨੇ ਆਖਿਆ ਕਿ ਤਨਖਾਹਾਂ ਵਿੱਚ ਵਾਧੇ ਉੱਤੇ ਸਹਿਮਤੀ ਬਣਨ ਤੋਂ ਬਾਅਦ ਹੀ ਡੀਲ ਸਿਰੇ ਚੜ੍ਹ ਸਕੀ।ਇਸ ਸਮਝੌਤੇ ਤਹਿਤ ਮੁਲਾਜ਼ਮਾਂ ਨੂੰ 2500 ਡਾਲਰ ਉੱਕੀ ਪੁੱਕੀ ਇੱਕਮੁਸ਼ਤ ਪੈਨਸ਼ਨ ਦੇ ਨਾਲ ਨਾਲ ਔਸਤ ਮੈਂਬਰ ਨੂੰ ਤਨਖਾਹ ਵਿੱਚ 3·6 ਫੀ ਸਦੀ ਵਾਧੇ ਉੱਤੇ ਵੀ ਸਹਿਮਤੀ ਬਣੀ ਹੈ।