ਬਰੈਂਪਟਨ, 9 ਮਾਰਚ (ਪੋਸਟ ਬਿਊਰੋ) : ਕਥਿਤ ਤੌਰ ਉੱਤੇ ਗੱਡੀ ਚੋਰੀ ਕਰਨ ਤੇ ਬਰੈਂਪਟਨ ਵਿੱਚ ਇੱਕ ਭਰੀ ਹੋਈ ਹੈਂਡਗੰਨ ਬਰਾਮਦ ਹੋਣ ਦੇ ਮਾਮਲੇ ਵਿੱਚ 17 ਸਾਲਾ ਲੜਕੇ ਸਮੇਤ ਪੀਲ ਰੀਜਨਲ ਪੁਲਿਸ ਵੱਲੋਂ ਪੰਜ ਵਿਅਕਤੀਆਂ ਨੂੰ ਚਾਰਜ ਕੀਤਾ ਗਿਆ ਹੈ।
ਪੁਲਿਸ ਨੇ ਦੱਸਿਆ ਕਿ 8 ਮਾਰਚ ਨੂੰ ਸ਼ਾਮੀਂ 6:00 ਵਜੇ ਤੋਂ ਬਾਅਦ ਪੁਲਿਸ ਅਧਿਕਾਰੀ ਹਾਈਵੇਅ 50 ਤੇ ਕੌਟਰੇਲ ਬੁਲੇਵਾਰਡ ਇਲਾਕੇ ਵਿੱਚ ਇੱਕ ਸ਼ੱਕੀ ਗੱਡੀ ਦੀ ਜਾਂਚ ਲਈ ਪਹੁੰਚੇ। ਜਾਂਚਕਾਰਾਂ ਨੂੰ ਪਤਾ ਲੱਗਿਆ ਕਿ ਇਹ ਕਾਰ ਚੋਰੀ ਦੀ ਹੈ। ਜਦੋਂ ਪੁਲਿਸ ਅਧਿਕਾਰੀ ਗੱਡੀ ਦੇ ਨੇੜੇ ਪਹੁੰਚੇ ਤਾਂ ਡਰਾਈਵਰ ਨੇ ਮੌਕੇ ਤੋਂ ਭੱਜਣ ਦੀ ਕੋਸਿ਼ਸ਼ ਕੀਤੀ ਤੇ ਪੁਲਿਸ ਦੀਆਂ ਕਈ ਕਾਰਾਂ ਨੂੰ ਠੋਕ ਦਿੱਤਾ। ਮੌਕੇ ਤੋਂ ਹੀ ਪੰਜ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਤੇ ਇਸ ਦੇ ਨਾਲ ਹੀ ਗੱਡੀ ਵਿੱਚੋਂ ਇੱਕ ਭਰੀ ਹੋਈ ਗੰਨ ਤੇ ਹੋਰ ਗੋਲੀ ਸਿੱਕਾ ਵੀ ਮਿਲਿਆ।
ਡਿਪਟੀ ਚੀਫ ਮਾਰਕ ਐਂਡਰਿਊਜ਼ ਨੇ ਆਖਿਆ ਕਿ ਹਾਲਾਤ ਦੀ ਨਜ਼ਾਕਤ ਤੇ ਪੋ੍ਰਫੈਸ਼ਨਲਿਜ਼ਮ ਕਾਰਨ ਸਾਡੀ 21ਵੀਂ ਡਵੀਜ਼ਨ ਦੇ ਅਧਿਕਾਰੀਆਂ ਵੱਲੋਂ ਹਿੰਸਕ ਘਟਨਾ ਨੂੰ ਵਾਪਰਨ ਤੋਂ ਬਚਾ ਲਿਆ ਗਿਆ ਤੇ ਗੰਨ ਆਪਣੇ ਕਬਜੇ ਵਿੱਚ ਲੈ ਲਈ ਗਈ।ਗ੍ਰਿਫਤਾਰ ਕੀਤੇ ਗਏ ਵਿਅਕਤੀਆਂ ਵਿੱਚੋਂ ਤਿੰਨ ਪਹਿਲਾਂ ਤੋਂ ਹੀ ਜ਼ਮਾਨਤ ਉੱਤੇ ਰਿਹਾਅ ਸਨ।ਪੁਲਿਸ ਨੇ ਗ੍ਰਿਫਤਾਰ ਕੀਤੇ ਗਏ ਵਿਅਕਤੀਆਂ ਦੀ ਪਛਾਣ ਬਰੈਂਪਟਨ ਦੇ 19 ਸਾਲਾ ਪਾਬਲੋ ਬੈਂਟਨ, ਬਰੈਂਪਟਨ ਦੇ 19 ਸਾਲਾ ਜੋਸੀਆਹ ਲੌਵੇ, 19 ਸਾਲਾ ਮੈਥਿਊ ਸਵਾਬੇ ਤੇ ਬਰੈਂਪਟਨ ਦੇ ਹੀ 18 ਸਾਲਾ ਮੁਬਾਰਕ ਇਬ੍ਰਾਹਿਮ ਵਜੋਂ ਕੀਤੀ ਹੈ।