ਫਿਰੋਜ਼ਪੁਰ, 18 ਅਗਸਤ (ਪੋਸਟ ਬਿਊਰੋ)- ਸਥਾਨਕ ਕੇਂਦਰੀ ਜੇਲ੍ਹ ਵਿੱਚ ਇੱਕ ਹਵਾਲਾਤੀ ਦੀ ਪਿੱਠ ਉੱਤੇ ਗੈਂਗਸਟਰ ਲਿਖੇ ਹੋਣ ਦੀ ਖਬਰ ਆਈ ਹੈ। ਇਹ ਸ਼ਬਦ ਕਿਸੇ ਗਰਮ ਚੀਜ਼ ਨਾਲ ਲਿਖਿਆ ਜਾਪਦਾ ਹੈ।
ਇਸ ਹਵਾਲਾਤੀ ਦੀ ਪਛਾਣ ਤਰਸੇਮ ਸਿੰਘ ਉਰਫ ਜੋਧਾ ਪਿੰਡ ਮਿਰਜ਼ਾਪੁਰ ਜ਼ਿਲ੍ਹਾ ਕਪੂਰਥਲਾ ਵਜੋਂ ਹੋਈ ਹੈ, ਜਿਸ ਨੂੰ ਕੱਲ੍ਹ ਕਪੂਰਥਲਾ ਦੀ ਅਦਾਲਤ ਪੇਸ਼ੀ ਲਈ ਭੇਜਿਆ ਗਿਆ ਸੀ। ਅਦਾਲਤ ਨੇਉਸ ਦਾ ਮੈਡੀਕਲ ਕਰਨ ਦੇ ਹੁਕਮ ਦਿੱਤੇ ਤਾਂ ਸਰਕਾਰੀ ਹਸਪਤਾਲ ਵਿੱਚ ਉਸ ਦੀ ਪਿੱਠ ਉੱਤੇ ਗੈਂਗਸਟਰ ਸ਼ਬਦ ਲਿਖੇ ਹੋਣ ਦਾ ਪਤਾ ਲੱਗਾ ਹੈ। ਮੈਡੀਕਲ ਸਟਾਫ ਵੱਲੋਂ ਪੁੱਛਣ ਉੱਤੇ ਹਵਾਲਾਤੀ ਨੇ ਦੱਸਿਆ ਕਿ ਇਹ ਸ਼ਬਦ ਫਿਰੋਜ਼ਪੁਰ ਜੇਲ੍ਹ ਦੇ ਅਫਸਰਾਂ ਨੇ ਗਰਮ ਸਰੀਏ ਨਾਲ ਉਸ ਦੀ ਪਿੱਠ ਉੱਤੇ ਲਿਖਿਆ ਹੈ। ਜੇਲ੍ਹ ਦੇ ਡੀ ਆਈ ਜੀ ਤਜਿੰਦਰ ਸਿੰਘ ਮੌੜ ਨੇ ਇਨ੍ਹਾਂ ਦੋਸ਼ਾਂ ਨੂੰ ਝੂਠ ਕਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਬੀਤੀ 10 ਅਗਸਤ ਨੂੰ ਇਸ ਦਾ ਕੁਝ ਕੈਦੀਆਂ ਨਾਲ ਝਗੜਾ ਹੋਣ ਮਗਰੋਂ ਦੋਵਾਂਧਿਰਾਂ ਨੂੰ ਵੱਖ-ਵੱਖ ਬੈਰਕਾਂ ਵਿੱਚ ਬੰਦ ਕਰ ਦਿੱਤਾ ਸੀ। ਉਨ੍ਹਾਂ ਕਿਹਾ ਕਿ ਹਵਾਲਾਤੀ ਨੇ ਆਪਣੇ ਕਿਸੇ ਸਾਥੀ ਕੋਲੋਂ ਇਹ ਸ਼ਬਦ ਲਿਖਵਾਏ ਹਨ ਤਾਂ ਜੋ ਜੇਲ੍ਹ ਅਧਿਕਾਰੀਆਂ ਨੂੰ ਬਦਨਾਮ ਕਰ ਸਕੇ। ਉਨ੍ਹਾਂ ਕਿਹਾ ਕਿ ਇਸ ਹਵਾਲਾਤੀ ਨੇ ਜੇਲ੍ਹ ਅਧਿਕਾਰੀਆਂ ਨੂੰ ਫਸਾਉਣ ਦੀ ਕੋਸ਼ਿਸ਼ ਕੀਤੀ ਹੈ। ਇਸ ਲਈ ਕਾਰਵਾਈ ਕਰਨ ਲਈ ਐਸ ਐਸ ਪੀ ਨੂੰ ਲਿਖਤੀ ਸ਼ਿਕਾਇਤ ਦਿੱਤੀ ਜਾ ਰਹੀ ਹੈ।