ਓਟਵਾ, 26 ਜਨਵਰੀ (ਪੋਸਟ ਬਿਊਰੋ) : ਕੈਨੇਡਾ ਵੱਲੋਂ ਚਾਰ ਬੈਟਲ ਟੈਂਕਸ ਯੂਕਰੇਨ ਭੇਜੇ ਜਾ ਰਹੇ ਹਨ। ਇਸ ਦੇ ਨਾਲ ਹੀ ਕੈਨੇਡੀਅਨ ਆਰਮਡ ਫੋਰਸਿਜ਼ ਦੇ ਕੁੱਝ ਸੈਨਿਕਾਂ ਨੂੰ ਵੀ ਯੂਕਰੇਨ ਭੇਜਿਆ ਜਾਵੇਗਾ ਤਾਂ ਕਿ ਇਨ੍ਹਾਂ ਟੈਂਕਾਂ ਨੂੰ ਆਪਰੇਟ ਕਰਨ ਦਾ ਵੱਲ ਯੂਕਰੇਨੀਅਨ ਸੈਨਿਕਾਂ ਨੂੰ ਸਿਖਾਇਆ ਜਾ ਸਕੇ।
ਵੀਰਵਾਰ ਨੂੰ ਰੱਖਿਆ ਮੰਤਰੀ ਅਨੀਤਾ ਆਨੰਦ ਵੱਲੋਂ ਚੀਫ ਆਫ ਡਿਫੈਂਸ ਸਟਾਫ ਵੇਅਨ ਆਇਰ ਦੀ ਹਾਜ਼ਰੀ ਵਿੱਚ ਇਹ ਐਲਾਨ ਕੀਤਾ ਗਿਆ। ਇਸ ਮੌਕੇ ਉਨ੍ਹਾਂ ਇਹ ਵੀ ਆਖਿਆ ਕਿ ਚਾਰ ਲੈਪਰਡ 2 ਟੈਂਕਸ ਭੇਜਣ ਤੋਂ ਇਲਾਵਾ ਕੈਨੇਡਾ ਬਾਅਦ ਵਿੱਚ ਹੋਰ ਟੈਂਕ ਵੀ ਭੇਜ ਸਕਦਾ ਹੈ। ਰੱਖਿਆ ਮੰਤਰੀ ਨੇ ਆਖਿਆ ਕਿ ਆਉਣ ਵਾਲੇ ਹਫਤਿਆਂ ਵਿੱਚ ਟੈਂਕਾਂ ਦੀ ਡਲਿਵਰੀ ਹੋ ਜਾਵੇਗੀ ਜਦਕਿ ਟਰੇਨਰਜ਼ ਦੇ ਨਾਲ ਨਾਲ ਸਪੇਅਰ ਪਾਰਟਸ ਤੇ ਹੋਰ ਗੋਲੀ ਸਿੱਕਾ ਆਪਣੇ ਭਾਈਵਾਲਾਂ ਨਾਲ ਤਾਲਮੇਲ ਕਰਕੇ ਭੇਜ ਦਿੱਤਾ ਜਾਵੇਗਾ। ਇਸ ਸਬੰਧੀ ਟਰੇਨਿੰਗ ਕਿਸੇ ਤੀਜੇ ਦੇਸ਼ ਵਿੱਚ ਹੋਵੇਗੀ।
ਪਿਛਲੇ ਹਫਤੇ ਆਪਣੇ ਹਮਰੁਤਬਾ ਅਧਿਕਾਰੀ ਨਾਲ ਮੁਲਾਕਾਤ ਕਰਨ ਲਈ ਆਨੰਦ ਯੂਕਰੇਨ ਦੇ ਦੌਰੇ ਉੱਤੇ ਸੀ। ਉਨ੍ਹਾਂ ਆਖਿਆ ਕਿ ਇਹ ਆਧੁਨਿਕ ਤਕਨਾਲੋਜੀ ਨਾਲ ਲੈਸ ਤੇ ਸੇਫ ਵ੍ਹੀਕਲ ਜੰਗ ਦੇ ਮੈਦਾਨ ਵਿੱਚ ਸੈਨਿਕਾਂ ਦੇ ਹੱਥ ਮਜ਼ਬੂਤ ਕਰਦੇ ਹਨ। ਇਨ੍ਹਾਂ ਦੀ ਮਦਦ ਨਾਲ ਯੂਕਰੇਨ ਆਪਣੀ ਟੈਰੇਟਰੀ ਦਾ ਵੱਡਾ ਹਿੱਸਾ ਰੂਸ ਕੋਲੋਂ ਆਜ਼ਾਦ ਕਰਵਾ ਸਕੇਗਾ ਤੇ ਰੂਸ ਦੇ ਹਮਲਿਆਂ ਤੋਂ ਆਪਣੇ ਲੋਕਾਂ ਦੀ ਰਾਖੀ ਕਰ ਸਕੇਗਾ।