ਇਸਲਾਮਾਬਾਦ, 30 ਜੂਨ (ਪੋਸਟ ਬਿਊਰੋ)- ਪਾਕਿਸਤਾਨ ਦੇ ਸਾਬਕਾ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਨੇ ਵਿਦੇਸ਼ਾਂ ਦੇ ਨੇਤਾਵਾਂ ਤੋਂ ਤੋਹਫੇ ਵਿੱਚ ਮਿਲੀਆਂ ਤਿੰਨ ਮਹਿੰਗੀਆਂ ਘੜੀਆਂ ਨੂੰ ਨਾਜਾਇਜ਼ ਤਰੀਕੇ ਨਾਲ ਵੇਚ ਕੇ 3.6 ਕਰੋੜ ਰੁਪਏ ਕਮਾਏ ਸਨ। ਕੱਲ੍ਹ ਮੀਡੀਆ ਵਿੱਚ ਆਈ ਇੱਕ ਖਬਰ ਵਿੱਚ ਇਹ ਜਾਣਕਾਰੀ ਦਿੱਤੀ ਗਈ ਹੈ।
ਜਿਓ ਨਿਊਜ਼ ਨਾਲ ਸਾਂਝੀ ਕੀਤੀ ਗਈ ਅਧਿਕਾਰਤ ਜਾਣਕਾਰੀ ਮੁਤਾਬਕ ਖਾਨ ਨੇ ਪ੍ਰਧਾਨ ਮੰਤਰੀ ਰਹਿਣ ਦੌਰਾਨ ਇਨ੍ਹਾਂ ਰਤਨ ਜੜੀਆਂ ਕੀਮਤੀ ਘੜੀਆਂ ਤੋਂ ਕਰੋੜਾਂ ਰੁਪਏ ਕਮਾਏ ਹਨ, ਜਿਨ੍ਹਾਂ ਦੀ ਕੁੱਲ ਕੀਮਤ 15.4 ਕਰੋੜ ਰੁਪਏ ਹੈ। ਇਸ ਖਬਰ ਮੁਤਾਬਕ ਸਭ ਤੋਂ ਮਹਿੰਗੀ ਘੜੀ ਦੀ ਕੀਮਤ 10.1 ਕਰੋੜ ਰੁਪਏ ਸੀ, ਜਿਸ ਨੂੰ ਸਾਬਕਾ ਪ੍ਰਧਾਨ ਮੰਤਰੀ ਨੇ ਉਸ ਦੀ ਕੀਮਤ ਦਾ ਵੀਹ ਫੀਸਦੀ ਦੇ ਕੇ ਆਪਣੇ ਕੋਲ ਰੱਖਿਆ ਹੈ। ਇਸ ਤੋਂ ਪਹਿਲਾਂ ਉਨ੍ਹਾਂ ਦੀ ਸਰਕਾਰ ਨੇ ‘ਤੋਸ਼ਾਖਾਨਾ' ਨਿਯਮਾਂ ਵਿੱਚ ਬਦਲਾਅ ਕੀਤਾ ਅਤੇ ਤੈਅ ਕੀਤਾ ਸੀ ਕਿ ਤੋਹਫੇ ਦੀ ਮੂਲ ਕੀਮਤ ਦਾ ਪੰਜਾਹ ਫੀਸਦੀ ਭੁਗਤਾਨ ਕਰ ਕੇ ਉਸ ਨੂੰ ਆਪਣੇ ਕੋਲ ਰੱਖਿਆ ਜਾ ਸਕਦਾ ਹੈ। ਪਾਕਿਸਤਾਨ ਦੇ ਕਾਨੂੰਨ ਮੁਤਾਬਕ ਵਿਦੇਸ਼ੀ ਨੇਤਾਵਾਂ ਤੋਂ ਮਿਲਣ ਵਾਲੇ ਕਿਸੇ ਵੀ ਤੋਹਫੇ ਨੂੰ ਸਰਕਾਰੀ ਖਜ਼ਾਨੇ ਵਿੱਚ ਜਮ੍ਹਾਂ ਕਰਾਉਣਾ ਹੁੰਦਾ ਹੈ।
ਖਬਰ ਵਿੱਚ ਦਸਤਾਵੇਜ਼ਾਂ ਤੇ ਵਿਕਰੀ ਦੀਆਂ ਰਸੀਦਾਂ ਦੇ ਹਵਾਲੇ ਨਾਲ ਕਿਹਾ ਗਿਆ ਹੈ ਕਿ ਤੋਸ਼ਾਖਾਨੇ ਤੋਂ ਆਪਣੇ ਪੈਸੇ ਨਾਲ ਇਨ੍ਹਾਂ ਕੀਮਤੀ ਘੜੀਆਂ ਨੂੰ ਖਰੀਦਣ ਦੇ ਥਾਂ ਸਾਬਕਾ ਕ੍ਰਿਕਟਰ ਇਮਰਾਨ ਖਾਨ ਨੇ ਪਹਿਲਾਂ ਘੜੀਆਂ ਨੂੰ ਵੇਚਿਆ ਅਤੇ ਹਰ ਘੜੀ ਦੀ ਕੀਮਤ ਦਾ ਵੀਹ ਫੀਸਦੀ ਸਰਕਾਰੀ ਖਜ਼ਾਨੇ ਵਿੱਚ ਜਮ੍ਹਾਂ ਕਰਵਾ ਦਿੱਤਾ, ਪਰ ਤੋਹਫਿਆਂ ਨੂੰ ਕਦੇ ਵੀ ਤੋਸ਼ਾਖਾਨੇ ਵਿੱਚ ਜਮ੍ਹਾਂ ਨਹੀਂ ਕਰਾਇਆ। ਕਿਸੇ ਵੀ ਸਰਕਾਰੀ ਅਧਿਕਾਰੀ ਲਈ ਜ਼ਰੂਰੀ ਹੈ ਕਿ ਉਹ ਉਸ ਨੂੰ ਮਿਲੇ ਤੋਹਫੇ ਦੇ ਬਾਰੇ ਫੌਰਨ ਸੂਚਨਾ ਦੇਵੇ ਤਾਂ ਕਿ ਉਸ ਦੀ ਕੀਮਤ ਦਾ ਮੁੱਲਾਂਕਣ ਕੀਤਾ ਜਾ ਸਕੇ।