ਮਾਸਕੋ, 6 ਦਸੰਬਰ (ਪੋਸਟ ਬਿਊਰੋ) - ਰੂਸ-ਯੂਕਰੇਨ ਦੀ ਜੰਗ (ਰੂਸ-ਯੂਕਰੇਨ ਯੁੱਧ) ਨੂੰ 9 ਮਹੀਨਿਆਂ ਤੋਂ ਵੱਧ ਸਮਾਂ ਹੋ ਗਿਆ ਹੈ। 10 ਅਕਤੂਬਰ ਨੂੰ ਯੂਕਰੇਨ ਤੋਂ ਜਵਾਬੀ ਕਾਰਵਾਈ ਵਿਚ, ਕ੍ਰੀਮੀਅਨ ਪੁਲ ਤੋੜ ਦਿੱਤਾ ਗਿਆ ਸੀ। ਰੂਸ ਦੇ ਰਾਸਟਰਪਤੀ ਵਲਾਦੀਮੀਰ ਪੁਤਿਨ ਨੇ ਸੋਮਵਾਰ ਨੂੰ ਇਸ ਪੁਲ ਦਾ ਦੌਰਾ ਕੀਤਾ। ਇਹ ਪੁਲ ਰੂਸ ਅਤੇ ਕ੍ਰੀਮੀਆ ਨੂੰ ਜੋੜਦਾ ਹੈ। ਰੂਸੀ ਰਾਸਟਰਪਤੀ ਦੇ ਕ੍ਰੀਮੀਆ ਪੁਲ ਦੇ ਦੌਰੇ ਦਾ ਇਹ ਵੀਡੀਓ ਰੂਸੀ ਰਾਸ਼ਟਰਪਤੀ ਦੇ ਦਫ਼ਤਰ ਕ੍ਰੇਮਲਿਨ ਵਲੋਂ ਜਾਰੀ ਕੀਤਾ ਗਿਆ ਹੈ। ਕੌਮਾਂਤਰੀ ਮੀਡੀਆ ਵਿਚ ਆਈ ਰਿਪੋਰਟ ਮੁਤਾਬਿਕ ਪੁਤਿਨ ਧਮਾਕੇ ਤੋਂ ਬਾਅਦ ਚੱਲ ਰਹੇ ਨਿਰਮਾਣ ਕਾਰਜ ਦਾ ਜਾਇਜਾ ਲੈਣ ਲਈ ਉਥੇ ਪਹੁੰਚੇ ਸਨ। ਇਸ ਪੁਲ ’ਤੇ ਹਮਲੇ ਤੋਂ ਬਾਅਦ ਰੂਸ ਨੇ ਤਿੱਖੀ ਪ੍ਰਤੀਕਿਰਿਆ ਦਿੱਤੀ ਅਤੇ ਯੂਕਰੇਨ ‘ਤੇ ਕਈ ਬੰਬਾਂ ਦੀ ਵਰਖਾ ਕੀਤੀ। ਇਹ 19 ਕਿਲੋਮੀਟਰ ਲੰਬਾ ਪੁਲ ਰੂਸ ਲਈ ਬਹੁਤ ਮਹੱਤਵਪੂਰਨ ਹੈ।
ਕ੍ਰੇਮਲਿਨ ਵਲੋਂ ਸ਼ੇਅਰ ਕੀਤੀ ਗਈ ਵੀਡੀਓ ਵਿਚ ਵਲਾਦੀਮੀਰ ਪੁਤਿਨ ਨੂੰ ਮਰਸਡੀਜ ਕਾਰ ਚਲਾਉਂਦੇ ਦੇਖਿਆ ਜਾ ਸਕਦਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਕੁਝ ਦੂਰੀ ’ਤੇ ਜਾਣ ਤੋਂ ਬਾਅਦ ਪੁਤਿਨ ਨੇ ਪੈਦਲ ਚੱਲ ਕੇ ਨਿਰਮਾਣ ਕਾਰਜ ਵਿਚ ਲੱਗੇ ਮਜਦੂਰਾਂ ਨਾਲ ਵੀ ਗੱਲਬਾਤ ਕੀਤੀ। ਇਸ ਪੁਲ ਦੀ ਫੌਜੀ ਮਹੱਤਤਾ ਦਾ ਅੰਦਾਜਾ ਇਸ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ 24 ਫਰਵਰੀ ਨੂੰ ਯੂਕਰੇਨ ’ਤੇ ਹੋਏ ਹਮਲੇ ਤੋਂ ਬਾਅਦ ਰੂਸ ਇਸ ਪੁਲ ਰਾਹੀਂ ਕ੍ਰੀਮੀਆ ਵਿਚ ਆਪਣੀ ਫੌਜ ਭੇਜ ਰਿਹਾ ਹੈ। ਕ੍ਰੀਮੀਆ ਤੋਂ ਹੀ, ਰੂਸ ਆਸਾਨੀ ਨਾਲ ਦੱਖਣੀ ਯੂਕਰੇਨ ਦੇ ਖੇਰਸਾਨ ਅਤੇ ਜਪੋਰੋਜਯ ’ਤੇ ਕਬਜਾ ਕਰਨ ਦੇ ਯੋਗ ਹੈ। ਇਹ ਪੁਲ ਰੂਸ ਨਾਲ ਦੂਰਸੰਚਾਰ ਸੰਪਰਕ ਬਣਾਉਣ ਦਾ ਵੀ ਇੱਕ ਮਹੱਤਵਪੂਰਨ ਸਾਧਨ ਹੈ।
2014 ਵਿਚ, ਰੂਸ ਨੇ ਕ੍ਰੀਮੀਆ ਦੇ ਯੂਕਰੇਨੀ ਖੇਤਰ ਨੂੰ ਆਪਣੇ ਨਾਲ ਮਿਲਾ ਲਿਆ ਸੀ। ਇਸ ਤੋਂ ਬਾਅਦ ਇਸ ਖੇਤਰ ਨੂੰ ਰੂਸ ਨਾਲ ਜੋੜਨ ਲਈ ਸਮੁੰਦਰ ਵਿਚ ਕੇਰਚ ਪੁਲ ਬਣਾਇਆ ਗਿਆ। ਇਸ ਪੁਲ ਨੂੰ ਕ੍ਰੀਮੀਆ ‘ਤੇ ਰੂਸ ਦੇ ਕਬਜੇ ਦੇ ਪ੍ਰਤੀਕ ਵਜੋਂ ਦੇਖਿਆ ਜਾਂਦਾ ਹੈ। 8 ਅਕਤੂਬਰ 2022 ਨੂੰ, ਰੂਸ ਨੂੰ ਕ੍ਰੀਮੀਆ ਨਾਲ ਜੋੜਨ ਵਾਲੇ ਕੇਰਚ ਪੁਲ ‘ਤੇ ਇੱਕ ਵੱਡਾ ਧਮਾਕਾ ਹੋਇਆ ਸੀ। ਪੁਲ ‘ਤੇ ਧਮਾਕੇ ਦੀ ਆਵਾਜ ਕਈ ਕਿਲੋਮੀਟਰ ਦੂਰ ਤੱਕ ਸੁਣਾਈ ਦਿੱਤੀ। ਇਸ ਦੀ ਇੱਕ ਵੀਡੀਓ ਵੀ ਸੋਸਲ ਮੀਡੀਆ ‘ਤੇ ਵਾਇਰਲ ਹੋਈ ਸੀ।