ਬਠਿੰਡਾ, 30 ਜੂਨ (ਪੋਸਟ ਬਿਊਰੋ)- ਕੇਂਦਰੀ ਜੇਲ੍ਹ ਬਠਿੰਡਾ ਵਿੱਚ ਬੰਦ ਦੋ ਗੈਂਗਸਟਰਾਂ ਨੇ ਨਾਮੀ ਗੈਂਗਸਟਰ ਹਰਵਿੰਦਰ ਰਿੰਦਾ ਦੇ ਨਾਂਅ ਉੱਤੇ ਜੇਲ੍ਹ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਦਿੱਤੀ ਹੈ। ਇਹ ਧਮਕੀ ਇਨ੍ਹਾਂ ਗੈਂਗਸਟਰਾਂ ਨੇ ਸਪੈਸ਼ਲ ਸੁਰੱਖਿਆ ਬਲਾਕ ਤੋਂ ਭੱਜਣ ਦੀ ਕੋਸ਼ਿਸ਼ ਦੌਰਾਨ ਜੇਲ੍ਹ ਅਧਿਕਾਰੀਆਂ ਨਾਲ ਧੱਕਾਮੁੱਕੀ ਕਰਦੇ ਹੋਏ ਦਿੱਤੀ।
ਥਾਣਾ ਕੈਂਟ ਦੇ ਮੁੱਖ ਅਧਿਕਾਰੀ ਪਰਮਪਾਰਸ ਸਿੰਘ ਚਹਿਲ ਤੇ ਜੇਲ੍ਹ ਚੌਕੀ ਦੇ ਮੁਖੀ ਕਰਮਜੀਤ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਕੋਲ ਭੇਜੀ ਸ਼ਿਕਾਇਤ ਵਿੱਚ ਬਠਿੰਡਾ ਜੇਲ੍ਹ ਦੇ ਸਹਾਇਕ ਸੁਪਰਡੈਂਟ ਗੌਰਵਦੀਪ ਸਿੰਘ ਨੇ ਦੱਸਿਆ ਕਿ 26 ਜੂਨ ਨੂੰ ਜਦੋਂ ਸਪੈਸ਼ਲ ਸੁਰੱਖਿਆ ਬਲਾਕ ਦੇ ਵਾਰਡਨ ਗੁਰਮੀਤ ਸਿੰਘ ਵੱਲੋਂ ਕਮਾਂਡੋਜ਼ ਦੀ ਮਦਦ ਨਾਲ ਸ਼ਾਮ ਨੂੰ ਬਲਾਕ ਦੀ ਬੰਦੀ ਕੀਤੀ ਜਾ ਰਹੀ ਤਾਂ ਓਥੇ ਮੌਜੂਦ ਗੈਂਗਸਟਰ ਰਾਜਵੀਰ ਸਿੰਘ ਰਾਜਾ ਤੇ ਗੈਂਗਸਟਰ ਗੁਰਦੀਪ ਸਿੰਘ ਰਾਣੋ ਨੇ ਪਹਿਲਾਂ ਬਣਾਈ ਸਕੀਮ ਤਹਿਤ ਰਾਣੋ ਨੇ ਵਾਰਡਨ ਨੂੰ ਪਿੱਛਿਓਂ ਧੱਕਾ ਮਾਰ ਕੇ ਧਰਤੀ ਉੱਤੇ ਸੁੱਟ ਕੇ ਉਸ ਦੀ ਪੱਗ ਲਾਹ ਦਿੱਤੀ ਤੇ ਵਰਦੀ ਪਾੜ ਦਿੱਤੀ। ਉਸ ਨੂੰ ਧਰਤੀ ਉੱਤੇ ਡਿੱਗੇ ਦੇਖ ਕੇ ਰਾਜੇ ਨੇ ਤਿੱਖੀ ਪੱਤੀ ਨਾਲ ਉਸ ਉੱਤੇ ਵਾਰ ਕੀਤਾ ਅਤੇ ਬਲਾਕ ਵਿੱਚੋਂ ਭੱਜਣ ਦੀ ਕੋਸ਼ਿਸ਼ ਕੀਤੀ, ਜਿਸ ਨੂੰ ਮੌਕੇ ਉੱਤੇ ਪੁੱਜੇ ਬਲਾਕ ਇੰਚਾਰਜ ਗੌਰਵਦੀਪ ਸਿੰਘ (ਸਹਾਇਕ ਸੁਪਰਡੈਂਟ) ਨੇ ਬਲਾਕ ਦਾ ਛੋਟਾ ਗੇਟ ਬੰਦ ਕਰ ਕੇ ਭੱਜਣ ਤੋਂ ਰੋਕ ਲਿਆ ਤੇ ਬਾਕੀ ਮੁਲਾਜ਼ਮਾਂ ਨੇ ਰਾਣੋ ਨੂੰ ਕਾਬੂ ਕੀਤਾ।
