ਇੰਡੀਆਨਾ, 6 ਅਕਤੂਬਰ (ਪੋਸਟ ਬਿਊਰੋ)- ਅਮਰੀਕਾ 'ਚ ਭਾਰਤੀ ਮੂਲ ਦੇ ਵਿਦਿਆਰਥੀ ਦਾ ਕਤਲ ਹੋਣ ਦੀ ਖਬਰ ਹੈ।ਨਿਊਜ਼ ਏਜੰਸੀ ਪੀਟੀਆਈ ਦੀ ਰਿਪੋਰਟ ਮੁਤਾਬਕ ਇੰਡੀਆਨਾ ਵਿੱਚ ਇੱਕ ਕੋਰੀਆਈ ਨੌਜਵਾਨ ਨਾਲ ਰਹਿ ਰਹੇ 20 ਸਾਲਾ ਭਾਰਤੀ ਨੌਜਵਾਨ ਵਰੁਣ ਮਨੀਸ਼ ਛੇੜਾ ਦਾ ਕਤਲ ਕਰ ਦਿੱਤਾ ਗਿਆ ਹੈ।ਮਨੀਸ਼ ਛੇੜਾ ਪਰਡਿਊ ਯੂਨੀਵਰਸਿਟੀ ਦਾ ਵਿਦਿਆਰਥੀ ਸੀ।ਸਥਾਨਕ ਮੀਡੀਆ ਦੀਆਂ ਰਿਪੋਰਟਾਂ ਮੁਤਾਬਕ ਕਤਲ ਤੋਂ ਬਾਅਦ ਨੌਜਵਾਨ ਦੇ ਦੱਖਣੀ ਕੋਰੀਆਈ ਰੂਮਮੇਟ ਨੂੰ ਇੰਡੀਆਨਾ ਪੁਲਸ ਨੇ ਹਿਰਾਸਤ 'ਚ ਲੈ ਲਿਆ ਹੈ।
ਰਿਪੋਰਟਾਂ ਮੁਤਾਬਕ ਵਰੁਣ ਦੀ ਲਾਸ਼ ਕੈਂਪਸ ਦੇ ਪੱਛਮੀ ਸਿਰੇ 'ਤੇ ਸਥਿਤ ਮੈਕਕਚੀਅਨ ਹਾਲ ਦੀ ਪਹਿਲੀ ਮੰਜਿ਼ਲ 'ਤੇ ਮਿਲੀ।ਰਿਪੋਰਟ ਮੁਤਾਬਕ ਵਰੁਣ ਛੇੜਾ ਦੱਖਣੀ ਕੋਰੀਆ ਦੇ ਨੌਜਵਾਨ ਜੀ ਮਿਨ ਜਿੰਮੀ ਸ਼ਾ ਨਾਲ ਕਮਰਾ ਸਾਂਝਾ ਕਰਦਾ ਸੀ। ਉਸ ਨੇ ਬੁੱਧਵਾਰ ਰਾਤ 12:45 ਵਜੇ ਫੋਨ 'ਤੇ ਕਤਲ ਦੀ ਜਾਣਕਾਰੀ ਦਿੱਤੀ ਸੀ। ਪੁਲਿਸ ਮੁਖੀ ਲੈਸਲੇ ਵਾਈਟ ਨੇ ਇੱਕ ਨਿਊਜ਼ ਕਾਨਫਰੰਸ ਵਿੱਚ ਮਾਮਲੇ ਦੀ ਪੂਰੀ ਜਾਣਕਾਰੀ ਦਿੱਤੀ।ਵਰੁਣ ਯੂਨੀਵਰਸਿਟੀ 'ਚ ਡਾਟਾ ਸਾਇੰਸ ਦੀ ਪੜ੍ਹਾਈ ਕਰ ਰਿਹਾ ਸੀ। ਪੁਲਸ ਨੂੰ ਉਸ ਦੇ ਸਰੀਰ 'ਤੇ ਜ਼ਖਮਾਂ ਦੇ ਕਈ ਨਿਸ਼ਾਨ ਮਿਲੇ ਹਨ।ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਛੇੜਾ ਦੀ ਮੌਤ "ਬਹੁਤ ਸਾਰੀਆਂ ਦੁਖਦਾਈ ਸੱਟਾਂ" ਕਾਰਨ ਹੋਈ ਹੈ।
ਵਰੁਣ ਦੇ ਬਚਪਨ ਦੇ ਦੋਸਤ ਅਰੁਣਾਭ ਸਿਨਹਾ ਨੇ ਨਿਊਜ਼ ਨੂੰ ਦੱਸਿਆ ਕਿ ਮੰਗਲਵਾਰ ਰਾਤ ਵਰੁਣ ਦੋਸਤਾਂ ਨਾਲ ਆਨਲਾਈਨ ਚੈਟ ਕਰ ਰਿਹਾ ਸੀ।ਇਸ ਦੇ ਨਾਲ ਹੀ ਉਹ ਗੇਮਿੰਗ 'ਚ ਵੀ ਰੁੱਝਿਆ ਹੋਇਆ ਸੀ।ਇਸ ਦੌਰਾਨ ਉਨ੍ਹਾਂ ਨੇ ਵਰੁਣ ਦੇ ਚੀਕਣ ਦੀ ਆਵਾਜ਼ ਸੁਣੀ।ਉਸ ਰਾਤ ਅਰੁਣਾਭ ਦੋਸਤਾਂ ਨਾਲ ਨਹੀਂ ਖੇਡ ਰਿਹਾ ਸੀ ਪਰ ਦੋਸਤਾਂ ਨੇ ਦੱਸਿਆ ਕਿ ਹਮਲੇ ਦੀ ਆਵਾਜ਼ ਸਾਫ ਸੁਣਾਈ ਦਿੱਤੀ।ਉਹ ਨਹੀਂ ਜਾਣਦੇ ਕਿ ਕੀ ਹੋਇਆ? ਬੁੱਧਵਾਰ ਸਵੇਰੇ ਉਸ ਨੂੰ ਵਰੁਣ ਦੇ ਕਤਲ ਬਾਰੇ ਪਤਾ ਲੱਗਾ।ਇਸ ਤੋਂ ਪਹਿਲਾਂ ਅੱਠ ਸਾਲ ਪਹਿਲਾਂ ਵੀ ਇਸ ਕੈਂਪਸ ਵਿੱਚ ਅਜਿਹੀ ਘਟਨਾ ਵਾਪਰ ਚੁੱਕੀ ਹੈ।