ਓਟਵਾ, 10 ਨਵੰਬਰ (ਪੋਸਟ ਬਿਊਰੋ) : ਦੇਸ਼ ਭਰ ਵਿੱਚ ਬੱਚਿਆਂ ਦੀਆਂ ਸਾਹ ਸਬੰਧੀ ਫੈਲੀਆਂ ਕਈ ਤਰ੍ਹਾਂ ਦੀਆਂ ਬਿਮਾਰੀਆਂ ਨੂੰ ਧਿਆਨ ਵਿੱਚ ਰੱਖਦਿਆਂ ਹੋਇਆਂ ਫਾਰਮੇਸੀਜ਼ ਬੱਚਿਆਂ ਦੀਆਂ ਦਵਾਈਆਂ ਦੇ ਬਦਲ ਤਲਾਸ਼ ਰਹੀਆਂ ਹਨ।
ਗਰਮੀਆ ਤੋਂ ਹੀ ਲਿਕੁਇਡ ਟਾਇਨੌਲ ਤੇ ਹੋਰ ਦਵਾਈਆਂ ਦੀ ਸਪਲਾਈ ਵਿੱਚ ਘਾਟ ਪਾਈ ਜਾ ਰਹੀ ਹੈ। ਇਹ ਘਾਟ ਨਵ ਜੰਮੇਂ ਬੱਚਿਆਂ ਤੇ ਵੱਡੇ ਬੱਚਿਆਂ ਲਈ ਐਸੇਟਾਮਿਨੋਫੈਨ ਤੇ ਇਬੁਪੋ੍ਰਫਨ ਉਤਪਾਦਾਂ ਦੀ ਮੰਗ ਵਿੱਚ ਹੋਏ ਵਾਧੇ ਕਾਰਨ ਪਾਈ ਜਾ ਰਹੀ ਹੈ। ਕਈ ਫਾਰਮਾਸਿਸਟਸ ਨੂੰ ਬੱਚਿਆਂ ਦੀਆਂ ਦਰਦ ਨਿਵਾਰਕ ਦਵਾਈਆਂ ਕੱਚੇ ਉਤਪਾਦਾਂ ਨੂੰ ਰਲਾ ਕੇ ਲਿਕੁਇਡ ਦੇ ਰੂਪ ਵਿੱਚ ਤਿਆਰ ਕਰਨੀਆਂ ਪੈ ਰਹੀਆਂ ਹਨ। ਪਿਛਲੇ ਚਾਰ ਮਹੀਨਿਆਂ ਤੋਂ ਟੋਰਾਂਟੋ ਵਿੱਚ ਬੀਚਿਜ਼ ਫਾਰਮੇਸੀ ਨੂੰ ਬੱਚਿਆਂ ਦੀ ਟਾਇਨੌਲ ਜਾਂ ਐਡਵਿਲ ਦੀ ਕੋਈ ਸਪਲਾਈ ਹਾਸਲ ਨਹੀਂ ਹੋਈ ਹੈ।
ਫਾਰਮਾਸਿਸਟ ਕਾਇਰੋ ਮਾਸੇਹ ਨੇ ਦੱਸਿਆ ਕਿ ਉਸ ਸਮੇਂ ਬਹੁਤ ਤਕਲੀਫ ਹੁੰਦੀ ਹੈ ਜਦੋਂ ਕੋਈ ਨਾ ਕੋਈ ਮਾਪੇ ਹਰ 15 ਮਿੰਟ ਬਾਅਦ ਬੱਚਿਆਂ ਦੀ ਦਵਾਈ ਲੱਭਦੇ ਹੋਏ ਸਾਡੇ ਕੋਲ ਆਉਂਦੇ ਹਨ ਤੇ ਸਾਨੂੰ ਕਾਲ ਕਰਦੇ ਹਨ ਪਰ ਸਾਡੇ ਕੋਲ ਦਵਾਈ ਨਾ ਹੋਣ ਕਾਰਨ ਉਨ੍ਹਾਂ ਨੂੰ ਜਵਾਬ ਦੇਣਾ ਪੈਂਦਾ ਹੈ।ਓਨਟਾਰੀਓ ਫਾਰਮਾਸਿਸਟ ਐਸੋਸਿਏਸ਼ਨ ਦੇ ਸੀਈਓ ਜਸਟਿਨ ਬੇਟਸ ਨੇ ਆਖਿਆ ਕਿ ਕਿਸੇ ਦਵਾਈ ਦੀ ਸਾਲਾਨਾ ਖਪਤ ਦੇ ਹਿਸਾਬ ਨਾਲ ਉਤਪਾਦਕ ਕਿਸੇ ਦਵਾਈ ਨੂੰ ਤਿਆਰ ਕਰਦੇ ਹਨ ਪਰ ਇਸ ਸਾਲ ਤਾਂ ਆਮ ਵਰਤੋਂ ਵਾਲੀਆਂ ਦਵਾਈਆਂ ਦੀ ਮੰਗ ਐਨੀ ਜਿ਼ਆਦਾ ਹੈ ਕਿ ਸਪਲਾਈ ਪੂਰੀ ਕਰਨੀ ਔਖੀ ਹੋਈ ਪਈ ਹੈ।
ਬੇਟਸ ਨੇ ਆਖਿਆ ਕਿ ਕੈਨੇਡਾ ਦੀ ਸਪਲਾਈ ਚੇਨ ਇਸ ਘਾਟ ਨੂੰ ਪੂਰਾ ਕਰਨ ਲਈ ਦਿਨ ਰਾਤ ਕੰਮ ਕਰ ਰਹੀ ਹੈ ਤੇ ਇਸ ਲਈ 35 ਫੀ ਸਦੀ ਤੱਕ ਉਤਪਾਦਨ ਵੀ ਵਧਾ ਦਿੱਤਾ ਗਿਆ ਹੈ ਪਰ ਅਜੇ ਵੀ ਇਸ ਘਾਟ ਨੂੰ ਪੂਰਾ ਕਰਨ ਲਈ ਹੋਰ ਮਾਪਦੰਡ ਅਪਣਾਏ ਜਾਣ ਦੀ ਲੋੜ ਹੈ। ਉਨ੍ਹਾਂ ਇਹ ਵੀ ਆਖਿਆ ਕਿ ਇਸ ਤਰ੍ਹਾਂ ਦੀ ਸਥਿਤੀ ਵਿੱਚ ਹੈਲਥ ਕੈਨੇਡਾ ਨੂੰ ਅਮਰੀਕਾ ਤੋਂ ਬੱਚਿਆਂ ਦੀ ਐਡਵਿਲ ਤੇ ਟਾਇਨੌਲ ਇੰਪੋਰਟ ਕਰਨ ਦੀ ਖੁੱਲ੍ਹ ਦਿੱਤੀ ਜਾਣੀ ਚਾਹੀਦੀ ਹੈ।