ਓਟਵਾ, 24 ਨਵੰਬਰ (ਪੋਸਟ ਬਿਊਰੋ) : ਪਿਛਲੇ ਸਿਆਲਾਂ ਵਿੱਚ ਕਈ ਹਫਤਿਆਂ ਤੱਕ ਕੀਤੇ ਮੁਜ਼ਾਹਰਿਆਂ ਨੂੰ ਖ਼ਤਮ ਕਰਨ ਲਈ ਫੈਡਰਲ ਸਰਕਾਰ ਵੱਲੋਂ ਲਾਗੂ ਕੀਤੇ ਗਏ ਐਮਰਜੰਸੀ ਐਕਟ ਬਾਰੇ ਚੱਲ ਰਹੀ ਜਾਂਚ ਵਿੱਚ ਅਗਲੀ ਗਵਾਹੀ ਡਿਪਟੀ ਪ੍ਰਧਾਨ ਮੰਤਰੀ ਕ੍ਰਿਸਟੀਆ ਫਰੀਲੈਂਡ ਦੇਣਗੇ।
ਫਰੀਲੈਂਡ, ਜੋ ਕਿ ਵਿੱਤ ਮੰਤਰੀ ਵੀ ਹਨ, ਨੇ ਹੀ ਫਰੀਡਮ ਕੌਨਵੌਏ ਵਿੱਚ ਹਿੱਸਾ ਲੈਣ ਵਾਲਿਆਂ ਦੇ ਖਾਤੇ ਫਰੀਜ਼ ਕਰਨ ਲਈ ਬੈਂਕਾਂ ਤੇ ਹੋਰਨਾਂ ਵਿੱਤੀ ਅਦਾਰਿਆਂ ਨੂੰ ਐਮਰਜੰਸੀ ਇਕਨੌਮਿਕ ਸ਼ਕਤੀਆਂ ਦਿੱਤੀਆਂ ਸਨ।ਪਬਲਿਕ ਆਰਡਰ ਐਮਰਜੰਸੀ ਕਮਿਸ਼ਨ ਵੱਲੋਂ ਉਨ੍ਹਾਂ ਈਵੈਂਟਸ ਦਾ ਮੁਲਾਂਕਣ ਕੀਤਾ ਜਾ ਰਿਹਾ ਹੈ ਜਿਨ੍ਹਾਂ ਕਾਰਨ ਫੈਡਰਲ ਸਰਕਾਰ ਨੂੰ 14 ਫਰਵਰੀ ਨੂੰ ਐਮਰਜੰਸੀ ਐਕਟ ਲਾਗੂ ਕਰਨਾ ਪਿਆ।ਜਿ਼ਕਰਯੋਗ ਹੈ ਕਿ ਇਸ ਫਰੀਡਮ ਕੌਨਵੌਏ ਵੱਲੋਂ ਲਾਏ ਗਏ ਜਾਮ ਕਾਰਨ ਓਟਵਾ ਵਿੱਚ ਕੰਮਕਾਜ ਉੱਤੇ ਕਾਫੀ ਅਸਰ ਪਿਆ ਸੀ ਤੇ ਕੈਨੇਡਾ-ਅਮਰੀਕਾ ਕਾਰੋਬਾਰ ਕਈ ਬਾਰਡਰ ਲਾਂਘਿਆਂ ਉੱਤੇ ਠੱਪ ਹੋ ਗਿਆ ਸੀ।
ਇਸ ਹਫਤੇ ਗਵਾਹੀ ਦੇਣ ਵਾਲੇ ਕੈਬਨਿਟ ਮੰਤਰੀਆਂ ਵਿੱਚੋਂ ਫਰੀਲੈਂਡ ਸੱਤਵੀਂ ਕੈਬਨਿਟ ਮੰਤਰੀ ਹੈ।ਸ਼ੁੱਕਰਵਾਰ ਨੂੰ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਇਸ ਮਾਮਲੇ ਵਿੱਚ ਗਵਾਹੀ ਦੇਣਗੇ।