ਕੁਝ ਕਿਰਦਾਰ ਅਜਿਹੇ ਹੁੰਦੇ ਹਨ, ਜਿਨ੍ਹਾਂ ਦੀ ਤਿਆਰੀ ਦੂਸਰੇ ਕਿਰਦਾਰਾਂ ਤੋਂ ਅਲੱਗ ਹੁੰਦੀ ਹੈ। ਅਭਿਨੇਤਾ ਅਮਿਤ ਸਾਧ ਦੇ ਲਈ ਉਹ ਕਿਰਦਾਰ ਵੈੱਬ ਸੀਰੀਜ਼ ‘ਬ੍ਰੀਦ’ ਦਾ ਰਿਹਾ ਹੈ। ਸ਼ੋਅ ਵਿੱਚ ਸੀਨੀਅਰ ਇੰਸਪੈਕਟਰ ਕਬੀਰ ਸਾਵੰਤ ਦਾ ਕਿਰਦਾਰ ਨਿਭਾਉਣ ਵਾਲੇ ਅਮਿਤ ਸਾਧ ‘ਬ੍ਰੀਦ 3’ ਵਿੱਚ ਵੀ ਨਜ਼ਰ ਆਉਣਗੇ।
ਚਾਰ ਸਾਲ ਬਾਅਦ ਇਸ ਕਿਰਦਾਰ ਵਿੱਚ ਦੋਬਾਰਾ ਵਾਪਸੀ ਬਾਰੇ ਉਸ ਦਾ ਕਹਿਣਾ ਹੈ, ‘ਬ੍ਰੀਦ 3’ ਦੀ ਸ਼ੂਟਿੰਗ ਹੋ ਗਈ ਹੈ। ਮੇਰੇ ਕਿਰਦਾਰ ਕਬੀਰ ਉੱਤੇ ਫਿਲਮ ਦੇ ਡਾਇਰੈਕਟਰ ਤੇ ਲੇਖਕ ਨੇ ਬਹੁਤ ਕੰਮ ਕੀਤਾ ਹੈ। ਮੈਂ ਉਸ ਕਿਰਦਾਰ ਦੇ ਅੰਦਰ ਬਹੁਤ ਜ਼ਿਆਦਾ ਖੁੱਭ ਚੁੱਕਾ ਹਾਂ। ਚਾਰ ਸਾਲ ਮੈਂ ਉਸ ਕਿਰਦਾਰ ਵਿੱਚ ਰਿਹਾ ਹਾਂ। ਮੈਨੂੰ ਕਬੀਰ ਦਾ ਕਿਰਦਾਰ ਬਹੁਤ ਪਸੰਦ ਹੈ। ਮੈਂ ਉਸ ਉੱਤੇ ਮਿਹਨਤ ਕੀਤੀ ਹੈ। ਕਬੀਰ ਦਾ ਕਿਰਦਾਰ ਆਪਣੇ ਹੀ ਘੇਰੇ ਵਿੱਚ ਸੁਪਰਹੀਰੋ ਹੈ। ਉਹ ਚੰਗਾ ਹੈ, ਬੁਰਾ ਹੈ। ਉਹ ਕਿਰਦਾਰ ਮੈਨੂੰ ਥਕਾ ਦਿੰਦਾ ਹੈ। ਦੁਨੀਆਂ ਤੋਂ ਅਲੱਗ ਕਰ ਦਿੰਦਾ ਹੈ। ਜਦ ਮੈਂ ‘ਬ੍ਰੀਦ 3’ ਉੱਤੇ ਕੰਮ ਕਰ ਰਿਹਾ ਸੀ ਤਾਂ ਦੁਨੀਆ ਤੋਂ ਖੁਦ ਨੂੰ ਵੱਖ ਕਰ ਲਿਆ ਸੀ। ਉਸ ਦਾ ਫਾਇਦਾ ਵੀ ਹੋਵੇਗਾ, ਜਦ ਸ਼ੋਅ ਆਏਗਾ। ਮੈਂ ਇਸ ਪ੍ਰਕਿਰਿਆ ਨੂੰ ਮੈਥਡ ਐਕਟਿੰਗ ਨਹੀਂ, ਬਲਕਿ ਅਧੀਨਤਾ ਕਹਾਂਗਾ। ਮੈਂ ਅਧੀਨਤਾ ਵਿੱਚ ਵਿਸ਼ਵਾਸ ਰੱਖਦਾ ਹਾਂ। ਇਹ ਪਹਿਲਾਂ ਮੇਰੇ ਸੁਭਾਅ ਦਾ ਹਿੱਸਾ ਨਹੀਂ ਸੀ, ਮੈਂ ਖੁਦ ਵਿੱਚ ਇਸ ਨੂੰ ਵਿਕਸਿਤ ਕੀਤਾ ਹੈ। ਆਪਣੇ ਕਿਰਦਾਰਾਂ ਵਿੱਚ ਆਪਣਾ ਇੱਕ ਹਜ਼ਾਰ ਫੀਸਦੀ ਦਿੰਦਾ ਹਾਂ।” ਇਹ ਸ਼ੋਅ ਇਸ ਸਾਲ ਦੇ ਅਖੀਰ ਤੱਕ ਰਿਲੀਜ਼ ਹੋ ਸਕਦਾ ਹੈ।