ਇਟੋਬੀਕੋ, 21 ਜੂਨ (ਪੋਸਟ ਬਿਊਰੋ) : ਮੰਗਲਵਾਰ ਦੁਪਹਿਰ ਨੂੰ ਇੱਕ ਇਕਿਉਪਮੈਂਟ ਰੈਂਟਲ ਫੈਸਿਲਿਟੀ ਦੇ ਬਾਹਰ ਅੱਗ ਲੱਗ ਜਾਣ ਤੋਂ ਬਾਅਦ ਇਸ ਇਲਾਕੇ ਦੇ ਕਈ ਸਟੋਰ ਖਾਲੀ ਕਰਵਾ ਲਏ ਗਏ। ਅੱਗ ਦਰਜਨਾਂ ਪ੍ਰੋਪੇਨ ਟੈਂਕਸ ਵਿੱਚ ਲੱਗੀ।
ਸੱਭ ਤੋਂ ਪਹਿਲਾਂ ਇਹ ਥ੍ਰੀ ਅਲਾਰਮ ਅੱਗ ਰੇਸੀਨ ਰੋਡ ਤੇ ਬ੍ਰਾਇਡਨ ਡਰਾਈਵ ਨੇੜੇ ਸਥਿਤ ਫੈਸਿਲਿਟੀ ਦੇ ਬਾਹਰ ਲੱਗੀ, ਜੋ ਕਿ ਕਿਪਲਿੰਗ ਐਵਨਿਊ ਤੇ ਰੈਕਸਡੇਲ ਬੋਲੇਵਾਰਡ ਨੇੜੇ ਸਥਿਤ ਹੈ।ਫਾਇਰ ਚੀਫ ਮੈਥਿਊ ਪੈੱਗ ਨੇ ਦੱਸਿਆ ਕਿ ਮੌਕੇ ਉੱਤੇ ਪਹੁੰਚਣ ਉੱਤੇ ਉਨ੍ਹਾਂ ਨੂੰ ਬਿਲਡਿੰਗ ਦੇ ਬਾਹਰ ਪ੍ਰੋਪੇਨ ਦੇ ਟੈਂਕਾਂ ਤੇ ਕੰਪਰੈਸਡ ਗੈਸ ਸਿਲੰਡਰਾਂ ਨੂੰ ਅੱਗ ਲੱਗੀ ਮਿਲੀ।ਉਨ੍ਹਾਂ ਦੱਸਿਆ ਕਿ ਹੌਲੀ ਹੌਲੀ ਅੱਗ ਨੇੜੇ ਹੀ ਪਾਰਕ ਕੀਤੀਆਂ ਕਈ ਗੱਡੀਆਂ ਤੱਕ ਵੀ ਪਹੁੰਚ ਗਈ ਪਰ ਬਿਲਡਿੰਗ ਤੱਕ ਪਹੁੰਚਣ ਤੋਂ ਪਹਿਲਾਂ ਹੀ ਫਾਇਰ ਕ੍ਰਿਊ ਵੱਲੋਂ ਇਸ ਉੱਤੇ ਕਾਬੂ ਪਾ ਲਿਆ ਗਿਆ।
ਉਨ੍ਹਾਂ ਆਖਿਆ ਕਿ ਅੱਗ ਉੱਤੇ ਪੂਰੀ ਤਰ੍ਹਾਂ ਕਾਬੂ ਪਾ ਲਿਆ ਗਿਆ ਹੈ ਤੇ ਇਸ ਦੌਰਾਨ ਕਿਸੇ ਦੇ ਜ਼ਖ਼ਮੀ ਹੋਣ ਦੀ ਕੋਈ ਖਬਰ ਨਹੀਂ ਹੈ।ਪੈੱਗ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਇਹ ਜਾਣਕਾਰੀ ਮਿਲੀ ਸੀ ਕਿ ਇਸ ਸਟੋਰ ਦੇ ਬਾਹਰ ਕਈ ਪ੍ਰੋਪੇਨ ਟੈਂਕਸ ਦਾ ਵਜ਼ਨ 100 ਪਾਊਂਡ ਤੱਕ ਵੀ ਹੈ।