ਓਨਟਾਰੀਓ, 28 ਮਾਰਚ (ਪੋਸਟ ਬਿਊਰੋ) : ਪੰਜ ਸਾਲਾ ਬੱਚੀ ਨਾਲ ਹੋਈ ਬੁਲਿੰਗ ਤੋਂ ਬਾਅਦ ਬੱਚੀ ਦੇ ਪਰਿਵਾਰ ਨੇ ਬੋਰਡ ਉੱਤੇ ਕੋਈ ਕਾਰਵਾਈ ਨਾ ਕਰਨ ਦਾ ਦੋਸ਼ ਲਾਉਂਦਿਆਂ ਹੈਮਿਲਟਨ-ਵੈਂਟਵਰਥ ਡਿਸਟ੍ਰਿਕਟ ਸਕੂਲ ਬੋਰਡ (ਐਚਡਬਲਿਊਡੀਐਸਬੀ) ਉੱਤੇ ਕੇਸ ਠੋਕ ਦਿੱਤਾ ਹੈ। ਇਸ ਘਟਨਾ ਵਿੱਚ ਬੱਚੀ ਦੇ ਹੱਥ ਦੀ ਉਂਗਲੀ ਨੂੰ ਕਾਫੀ ਨੁਕਸਾਨ ਪਹੁੰਚਿਆ ਤੇ ਉਸ ਦੀ ਉਂਗਲੀ ਦਾ ਅਗਲਾ ਹਿੱਸਾ ਕਟਵਾਉਣਾ ਪਿਆ।
ਮੰਗਲਵਾਰ ਨੂੰ ਕੀਤੀ ਗਈ ਪ੍ਰੈੱਸ ਕਾਨਫਰੰਸ ਵਿੱਚ ਬੱਚੀ ਦੀ ਮਾਂ ਸਜੈਨਿਤਾ ਮੈਰੀ ਹੈਰੀਸਨ ਨੇ ਆਖਿਆ ਕਿ ਇਹ ਘਟਨਾ ਨਵੰਬਰ 2022 ਵਿੱਚ ਸਕੂਲ ਦੇ ਵਾਸ਼ਰੂਮ ਵਿੱਚ ਵਾਪਰੀ। ਹੈਰੀਸਨ ਨੇ ਦੋਸ਼ ਲਾਇਆ ਕਿ ਪ੍ਰਿੰਸ ਆਫ ਵੇਲਜ਼ ਐਲੀਮੈਂਟਰੀ ਸਕੂਲ ਦੇ ਇੱਕ ਵਿਦਿਆਰਥੀ ਨੇ ਉਸ ਸਮੇਂ ਚਾਰ ਸਾਲਾਂ ਦੀ ਓਟਿਮ-ਰੋਜ਼ ਦੇ ਹੱਥ ਉੱਤੇ ਦਰਵਾਜ਼ਾ ਦੇ ਮਾਰਿਆ, ਜਿਸ ਕਾਰਨ ਉਸ ਦੀ ਇੱਕ ਉਂਗਲੀ ਕੁਚਲੀ ਗਈ। ਉਨ੍ਹਾਂ ਇਹ ਵੀ ਆਖਿਆ ਕਿ ਉਨ੍ਹਾਂ ਦੀ ਬੱਚੀ ਨੂੰ ਐਂਬੂਲੈਂਸ ਵਿੱਚ ਪਾ ਕੇ ਭੇਜ ਦਿੱਤਾ ਗਿਆ ਤੇ ਉਸ ਨਾਲ ਸਕੂਲ ਦਾ ਕੋਈ ਕਰਮਚਾਰੀ ਵੀ ਨਹੀਂ ਗਿਆ।
ਹੈਰੀਸਨ ਨੇ ਇਹ ਦਾਅਵਾ ਵੀ ਕੀਤਾ ਕਿ ਉਨ੍ਹਾਂ ਦੀ ਬੱਚੀ ਦੇ ਸਿਰ ਉੱਤੇ ਵੀ ਸੱਟ ਲੱਗੀ ਤੇ ਉਹ ਇਮੋਸ਼ਨਲੀ ਤੇ ਮੈਂਟਲੀ ਪਰੇਸ਼ਾਨ ਸੀ। ਉਨ੍ਹਾਂ ਦੇ ਬੱਚੇ ਦੀ ਇਸ ਹਾਲਤ ਬਾਰੇ ਉਨ੍ਹਾਂ ਨੂੰ ਹਨ੍ਹੇਰੇ ਵਿੱਚ ਰੱਖਿਆ ਗਿਆ। ਕੇਸ ਵਿੱਚ ਆਖਿਆ ਗਿਆ ਹੈ ਕਿ ਬੋਰਡ ਨੇ ਇਸ ਘਟਨਾ ਨੂੰ ਰੋਕਣ ਲਈ ਸਹੀ ਕਦਮ ਨਹੀਂ ਚੁੱਕੇ ਤੇ ਬੋਰਡ ਨੇ ਵਿਦਿਆਰਥੀਆਂ ਦੀ ਹੋ ਰਹੀ ਬੁਲਿੰਗ ਤੇ ਸੇਫਟੀ ਨੂੰ ਦਰਪੇਸ਼ ਖਤਰੇ ਨੂੰ ਅੱਖੋਂ ਪਰੋਖੇ ਕਰ ਦਿੱਤਾ।
ਹੈਰੀਸਨ ਵੱਲੋਂ ਬੋਰਡ ਦੇ ਐਗਜੈ਼ਕਟਿਵ ਮੈਂਬਰਾਂ ਤੇ ਟਰੱਸਟੀਜ਼ ਨੂੰ ਅਸਤੀਫਾ ਦੇਣ ਲਈ ਆਖਿਆ ਜਾ ਰਿਹਾ ਹੈ ਤੇ ਇਸ ਦੇ ਨਾਲ ਹੀ ਉਨ੍ਹਾਂ ਦੇ ਪਰਿਵਾਰ ਨੂੰ ਇਸ ਘਟਨਾ ਕਾਰਨ ਹੋਏ ਟਰੌਮਾ ਲਈ ਮੈਂਟਲ ਹੈਲਥ ਸਪੋਰਟ ਤੇ ਮੁਆਵਜ਼ਾ ਦੇਣ ਦੀ ਮੰਗ ਵੀ ਕੀਤੀ ਜਾ ਰਹੀ ਹੈ।ਇਸ ਦੌਰਾਨ ਹੈਮਿਲਟਨ ਸਕੂਲ ਬੋਰਡ ਨੇ ਆਖਿਆ ਕਿ ਇਸ ਤਰ੍ਹਾਂ ਦੇ ਦਾਅਵਿਆਂ ਦੀ ਪੁਸ਼ਟੀ ਕਰਨ ਤੋਂ ਉਹ ਹਾਲ ਦੀ ਘੜੀ ਅਸਮਰੱਥ ਹਨ ਤੇ ਮਾਮਲੇ ਦੀ ਆਪਣੇ ਪੱਧਰ ਉੱਤੇ ਜਾਂਚ ਕੀਤੀ ਜਾ ਰਹੀ ਹੈ।