ਓਨਟਾਰੀਓ, 23 ਸਤੰਬਰ (ਪੋਸਟ ਬਿਊਰੋ) : ਓਨਟਾਰੀਓ ਦੇ ਐਜੂਕੇਸ਼ਨ ਵਰਕਰਜ਼, ਜਿਨ੍ਹਾਂ ਵਿੱਚ ਲਾਇਬ੍ਰੇਰੀਅਨ, ਕਸਟੋਡੀਅਨ ਤੇ ਪ੍ਰਸ਼ਾਸਕੀ ਅਮਲਾ ਸ਼ਾਮਲ ਹੈ, ਅੱਜ ਤੋਂ ਇਸ ਸਬੰਧ ਵਿੱਚ ਵੋਟਿੰਗ ਕਰੇਗਾ ਕਿ ਹੜਤਾਲ ਕੀਤੀ ਜਾਵੇ ਜਾਂ ਨਹੀਂ। ਇਨ੍ਹਾਂ ਦੀ ਯੂਨੀਅਨ ਵੱਲੋਂ ਇਨ੍ਹਾਂ ਸਾਰਿਆਂ ਨੂੰ ਹੜਤਾਲ ਦੇ ਪੱਖ ਵਿੱਚ ਵੋਟ ਪਾਉਣ ਲਈ ਆਖਿਆ ਜਾ ਰਿਹਾ ਹੈ।
ਕੈਨੇਡੀਅਨ ਯੂਨੀਅਨ ਆਫ ਪਬਲਿਕ ਇੰਪਲੌਈਜ਼ ਵੱਲੋਂ ਓਨਟਾਰੀਓ ਦੇ ਮੁੱਢਲੇ ਕਾਂਟਰੈਕਟ ਸਬੰਧੀ ਪੇਸ਼ਕਸ਼ ਨੂੰ ਬੇਇਜ਼ਤੀ ਕਰਨ ਵਾਲਾ ਦੱਸਿਆ ਗਿਆ ਹੈ।ਸਰਕਾਰ ਨੇ ਸਾਲਾਨਾ 40,000 ਡਾਲਰ ਤੋਂ ਘੱਟ ਕਮਾਉਣ ਵਾਲੇ ਵਰਕਰਜ਼ ਨੂੰ ਸਾਲ ਦਾ ਦੋ ਫੀ ਸਦੀ ਵਾਧਾ ਦੇਣ ਦੀ ਪੇਸ਼ਕਸ਼ ਕੀਤੀ ਗਈ ਹੈ ਤੇ ਹੋਰਨਾਂ ਵਰਕਰਜ਼ ਨੂੰ 1·25 ਫੀ ਸਦੀ ਵਾਧਾ ਦੇਣ ਦੀ ਗੱਲ ਆਖੀ ਗਈ। ਇਸ ਦੌਰਾਨ ਸੀਯੂਪੀਈ ਵੱਲੋਂ ਤਨਖਾਹਾਂ ਵਿੱਚ ਸਾਲਾਨਾ ਵਾਧਾ 11·7 ਫੀ ਸਦੀ ਮੰਗਿਆ ਜਾ ਰਿਹਾ ਹੈ।
ਇਸ ਦੌਰਾਨ ਸਿੱਖਿਆ ਮੰਤਰੀ ਸਟੀਫਨ ਲਿਚੇ ਨੇ ਆਖਿਆ ਕਿ ਯੂਨੀਅਨ ਨੂੰ ਹੜਤਾਲ ਕਰਨ ਲਈ ਆਪਣੇ ਮੈਂਬਰਾਂ ਨੂੰ ਉਕਸਾਉਣਾ ਨਹੀਂ ਚਾਹੀਦਾ। ਸੀਯੂਪੀਈ ਦੇ 55,000 ਸਿੱਖਿਆ ਵਰਕਰਜ਼ ਵੱਲੋਂ ਅੱਜ ਤੇ 2 ਅਕਤੂਬਰ ਦਰਮਿਆਨ ਇਹ ਵੋਟ ਪਾਈ ਜਾਵੇਗੀ ਕਿ ਹੜਤਾਲ ਕੀਤੀ ਜਾਵੇ ਜਾ ਨਹੀਂ।