ਮੈਲਬਰਨ, 16 ਸਤੰਬਰ (ਪੋਸਟ ਬਿਊਰੋ): ਪੰਜਾਬੀ ਦੇ ਪ੍ਰਸਿੱਧ ਲੋਕ ਗਾਇਕ ਅਤੇ ਨਾਚਾਂ ਦੀਆਂ ਸ਼ਾਨਦਾਰ ਵੰਨਗੀਆਂ ਦੇ ਨਾਲ ਸਾਫ਼ ਸੁਥਰੀ ਗਾਇਕੀ ਵਾਲਾ ਅਤੇ ਪੰਜਾਬੀ ਗਾਇਕੀ ਵਿੱਚ ਆਪਣਾ ਨਾਮ ਮੂਹਰਲੀਆਂ ਸਫਾਂ ਵਿੱਚ ਦਰਜ ਕਰਾਉਣ ਵਾਲੇ ਪੰਮੀ ਬਾਈ ਅੱਜ ਕੱਲ੍ਹ ਆਸਟ੍ਰੇਲੀਆ ਦੇ ਸ਼ਹਿਰ ਮੈਲਬੌਰਨ ਵਿੱਖੇ ਆਏ ਹੋਏ ਹਨ। ਇੱਥੋਂ ਦੀਆਂ ਵੱਖ ਸੰਸਥਾਵਾਂ ਵਲੋਂ ਉਨ੍ਹਾਂ ਦਾ ਸਨਮਾਨ ਕੀਤਾ ਗਿਆ ਤੇ ਪੰਜਾਬੀ ਲੋਕ ਨਾਚਾਂ, ਲੋਕ ਸਾਜਾਂ ਅਤੇ ਪੰਜਾਬੀ ਬੋਲੀ ਲਈ ਪਾਏ ਜਾ ਰਹੇ ਵੱਡਮੁੱਲੇ ਯੋਗਦਾਨ ਲਈ ਉਨ੍ਹਾਂ ਦਾ ਧੰਨਵਾਦ ਵੀ ਕੀਤਾ ਗਿਆ। ਇਸ ਮੌਕੇ ਪੰਜਾਬੀ ਸਭਿਆਚਾਰਕ ਕੇਂਦਰ ਮੈਲਬੌਰਨ, ਮੋਜ ਮੇਲਾ ਈਵੈਂਟਸ ਤੇ ਦਾ ਗਰੈਂਡ ਸੈਫਰਨ ਵਲੋ ਉਨ੍ਹਾਂ ਦਾ ਸਨਮਾਨ ਕੀਤਾ ਗਿਆ। ਇਸ ਮੌਕੇ ਇੱਕ ਰੂਬਰੂ ਸਮਾਗਮ ਚ ਬੋਲਦਿਆਂ ਪੰਮੀ ਬਾਈ ਨੇ ਭੰਗੜੇ ਵਿੱਚ ਆ ਰਹੀਆਂ ਤਬਦੀਲੀਆਂ ਬਾਰੇ ਬੋਲਦਿਆਂ ਕਿਹਾ ਕਿ ਸਮੇਂ ਦੇ ਨਾਲ ਬਦਲਾਅ ਆਉਣਾ ਸੁਭਾਵਿਕ ਗੱਲ ਹੈ ਪਰ ਹੁਣ ਭੰਗੜਾ- ਭੰਗੜਾ ਨਾਂ ਰਹਿ ਕੇ ਕਸਰਤ ਬਣ ਗਿਆ ਹੈ ਜਿਸ ਦੇ ਨਾਲ ਭੰਗੜੇ ਵਿਚਲੀ ਲਚਕ, ਜੁੱਸਾ ਤੇ ਜੋਰ ਖਤਮ ਹੁੰਦਾ ਜਾ ਰਿਹਾ ਹੈ। ਕੁੜੀਆਂ ਨੂੰ ਭੰਗੜਾ ਸਿੱਖਾਉਣ ਦੇ ਸਵਾਲ ਵਿੱਚ ਪੰਮੀ ਬਾਈ ਨੇ ਕਿਹਾ ਭਾਵੇ ਅਜੌਕੇ ਸਮੇਂ ਕੁੜੀਆਂ ਮਰਦਾਂ ਤੋ ਕਿਸੇ ਵੀ ਪੱਖੋ ਘੱਟ ਨਹੀ ਹਨ ਪਰ ਉਨਾਂ ਨੂੰ ਭੰਗੜੇ ਦੇ ਨਾਲ ਨਾਲ ਗਿੱਧਾ ਤੇ ਬੋਲੀਆਂ ਵੀ ਜਰੂਰ ਸਿਖਣੀਆਂ ਚਾਹਿਦੀਆਂ ਹਨ ਨਹੀ ਆਉਦੇ ਸਮੇ ਵਿੱਚ ਗਿੱਧਾ ਤੇ ਬੋਲੀਆਂ ਅਲੋਪ ਹੋ ਜਾਣਗੀਆਂ। ਉਨਾਂ ਕਿਹਾ ਕਿ ਕੁਝ ਨਾਚ ਮਰਦਾਂ ਲਈ ਬਣੇ ਹਨ ਤੇ ਕੁਝ ਔਰਤਾਂ ਲਈ ਬਣੇ ਹਨ। ਇਸੇ ਕਰਕੇ ਨਾਚਾਂ ਵਿੱਚ ਵਖਰੇਵਾਂ ਰੱਖਿਆ ਗਿਆ ਹੈ।ਪੰਮੀ ਬਾਈ ਨੇ ਕਿਹਾ ਕਿ ਉਹ ਜਲਦ ਹੀ ਰਵਾਇਤੀ ਸਾਜ਼ਾਂ ਢੋਲ , ਸਾਰੰਗੀ , ਢੱਡ , ਅਲਗੋਜ਼ੇ ਆਦਿ ਨਾਲ ਸਰੋਸ਼ਾਰ ਨਵੀਂ ਵੰਨਗੀ "ਫੌਕ ਬੈਂਡ" ਲੈ ਕੇ ਹਾਜ਼ਰ ਹੋਣਗੇ ਜਿਹੜੀ ਨਵੀਂਆਂ ਪੀੜੀਆਂ ਲਈ ਸਾਂਭਣਯੋਗ ਸੌਗ਼ਾਤ ਹੋਵੇਗੀ।