ਸੈਕ੍ਰਾਮੈਂਟੋ, 25 ਮਈ (ਪੋਸਟ ਬਿਊਰੋ)- ਕੈਲੀਫੋਰਨੀਆ ਦੇ ਵਾਸੀ ਸੋਸ਼ਲ ਮੀਡੀਆ ਕੰਪਨੀਆਂ ਨੂੰ ਉਨ੍ਹਾਂ ਦੇ ਬੱਚਿਆਂ ਨੂੰ ਨੁਕਸਾਨ ਪੁਚਾਉਣ ਲਈ ਜਲਦੀ ਹੀ ਜ਼ਿੰਮੇਵਾਰ ਠਹਿਰਾ ਸਕਣਗੇ ਜੋ ਉਨ੍ਹਾਂ ਦੇ ਉਤਪਾਦਾਂ ਦੇ ਆਦੀ ਹੋ ਗਏ ਹਨ।ਸੂਬੇ ਦੀ ਅਸੈਂਬਲੀ ਨੇ ਇੱਕ ਬਿੱਲ ਪਾਸ ਕੀਤਾ ਹੈ, ਜਿਸ ਵਿੱਚ ਸੋਸ਼ਲ ਮੀਡੀਆ ਦੇ ਆਦੀ ਬੱਚਿਆਂ ਦਾ ਨੁਕਸਾਨ ਕਰ ਰਹੀਆਂ ਕੰਪਨੀਆਂ ਉੱਤੇਕੇਸ ਦਾਇਰ ਕਰਨ ਦਾ ਪ੍ਰਬੰਧ ਹੈ। ਇਹ ਬਿੱਲ ਸੂਬੇ ਦੀ ਸੈਨੇਟ ਵਿੱਚ ਭੇਜਿਆ ਜਾਏਗਾ।
ਕਾਰੋਬਾਰੀ ਵਰਗਾਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਜੇਕਰ ਇਹ ਪ੍ਰਸਤਾਵ ਕਾਨੂੰਨ ਬਣ ਜਾਂਦਾ ਹੈ ਤਾਂ ਸੋਸ਼ਲ ਮੀਡੀਆ ਕੰਪਨੀਆਂ ਕਿਸੇ ਕਾਨੂੰਨੀ ਜੋਖਮ ਦਾ ਸਾਹਮਣਾ ਕਰਨ ਦੀ ਥਾਂ ਕੈਲੀਫੋਰਨੀਆ ਵਿੱਚ ਬੱਚਿਆਂ ਲਈ ਪ੍ਰੋਗਰਾਮ ਬੰਦ ਕਰ ਦੇਣਗੀਆਂ। ਇਹ ਬਿੱਲ ਸਿਰਫ ਉਨ੍ਹਾਂ ਸੋਸ਼ਲ ਮੀਡੀਆ ਕੰਪਨੀਆਂ ਉੱਤੇ ਲਾਗੂ ਹੋਵੇਗਾ, ਜਿਨ੍ਹਾਂ ਦਾ ਕੁੱਲ ਰੈਵੇਨਿਊ ਪਿਛਲੇ ਸਾਲ ਘੱਟ0 ਘੱਟ 10 ਕਰੋੜ ਡਾਲਰ ਸੀ।ਇਹ ਬਿੱਲ ਫੇਸਬੁੱਕ ਵਰਗੇ ਸੋਸ਼ਲ ਮੀਡੀਆ ਨੂੰ ਟਾਰਗੈਟ ਕਰਨ ਵਾਲਾ ਪ੍ਰਤੀਤ ਹੁੰਦਾ ਹੈ। ਇਹ ਨੈਟਫਲਿਕਸ ਅਤੇ ਹੁਲੁ ਵਰਗੀ ਸਟ੍ਰੀਮਿੰਗ ਸੇਵਾਵਾਂ ਜਾਂ ਸਿਰਫ ਈਮੇਲ ਤੇ ਸੰਦੇਸ਼ ਵਾਲੀਆਂ ਸੇਵਾਵਾਂ ਦੀ ਪੇਸ਼ਕਸ਼ ਵਾਲੀਆਂ ਕੰਪਨੀਆਂ ਉੱਤੇ ਲਾਗੂ ਨਹੀਂ ਹੋਵੇਗਾ। ਬਿੱਲ ਪੇਸ਼ ਕਰਨ ਵਾਲੇ ਰਿਪਬਲੀਕਨ ਨੇਤਾ ਜਾਰਡੰਡ ਕਨਿੰਘਮ ਨੇ ਕਿਹਾ,‘‘ਬੱਚਿਆਂ ਉੱਤੇ ਸਮਾਜਿਕ ਪ੍ਰਯੋਗ ਕਰਨ ਦਾ ਯੁੱਗ ਖਤਮ ਹੋ ਗਿਆ ਤੇ ਅਸੀਂ ਬੱਚਿਆਂ ਦੀ ਰੱਖਿਆ ਕਰਾਂਗੇ।''