ਮਿਸੀਸਾਗਾ, 23 ਨਵੰਬਰ (ਪੋਸਟ ਬਿਊਰੋ) : ਸਿਟੀ ਆਫ ਮਿਸੀਸਾਗਾ ਚਾਹੁੰਦੀ ਹੈ ਕਿ ਨਾਗਰਿਕ ਉਨ੍ਹਾਂ ਦੀਆਂ ਕਮੇਟੀਆਂ, ਲੋਕਲ ਬੋਰਡਜ਼ ਵਿੱਚ ਕੰਮ ਕਰਨ। ਇਹ ਕਮੇਟੀਆਂ ਸਿਟੀ ਕਾਉਂਸਲ ਨੂੰ ਸਿਫਾਰਿਸ਼ਾਂ ਕਰਦੀਆਂ ਹਨ ਜਾਂ ਫਿਰ ਕੁੱਝ ਖਾਸ ਮੁੱਦਿਆਂ ਉੱਤੇ ਆਜ਼ਾਦਾਨਾਂ ਢੰਗ ਨਾਲ ਫੈਸਲੇ ਲੈਂਦੀਆਂ ਹਨ।
ਇਸ ਸਬੰਧ ਵਿੱਚ ਅਰਜ਼ੀਆਂ 24 ਨਵੰਬਰ ਤੋਂ 15 ਦਸੰਬਰ, 2022 ਤੱਕ ਸਵੀਕਾਰੀਆਂ ਜਾਣਗੀਆਂ। ਇਹ ਕਮੇਟੀਆਂ ਤੇ ਬੋਰਡ ਕਈ ਤਰ੍ਹਾਂ ਦੇ ਹੁੰਦੇ ਹਨ, ਜਿਨ੍ਹਾਂ ਲਈ ਸਥਾਨਕ ਨਾਗਰਿਕਾਂ ਨੂੰ ਮੈਂਬਰ ਲੈਣਾ ਹੁੰਦਾ ਹੈ। ਇਨ੍ਹਾਂ ਵਿੱਚ ਅਸੈਸੇਬਿਲਿਟੀ ਐਡਵਾਈਜ਼ਰੀ ਕਮੇਟੀ, ਹੈਰੀਟੇਜ ਐਡਵਾਈਜ਼ਰੀ ਕਮੇਟੀ, ਮਿਸੀਸਾਗਾ ਆਰਟਸ ਕਾਊਂਸਲ, ਮਿਸੀਸਾਗਾ ਪਬਲਿਕ ਲਾਇਬ੍ਰੇਰੀ ਬੋਰਡ ਤੇ ਹੋਰ ਸ਼ਾਮਲ ਹਨ। ਮੈਂਬਰਾਂ ਨੂੰ 14 ਨਵੰਬਰ, 2026 ਨੂੰ ਖ਼ਤਮ ਹੋਣ ਜਾ ਰਹੀ ਚਾਰ ਸਾਲਾ ਮਿਆਦ ਲਈ ਸੇਵਾ ਕਰਨੀ ਹੋਵੇਗੀ।
ਸਿਟੀ ਵੱਲੋਂ ਅਜਿਹੀਆਂ ਕਮੇਟੀਆਂ ਲਈ ਕੰਮ ਕਰਨ ਦੇ ਚਾਹਵਾਨਾਂ ਲਈ ਡਰੌਪ ਇਨ ਇਨਫਰਮੇਸ਼ਨ ਸੈਸ਼ਨ ਦਾ ਆਯੋਜਨ ਕੀਤਾ ਜਾ ਰਿਹਾ ਹੈ ਤੇ ਇਸ ਦੌਰਾਨ ਹੀ ਅਰਜ਼ੀ ਪ੍ਰਕਿਰਿਆ ਵੀ ਜਾਰੀ ਰੱਖੀ ਜਾਵੇਗੀ। ਕਾਊਂਸਲ ਕਮੇਟੀ ਅਪੁਆਇੰਟਮੈਂਟਸ ਡਰੌਪ-ਇਨ ਇਨਫਰਮੇਸ਼ਨ ਸੈਸ਼ਨ 24 ਨਵੰਬਰ ਦਿਨ ਵੀਰਵਾਰ ਨੂੰ ਸ਼ਾਮੀਂ 6:00 ਵਜੇ ਤੋਂ 7:30 ਵਜੇ ਤੱਕ ਕਾਊਂਸਲ ਚੇਂਬਰਜ਼, ਸਿਟੀ ਹਾਲ 300 ਸਿਟੀ ਸੈਂਟਰ ਡਰਾਈਵ, ਮਿਸੀਸਾਗਾ, ਓਨਟਾਰੀਓ ਵਿਖੇ ਕਰਵਾਇਆ ਜਾਵੇਗਾ।
ਸਿਟੀ ਦੀਆਂ ਕਮੇਟੀਆਂ, ਲੋਕਲ ਬੋਰਡਜ਼ ਤੇ ਅਥਾਰਟੀਜ਼ ਬਾਰੇ ਜਾਣਕਾਰੀ ਕਾਊਂਸਲ ਕਮੇਟੀ ਦੀ ਵੈੱਬਸਾਈਟ ਉੱਤੇ ਉਪਲਬਧ ਹੈ। ਅਰਜ਼ੀ ਪ੍ਰਕਿਰਿਆ ਤੇ ਹਰੇਕ ਕਮੇਟੀ ਲਈ ਲੋੜੀਂਦੀ ਯੋਗਤਾ ਬਾਰੇ ਜਾਣਕਾਰੀ ਸਿਟੀਜ਼ਨ ਅਪੁਆਇੰਟਮੈਂਟ ਵੈੱਬਪੇਜ ਉੱਤੇ ਉਪਲਬਧ ਹੈ।