ਟੋਰਾਂਟੋ, 30 ਜਨਵਰੀ (ਪੋਸਟ ਬਿਊਰੋ) : ਰੈਕਸਡੇਲ ਵਿੱਚ ਗੰਨ ਵਿਖਾ ਕੇ ਕਾਰਜੈਕ ਕਰਨ ਦੇ ਮਾਮਲੇ ਵਿੱਚ ਜੀਟੀਏ ਦੇ ਤਿੰਨ 15 ਸਾਲਾ ਲੜਕਿਆਂ ਨੂੰ ਗ੍ਰਿਫਤਾਰ ਤੇ ਚਾਰਜ ਕੀਤਾ ਗਿਆ ਹੈ।
ਐਤਵਾਰ ਨੂੰ ਤੜ੍ਹਕੇ 3:30 ਵਜੇ ਤੋਂ ਪਹਿਲਾਂ ਟੋਰਾਂਟੋ ਪੁਲਿਸ ਅਧਿਕਾਰੀਆਂ ਨੂੰ ਰੈਕਸਡੇਲ ਬੁਲੇਵਾਰਡ ਤੇ ਹੰਬਰਵੁੱਡ ਬੁਲੇਵਾਰਡ ਏਰੀਆ ਵਿੱਚ ਹਥਿਆਰਬੰਦ ਡਾਕੇ ਦੀ ਖਬਰ ਮਿਲੀ। ਪੁਲਿਸ ਨੇ ਦੱਸਿਆ ਕਿ ਇੱਕ ਵਿਅਕਤੀ ਅਜੇ ਆਪਣੀ ਕਾਰ ਵਿੱਚ ਬੈਠਿਆ ਹੀ ਸੀ ਕਿ ਤਿੰਨ ਲੜਕੇ ਉਸ ਕੋਲ ਪਹੁੰਚੇ। ਉਨ੍ਹਾਂ ਨੇ ਮਾਸਕ ਪਾਏ ਹੋਏ ਸਨ। ਇੱਕ ਲੜਕੇ ਨੇ ਹੈਂਡਗੰਨ ਵਿਖਾ ਕੇ ਉਸ ਵਿਅਕਤੀ ਕੋਲੋਂ ਕਾਰ ਦੀਆਂ ਚਾਬੀਆਂ ਤੇ ਉਸ ਕੋਲ ਜੋ ਵੀ ਸਮਾਨ ਸੀ, ਉਹ ਦੇਣ ਦੀ ਮੰਗ ਕੀਤੀ।
ਫਿਰ ਇਨ੍ਹਾਂ ਲੜਕਿਆਂ ਨੇ ਉਸ ਵਿਅਕਤੀ ਨੂੰ ਧੱਕੇ ਨਾਲ ਗੱਡੀ ਵਿੱਚੋਂ ਬਾਹਰ ਕੱਢ ਦਿੱਤਾ ਤੇ ਉਸ ਦੇ ਸਿਰ ਉੱਤੇ ਹੈਂਡਗੰਨ ਤਾਣ ਦਿੱਤੀ। ਤਿੰਨੇ ਮਸ਼ਕੂਕ ਕੁੱਝ ਨਕਦੀ ਤੇ ਲਾਟਰੀ ਦੀਆਂ ਟਿਕਟਾਂ ਖੋਹਣ ਵਿੱਚ ਕਾਮਯਾਬ ਹੋਏ ਪਰ ਉਹ ਗੱਡੀ ਦੀਆਂ ਚਾਬੀਆਂ ਹਾਸਲ ਨਹੀਂ ਕਰ ਸਕੇ ਤੇ ਮੌਕੇ ਤੋਂ ਪੈਦਲ ਹੀ ਫਰਾਰ ਹੋ ਗਏ। ਪੁਲਿਸ ਅਧਿਕਾਰੀਆਂ ਨੇ ਇਲਾਕੇ ਦੀ ਛਾਣਬੀਣ ਤੋਂ ਬਾਅਦ ਲੜਕਿਆਂ ਨੂੰ ਲੱਭ ਲਿਆ ਤੇ ਹਿਰਾਸਤ ਵਿੱਚ ਲੈ ਲਿਆ।
ਇਸ ਦੌਰਾਨ ਬਰੈਂਪਟਨ ਦੇ ਇੱਕ 15 ਸਾਲਾ ਲੜਕੇ ਤੇ ਮਿਸੀਸਾਗਾ ਦੇ ਦੋ 15 ਸਾਲਾ ਲੜਕਿਆਂ ਨੂੰ ਹਥਿਆਰਬੰਦ ਡਾਕਾ ਮਾਰਨ ਤੇ ਜੁਰਮ ਲਈ ਸਾਜਿਸ਼ ਰਚਣ ਵਾਸਤੇ ਚਾਰਜ ਕੀਤਾ ਗਿਆ ਹੈ।