ਘਟਨਾ ਸਥਾਨ ਉੱਤੇ ਜਦੋਂ ਡਿਪਟੀ ਸੁਪਰਡੈਂਟ ਸੁਰੱਖਿਆ ਸੁਖਪਾਲ ਸਿੰਘ, ਸਹਾਇਕ ਸੁਪਰਡੈਂਟ ਅਸ਼ੀਸ਼ ਕੁਮਾਰ ਤੇ ਜਸਪਾਲ ਸਿੰਘ ਸਮੇਤ ਹੋਰ ਕਮਾਂਡੋਜ਼ ਪਹੁੰਚੇ ਤਾਂ ਉਨ੍ਹਾਂ ਉੱਤੇ ਵੀ ਗੈਂਗਸਟਰ ਰਾਜਾ ਨੇ ਹਮਲਾ ਕੀਤਾ, ਜਿਸ ਨੂੰ ਉਨ੍ਹਾਂ ਬੜੀ ਜਦੋ-ਜਹਿਦ ਨਾਲ ਕਾਬੂ ਕੀਤਾ ਪਰ ਇਸ ਦੌਰਾਨ ਗੈਂਗਸਟਰ ਰਾਜਾ ਨੇ ਉਕਤ ਅਧਿਕਾਰੀਆਂ ਤੇ ਮੁਲਾਜ਼ਮਾਂ ਨੂੰ ਜਾਨੋ ਮਾਰਨ ਦੀਆਂ ਧਮਕੀਆਂ ਦਿੰਦੇ ਹੋਏ ਉਚੀ-ਉਚੀ ਕਿਹਾ ਕਿ ‘ਪਾਕਿਸਤਾਨ ਵਿੱਚ ਬੈਠਾ ਹਰਿੰਦਰ ਰਿੰਦਾ ਮੇਰਾ ਭਰਾ ਹੈ, ਮੈਂ ਉਸ ਤੋਂ ਜੇਲ੍ਹ ਅਤੇ ਸਾਰੇ ਮੁਲਾਜ਼ਮਾਂ ਨੂੰ ਬੰਬ ਨਾਲ ਉਡਾ ਦੇਵਾਂਗਾ। ਇਸੇ ਤਹਿਤ ਗੈਂਗਸਟਰ ਰਾਜਵੀਰ ਸਿੰਘ ਰਾਜਾ ਵਾਸੀ ਨਾਥਪੁਰਾ (ਗੁਰਦਾਸਪੁਰ) ਤੇ ਗੈਂਗਸਟਰ ਗੁਰਦੀਪ ਸਿੰਘ ਵਾਸੀ ਰਾਣੋ (ਲੁਧਿਆਣਾ) ਖ਼ਿਲਾਫ਼ ਥਾਣਾ ਕੈਂਟ ਵਿਖੇ ਮੁਕੱਦਮਾ ਦਰਜ ਕੀਤਾ ਹੈ। ਗੈਂਗਸਟਰ ਰਾਜਵੀਰ ਕੋਲੋਂ ਕੁਝ ਦਿਨ ਪਹਿਲਾਂ ਜੇਲ੍ਹ ਪ੍ਰਸ਼ਾਸਨ ਨੇ ਇੱਕ ਮੋਬਾਈਲ, ਪੰਜ ਸਿੰਮ ਤੇ ਇੱਕ ਬੈਟਰੀ ਬਰਾਮਦ ਕੀਤੀ ਸੀ, ਜਿਸ ਬਾਰੇ ਉਸ ਖ਼ਿਲਾਫ਼ ਕੇਸ ਦਰਜ ਕੀਤਾ ਸੀ। ਗੈਂਗਸਟਰ ਰਾਜਵੀਰ ਕਤਲ ਤੇ ਅਸਲਾ ਐਕਟ ਸਮੇਤ 11 ਹੋਰ ਮੁਕੱਦਮਿਆਂ ਤਹਿਤ ਬਠਿੰਡਾ ਜੇਲ੍ਹ ਵਿੱਚ ਸੱਤ ਸਾਲ ਦੀ ਸਜ਼ਾ ਅਧੀਨ ਬੰਦ ਹੈ, ਜਦਕਿ ਗੁਰਦੀਪ ਰਾਣੋ ਸਪੈਸ਼ਲ ਟਾਸਕ ਫੋਰਸ ਵੱਲੋਂ ਨਸ਼ਾ ਤਸਕਰੀ ਦੇ ਕੇਸ ਸਮੇਤ ਹੋਰ ਪੰਜ ਕੇਸਾਂ ਤਹਿਤ ਜੇਲ੍ਹ ਵਿੱਚ ਬੰਦ ਹੈ।